ଭବାନୀପାଟଣା: ଯୌତୁକ ପାଇଁ କଳାହାଣ୍ଡି ଜିଲ୍ଲା ଭବାନୀପାଟଣା ସହରର ଶକ୍ତିନଗର ପଡ଼ାରେ ଜଣେ ବିବାହିତା ମହିଳାଙ୍କୁ କିରାସିନିରେ ପୋଡ଼ି ହତ୍ୟା କରାଯାଇଥିବା ଅଭିଯୋଗ ହୋଇଛି। ତାଙ୍କ ନାଁ ପ୍ରିୟଦର୍ଶିନୀ ମହାପାତ୍ର। ପୋଲିସ୍ ତାଙ୍କ ସ୍ୱାମୀ ଅଜୟ ମହାପାତ୍ରଙ୍କୁ ଅଟକ ରଖି ପଚରାଉଚରା କରୁଛି। ସେ ଜଣେ ଏପିଆର୍ କନଷ୍ଟେବଳ।
ଶନିବାର ସ୍ୱାମୀସ୍ତ୍ରୀଙ୍କ ମଧ୍ୟରେ ବଚସା ହୋଇଥିଲା। ପରେ ଶ୍ୱଶୁର ଘର ଲୋକେ ପ୍ରିୟଦର୍ଶିନୀ ଦେହରେ କିରାସିନି ଢାଳି ପୋଡ଼ି ମାରି ଦେଇଥିବା ଅଭିଯୋଗ ହୋଇଛି।
ପ୍ରିୟଦର୍ଶିନୀଙ୍କ ମା’ ବିପ୍ରଭାସିନୀ ମହାପାତ୍ର କହିଛନ୍ତି,“ମୋ ଝିଅକୁ ତା’ଶ୍ୱଶୁର ଘର ଲୋକେ ନିର୍ଯାତନା ଦେଇ ଆସୁଥିଲେ। ଶେଷରେ ଶନିବାର ସେମାନେ ତାଙ୍କୁ ତଣ୍ଟି ଚିପି ମାରିବା ପରେ କିରାସିନି ଢାଳି ପୋଡ଼ି ମାରି ଦେଇଛନ୍ତି।”
ଭବାନୀପାଟଣା ଟାଉନ୍ଥାନା ଅଧିକାରୀ ସୁରେନ୍ଦ୍ରନାଇ ଶତପଥୀ କହିଛନ୍ତି,“ଦୁଇ ବର୍ଷ ପୂର୍ବେ ପ୍ରିୟଦର୍ଶିନୀଙ୍କ ବିବାହ ହୋଇଥିଲା। ବିବାହ ପରଠାରୁ ତାଙ୍କୁ ଯୌତୁକ ପାଇଁ ନିର୍ଯାତନା ଦିଆଯାଉଥିଲା ବୋଲି ତାଙ୍କ ଘର ଲୋକେ ଅଭିଯୋଗ କରିଛନ୍ତି। ତାଙ୍କ ଶ୍ୱଶୁର ଘର ଲୋକେ ଏକ ବାଇକ୍ ଓ କିଛି ଟଙ୍କା ଦାବି କରୁଥିଲେ ବୋଲି ସେମାନେ ଅଭିଯୋଗ କରିଛନ୍ତି। ଏ କଥାକୁ ନେଇ ଶନିବାର ବି ତାଙ୍କ ଘରେ ପାଟିତୁଣ୍ଡ ହୋଇଥିଲା।”
ଅଜୟଙ୍କ ଭାଉଜ ଚିନ୍ମୟୀ ମହାପାତ୍ର ଯୌତୁକ ନିର୍ଯାତନା ଓ ହତ୍ୟା ଅଭିଯୋଗକୁ ଖଣ୍ଡନ କରିଛନ୍ତି। ପ୍ରିୟଦର୍ଶିନୀ ଆତ୍ମହତ୍ୟା କରିଛନ୍ତି ବୋଲି ସେ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
