ଲାଲବାହିନୀର ନୂଆ ଟ୍ରିକ୍‌: ସାଦା ପୋଷାକରେ ବୁଲୁଛନ୍ତି ମାଓବାଦୀ, ଏସ୍‌ଓଜି ବାୟା

<p>ବଲାଙ୍ଗିର(ଓଡ଼ିଶା ରିପୋର୍ଟର): ଲାଲବାହିନୀଙ୍କ ନୂଆ ଟ୍ରିକ୍&zwnj;। ଯବାନଙ୍କ ଉପରେ ଆକ୍ରମଣ କରିବା ପାଇଁ ସାଦା ପୋଷାକରେ ରହି ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛନ୍ତି। ଲାଲବାହିନୀଙ୍କ ଏହି ନୂଆ ଟ୍ରିକ୍&zwnj;ରେ ବାୟା ହୋଇଯାଇଛନ୍ତି ଯବାନ। ଗତକାଲି ରାତିରେ ବଲାଙ୍ଗିରରେ ଏପରି ସମସ୍ୟାରେ ସମ୍ମୁଖୀନ ହୋଇଛନ୍ତି ଏସ୍&zwnj;ଓଜି ଯବାନ। ଯାହାଫଳରେ ଲାଲବାହିନୀଙ୍କ ଆକ୍ରମଣରେ ଜଣେ ଯବାନ ଗୁରୁତର ଆହତ ହୋଇଛନ୍ତି। ତାଙ୍କୁ ବିଶାଖାପାଟଣା ସ୍ଥାନାନ୍ତର କରାଯାଇଛି। ଅନ୍ୟପକ୍ଷରେ ପୋଲିସ ଗୁଳିରେ ଦୁଇଜଣ ମାଓବାଦୀ ଆହତ ହୋଇଥିବା ପୋଲିସ କହିଛି। ଏହି ଘଟଣା ପରେ ସୁରକ୍ଷାକର୍ମୀ କମ୍ବିଂ ଅପରେସନକୁ ଜୋରଦାର କରିଛନ୍ତି।</p><p>ରବିବାର ରାତି ପ୍ରାୟ ୯ଟାରେ ତୁରେଇକେଲା ଥାନା ମହଖଣ୍ଡ ଗାଁରେ ଥିବା ବନଦୁର୍ଗା ମନ୍ଦିର ପଛପାଖରେ ଚାଲିଥିଲା ମାଓବାଦୀଙ୍କ କ୍ୟାମ୍ପ। ବିଶେଷ ସୂତ୍ରରୁ ଖବର ପାଇ ପୂରା ଅଞ୍ଚଳକୁ ଘେରି ଯାଇଥିଲେ ଏସ୍&zwnj;ଓଜି ଯବାନ। ତେବେ ସୁରକ୍ଷାକର୍ମୀଙ୍କ ଗନ୍ଧ ବାରିବା କ୍ଷଣି ମାଓବାଦୀ ଗୁଳି ଚାଳନା ଆରମ୍ଭ କରିଦେଇଥିଲେ। ମାଓବାଦୀ ସାଦା ପୋଷାକରେ ଥିବାରୁ କନ୍ଧମାଳ ଗୁମୁଡୁମାହ ଭଳି ଘଟଣା ଏଡ଼ାଇବା ଲାଗି ସୁରକ୍ଷାକର୍ମୀଙ୍କୁ ଯଥେଷ୍ଟ ସତର୍କତା ଅବଲମ୍ବନ କରିବାକୁ ପଡ଼ିଥିଲା। ପରେ ଉଭୟ ପକ୍ଷ ମଧ୍ୟରେ ଜୋରଦାର ଗୁଳି ବିନିମୟ ହୋଇଥିଲା। ଏଥିରେ ଏସ୍&zwnj;ଓଜି ଯବାନ ଚନ୍ଦ୍ରଭାନୁ ଗୁରୁତର ଆହତ ହୋଇଛନ୍ତି। ଏହାର ସୁଯୋଗ ନେଇ ମାଓବାଦୀ ସେଠାରୁ ଖସି ପଳାଇବାରେ ସକ୍ଷମ ହୋଇଥିଲେ। ତେବେ ସୁରକ୍ଷାକର୍ମୀଙ୍କ ଗୁଳିରେ ୨ ଜଣ ମାଓବାଦୀ ଆହତ ହୋଇଥିବା ବଲାଙ୍ଗିର ଏସ୍&zwnj;ପି କେ.ଶିବା ସୁବ୍ରମଣି କହିଛନ୍ତି।</p><p>ଉତ୍ତରାଞ୍ଚଳ ଆଇଜି ସୁଶାନ୍ତ ନାଥ କହିଛନ୍ତି-&ldquo;ମାଓବାଦୀଙ୍କ ଗତିବିଧି ଉପରେ ନଜର ରଖାଯାଇଛି। ଏହି ଅନୁସାରେ କମ୍ୱିଂ ଅପରେସନ୍&zwnj;କୁ ଜୋରଦାର କରାଯାଇଛି। ଆହତ ମାଓବାଦୀଙ୍କୁ ଧରିବା ପାଇଁ ଚେଷ୍ଟା ଚାଲିଛି।&rdquo;</p><p>ମାଓବାଦୀଙ୍କ ଆକ୍ରମଣରେ ଆହତ ଯବାନ ଚନ୍ଦ୍ରଭାନୁଙ୍କୁ ପ୍ରଥମ କଣ୍ଟାବାଞ୍ଜି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଯବାନଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ବଲାଙ୍ଗିର ମୁଖ୍ୟ ଚିକିତ୍ସାଳୟକୁ ନିଆଯାଇଛି। ତେବେ ଅବସ୍ଥା ଗୁରୁତର ଥିବାରୁ ପବନହଂସ ହେଲିକପ୍ଟରରେ ବିଶାଖାପାଟଣା ନିଆଯାଇଛି। ନିଜେ ଜିଲ୍ଲାପାଳ ଯବାନଙ୍କ ଚିକିତ୍ସା ଲାଗି ସମସ୍ତ ବ୍ୟବସ୍ଥା କରିଥିଲେ।</p><p>ଗତ କିଛି ଦିନ ହେବ ତୁରେଇକେଲା ଅଞ୍ଚଳରେ ସକ୍ରିୟ ଅଛନ୍ତି ମାଓବାଦୀ। ଗତ ସ୍ୱାଧୀନତା ଦିବସ ଉତ୍ସବ ବେଳେ ଏଠାରେ ପୋଲିସ ଓ ମାଓବାଦୀ ମୁହାଁମୁହିଁ ହୋଇଥିଲେ। ସେହିପରି ଦଶହରା ବେଳେ ମାଓବାଦୀ ଏଠାରେ ବ୍ୟାନର ଓ ପୋଷ୍ଟର ଲଗାଇଥିଲେ। ଗତ ଅକ୍ଟୋବର ୨୮ ତାରିଖରେ ପୋଲିସ ସ୍ଥାନୀୟ ଚାନ୍ଦଲି ଜଙ୍ଗଲରେ ଚଢାଉ କରି ବିପୁଳ ପରିମାଣର ବିସ୍ଫୋରକ ଜବତ କରିଥିଲା। ତୁରେଇକେଲା ବ୍ୟତୀତ ଖପ୍ରାଖୋଲ ଓ ଲାଠେର ଅଞ୍ଚଳରେ ବଲାଙ୍ଗିର-ବରଗଡ଼ ମହାସମୁନ୍ଦ ଡିଭିଜନ ସଦସ୍ୟଙ୍କ ଗତବିଧି ରହିଥିବା ଜଣାପଡିଛି।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।