ଭୁବନେଶ୍ୱର: ବାଣୀବିହାରରେ ଚଳିତବର୍ଷ ହେବ ନାହିଁ ଛାତ୍ର ସଂସଦ ନିର୍ବାଚନ। ଆଜି ଅନୁଷ୍ଠିତ ପିଜି କାଉନସିଲ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହାସହ ପିଜି କାଉନସିଲର ପୂର୍ବ ନିଷ୍ପତ୍ତି କାଏମ ରହିଛି । ବିଶ୍ୱବିଦ୍ୟାଳୟରେ ବାରମ୍ବାର ହିଂସାକାଣ୍ଡ ଘଟୁଥିବାରୁ ଗତ ସେପ୍ଟେମ୍ବର ୨୬ ତାରିଖରେ ପିଜି କାଉନସିଲ୍ ବୈଠକରେ ବାଣୀବିହାରରେ ନିର୍ବାଚନ ବାତିଲ କରିଦିଆଯାଇଥିଲା । ଆଜିର ନିଷ୍ପତ୍ତି ପରେ ଗଣ୍ଡଗୋଳ ଆଶଙ୍କା ରଖି ବିଶ୍ୱବିଦ୍ୟାୟ ପରିସରରେ ୩ ପ୍ଲାଟୁନ ଫୋର୍ସ ମୁତୟନ କରାଯାଇଛି। ପିଜି କାଉନସିଲର ଏପରି ନିଷ୍ପତ୍ତିକୁ ଛାତ୍ର ବିଜେଡି ଗ୍ରହଣ କରି ନେବ ବୋଲି କହିଥିବା ବେଳେ ଏବିଭିପି ପକ୍ଷରୁ ନିନ୍ଦା କରାଯାଇଛି । ଏପରି ନିଷ୍ପତ୍ତିକୁ ବିରୋଧ କରି ଆଶାୟୀ ଛାତ୍ରଛାତ୍ରୀମାନେ ବାଣୀବିହାର ଗେଟ ଓ ପିଜି କାଉନସିଲ ଅଧ୍ୟକ୍ଷଙ୍କ ଅଫିସ ସମ୍ମୁଖରେ ଧାରଣାରେ ବସିଛନ୍ତି । ନିର୍ବାଚନ କରାଯିବାକୁ ନିଷ୍ପତ୍ତି ନିଆ ନ ଯିବା ପର୍ଯ୍ୟନ୍ତ ଧାରଣା ଜାରୀ ରହିବ ବୋଲି ସେମାନେ ଚେତାବନୀ ଦେଇଛନ୍ତି ।
ପିଜି କାଉନସିଲର ଯେତେବେଳେ ବାଣୀବିହାର ନିର୍ବାଚନ ବାତିଲ କରାଯିବା ନେଇ ନିଷ୍ପତ୍ତି ନିଆଯିବା ପରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା । ଛାତ୍ରଛାତ୍ରୀମାନେ ପିଜି କାଉନସିଲ୍ ଅଫିସ୍ ସମ୍ମୁଖରେ ଧାରଣାରେ ବସିଥିଲେ। ପରେ ଛାତ୍ରଛାତ୍ରୀମାନେ ୫ ନମ୍ବର ଜାତୀୟ ରାଜପଥ ଅବରୋଧ କରିଥିଲେ । ଫଳରେ କଟକ-ଭୁବନେଶ୍ୱର ରାସ୍ତାରେ କିଛି ସମୟ ପାଇଁ ଟ୍ରାଫିକ ସମସ୍ୟା ଦେଖା ଦେଇଥିଲା । ଏପରି କି ରାସ୍ତାରୋକ ବେଳେ ଜଣେ ମହିଳା ରାସ୍ତାରେ ଅଟକି ରହିବା ଯୋଗୁଁ ଅସୁସ୍ଥ ହୋଇ ମୃତ୍ୟୁବରଣ କରିଥିଲେ।
ଅନ୍ୟପକ୍ଷେ ନିର୍ବାଚନ କରାଯିବାକୁ ଘୋଷଣା କରା ନ ଯିବା ପର୍ଯ୍ୟନ୍ତ ଆନ୍ଦୋଲନ ଜାରୀ ରହିବା ବୋଲି ଛାତ୍ରଛାତ୍ରୀମାନେ ଚେତାବନୀ ଦେଇଥିଲେ । ୨୭ ତାରିଖ ରବିବାର ଏହି ପ୍ରସଙ୍ଗରେ କମିଶନରେଟ ପୋଲିସ ଓ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ମଧ୍ୟରେ ଆଲୋଚନା ହୋଇଥିଲା । ସେହିପରି ବୁଧବାର ଆଡଭାଇଜରୀ କମିଟି ବୈଠକରେ ଏହି ପ୍ରସଙ୍ଗରେ ବିସ୍ତୃତ ଆଲୋଚନା ହୋଇଥିଲା । ଆଲୋଚନା ପରେ କମିଟି ପକ୍ଷରୁ ପିଜି କାଉନସିଲକୁ ଏକ ସମୀକ୍ଷା ରିପୋର୍ଟ ଦିଆଯାଇଥିଲା । ଆଜିର ବୈଠକରେ ଏହି ରିପୋର୍ଟ ଉପରେ ଆଲୋଚନା ହୋଇଥିଲା । ଏ ନେଇ ପିଜି କାଉନସିଲ ଅଧ୍ୟକ୍ଷ ରଞ୍ଜନ ବଳ କହିଛନ୍ତି, ପ୍ରଥମତଃ ଛାତ୍ରଛାତ୍ରୀଙ୍କ ସୁରକ୍ଷାକୁ ଧ୍ୟାନ ଦିଆଯାଉଛି । ଏବେ ବି ବାଣୀବିହାର ପରିସରରେ ଉତ୍ତେଜନା ଲାଗି ରହିଛି । ନିର୍ବାଚନ ହେଲେ ପୁଣି ହିଂସାକାଣ୍ଡ ଘଟିବାର ଆଶଙ୍କା ରହିଥିବାରୁ ପୂର୍ବ ନିଷ୍ପତ୍ତିକୁ କାଏମ ରଖାଗଲା ବୋଲି ସେ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
