ବାଃ ବାଃରେ ପ୍ରାଥମିକ ଶିକ୍ଷା: ୮ ଶ୍ରେଣୀକୁ ୨ କୋଠରୀ, ଏମିତି ପଢୁଛନ୍ତି ଦେଶର ଭବିଷ୍ୟତ

କେନ୍ଦ୍ରାପଡ଼ା (ଓଡ଼ିଶା ରିପୋର୍ଟର): ‘ସମସ୍ତେ ପଢ଼ିବେ, ସମସ୍ତେ ବଢିବେ’। ଶୁଣିବାକୁ ବହୁତ ଭଲ ଲାଗୁଛି। ହେଲେ ସମସ୍ତେ ପଢ଼ିବା ପାଇଁ କ’ଣ ସରକାରଙ୍କ ପାଖରେ ବ୍ୟବସ୍ଥା ଅଛି ? ଯଦି ଅଛି ତା ହେଲେ ଆଜବେଷ୍ଟର କଣା ଛାତ ହେଉ କି ଗୋଟିଏ ଗୋଟିଏ ରୁମ୍‌ରେ ୩ରୁ ୪ଟି ଶ୍ରେଣୀର ପିଲା କାହିଁକି ପଢୁଛନ୍ତି। ବିଭାଗୀୟ ଅଧିକାରୀ ଓ ମନ୍ତ୍ରୀ ଯେତେ ଯାହା କହିଲେ ବି ଏହା ହେଉଛି ରାଜ୍ୟର ସବୁ ଜିଲ୍ଲାରେ ଥିବା ପ୍ରାଥମିକ ବିଦ୍ୟାଳୟର ପ୍ରକୃତ ସତ୍ୟ। ତେବେ କେନ୍ଦ୍ରାପଡ଼ା ଜିଲ୍ଲାରେ ଏହି ସମସ୍ୟା ବଳି ଯାଇଛି। ଅଧିକାଂଶ ପ୍ରାଥମିକ ବିଦ୍ୟାଳୟ ନାହିଁ ନାହିଁରେ ଚାଲିଛି। କେନ୍ଦ୍ରାପଡ଼ା ଜିଲ୍ଲା ପ୍ରାଥମିକ ଶିକ୍ଷାକୁ ନେଇ ଓଡ଼ିଶା ରିପୋର୍ଟର ବିଶେଷ ଉପସ୍ଥାପନା।k2ପିଲାମାନଙ୍କୁ ସ୍କୁଲକୁ ଆକୃଷ୍ଟ କରିବାକୁ ସରକାର ବହି, ପୋଷାକ, ସାଇକେଲ ଦେବାଠାରୁ ଆରମ୍ଭ କରି ମଧ୍ୟାହ୍ନ ଭୋଜନର ବ୍ୟବସ୍ଥା କରିଛନ୍ତି। ବାସ୍‌ ଏତିକି କରିଦେଇ ଭାବୁଛନ୍ତି ପିଲାମାନେ ସ୍କୁଲକୁ ଚାଲି ଆସିବେ ଆଉ ବଳେ ବଳେ ପାଠୁଆ ହୋଇଯିବେ। କାରଣ ଏହି ଜିଲ୍ଲାରେ ଅଧିକାଂଶ ପ୍ରାଥମିକ ବିଦ୍ୟାଳୟ କଥା ନ କହିବା ଭଲ। କିଛି ବିଦ୍ୟାଳୟରେ ପିଲା ତ ଗୋରୁ ହାଟ୍‌ ପରି ବସୁଛନ୍ତି। ଆଉ କିଛି ବିଦ୍ୟାଳୟରେ ଦିନରେ ଚନ୍ଦ୍ର, ତାରା ଆରାମରେ ଦେଖି ହେବ।

ଜିଲ୍ଲାର କଖରୁଣୀ ଓ ଖଡିଅଣ୍ଟା ସେବାଶ୍ରମ ୟୁଜିୟୁପି ସ୍କୁଲ। ଆବଶ୍ୟକ ଅନୁସାରେ ଶ୍ରେଣୀଗୃହ ନାହିଁ। ମାତ୍ର ୨ଟି ପ୍ରକୋଷ୍ଠରେ ବସୁଛନ୍ତି ୮ଟି ଶ୍ରେଣୀର ଛାତ୍ରଛାତ୍ରୀ। ଏଥିରୁ ଜାଣି ହେଉଥିବ ଦେଶର ଭବିଷ୍ୟତ କୁହାଯାଉଥିବା ଏହି କୋମଳମତି ପିଲା କ’ଣ ପଢୁଥିବେ। କେବଳ ଶ୍ରେଣୀଗୃହ ସମସ୍ୟା ନୁହେଁ, ଦୀର୍ଘଦିନ ହେଲା ସ୍କୁଲରେ ସଂସ୍କୃତ ଓ ହିନ୍ଦୀ ଶିକ୍ଷକ ପଦବୀ ଖାଲି ପଡିଛି। ଫଳରେ ଏହି ଦୁଇ ବିଷୟରେ ପାଠପଢା ର’ ଠ’ରେ ଚାଲିଥିବା ଅଭିଯୋଗ ହେଉଛି।k1ସେହିପରି ଅଠରବାଟିଆ ଓ କଖାରୁଣୀ ସେବାଶ୍ରମ ବିଦ୍ୟାଳୟର ସମସ୍ୟା ତଦୃପ। କେଉଁଠି ଛାତରୁ ସିମେଣ୍ଟ ଖଣ୍ଡ ଝଡ଼ି ପଡୁଛି ତ କେଉଁଠି ଆଜବେଷ୍ଟଜ କଣା ହୋଇଯାଇଛି। ବର୍ଷା ହେଲେ ପାଠପଢ଼ା ବନ୍ଦ। ଅନ୍ୟପକ୍ଷରେ ଶିକ୍ଷାବର୍ଷର ଅଧା ବର୍ଷ ବିତିଯାଇଥିଲେ ମଧ୍ୟ ସବୁ ପିଲାଙ୍କୁ ପାଠ୍ୟ ପୁସ୍ତକ ମିଳି ପାରିନି।

ଅଭିଯୋଗ ପରେ ଅଭିଯୋଗ ହେଉଛି। ହେଲେ କୁମ୍ଭକର୍ଣ୍ଣ ନିଦ୍ରାରେ ଥିବା ବିଭାଗୀୟ ଅଧିକାରୀ ଚିରାଚରିତ ଢଙ୍ଗରେ ଗୋଟିଏ ଉତ୍ତର ଦେଉଛନ୍ତି ସମସ୍ୟାର ସମାଧାନ ଦିଗରେ ପଦକ୍ଷେପ ନିଆଯିବ।

କେବେ ପଦକ୍ଷେପ ନିଆଯିବ, ତାହା କାହାକୁ ଜଣାନାହିଁ। ଭାଷଣରେ ନେତା ନିଜ କାମ ସାରି ଦେଉଛନ୍ତି। ବିଭାଗୀୟ ଅଧିକାରୀ ରୁଟିନ୍‌ ଭିଜିଟ୍‌ କରି ଫେରୁଛନ୍ତି, ହେଲେ ତାଙ୍କ ଆଖିରେ କିଛି ପଡ଼ୁନାହିଁ। ପିଲାମାନେ ସ୍କୁଲ ଯାଉଛନ୍ତି, ଗୋରୁ ହାଟ ପରି ଗୋଟେ ଗୋଟେ କୋଠରୀରେ ଲଦା ଲଦି ହୋଇ ବସି କ’ ବ’ ଚ’ କରି ଘରକୁ ଫେରୁଛନ୍ତି। ଉପର ଠାଉରିଆ ଭାବେ ସବୁ କହୁଛନ୍ତି ଶିକ୍ଷା ବ୍ୟବସ୍ଥା ଆମର ଓକେ, ହେଲେ ସବୁ ଜାଣିଛନ୍ତି, ଦେଶର ଭବିଷ୍ୟଙ୍କ ଭବିଷ୍ୟତ କେଉଁ ଦିଗରେ ଯାଉଛି।