ଭୁବନେଶ୍ୱରରେ ସିବ୍ବଲ: କବିତା ଗାଇ ମୋଦିଙ୍କୁ କଲେ କଟାକ୍ଷ

ଭୁବନେଶ୍ୱର(ଓଡିଶା ରିପୋର୍ଟର): ଭୁବନେଶ୍ୱରରେ ପହଞ୍ଚିଛନ୍ତି ବରିଷ୍ଠ କଂଗ୍ରେସ ନେତା କପିଲ ସିବ୍ବଲ। ଏଣେ ୪ ବର୍ଷ ସଫଳତା ବଖାଣିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବି ପହଞ୍ଚୁଛନ୍ତି। ସେ କଟକର ଐତିହାସିକ ବାଲିଯାତ୍ରା ପଡିଆରେ ଉଦ୍‌ବୋଧନ ଦେବେ। ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମ ପୂର୍ବରୁ ସିବ୍ବଲ କରିଛନ୍ତି ସାମ୍ବାଦିକ ସମ୍ମିଳନୀ। ଆଉ ବର୍ଷିଛନ୍ତି ମୋଦିଙ୍କ ଉପରେ। ନିଆରା ଢଙ୍ଗରେ କଟାକ୍ଷ କରିଛନ୍ତି ସିବ୍ବଲ। କବିତା ଗାଇ ମୋଦିଙ୍କୁ ତାଚ୍ଛଲ୍ୟ କରିଛନ୍ତି। ସେ କହିଛନ୍ତି- ‘ଅଚ୍ଛେ ଦିନ ନା ସଚ୍ଚେ ଦିନ, ହମ୍ ଆଗେ ବଢ଼େଙ୍ଗେ ମୋଦି ତେରେବିନ୍’। ଯାହାକୁ ଶୁଣି କଂଗ୍ରେସ ଶିବିରରେ ହସର ମାହୋଲ ସୃଷ୍ଟି ହୋଇଥିଲା।

ଏଭଳି କଟାକ୍ଷ କରିବା ପରେ ସେ ମହାନଦୀ କଥା ଉଠାଇଥିଲେ। ଓଡିଶାବାସୀଙ୍କ ସ୍ୱାର୍ଥ ଦୃଷ୍ଟିରୁ ମହାନଦୀରେ ଛତିଶଗଡ ନିର୍ମାଣ କରୁଥିବା ପ୍ରକଳ୍ପ କାର୍ଯ୍ୟ ବନ୍ଦ କରାଇ ପାରିବେ କି ବୋଲି ମଧ୍ୟ ସେ ପ୍ରଶ୍ନ କରିଛନ୍ତି। ଦୀର୍ଘଦିନ ଧରି ପ୍ରତିଶ୍ରୁତି ଉପରେ ପ୍ରତିଶ୍ରୁତି ଦେଉଥିବା ପ୍ରଧାନମନ୍ତ୍ରୀ ଓଡିଶା ବିକାଶ ଲାଗି କିଛି କରି ନାହାନ୍ତି ବୋଲି ଖୋଲାଖୋଲି କହିଛନ୍ତି ସିବ୍ବଲ।

ଖାଲି ମୋଦିଙ୍କୁ ନୁହେଁ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ କଟାକ୍ଷ କରିଛନ୍ତି। କହିଛନ୍ତି- ‘ଏ ରାଜ୍ୟର ସତ୍ତା ହାତେଇଥିବା ମାନ୍ୟବର ମୁଖ୍ୟମନ୍ତ୍ରୀ ଦିନେ କେନ୍ଦ୍ରର ସହଯୋଗୀ ଥିଲେ। ଏଣୁ ପ୍ରଶ୍ନ ଆମେ ତାଙ୍କୁ ବି ପଚାରୁଛୁ ରାଜ୍ୟ ପାଇଁ ସେ କ’ଣ କରିଛନ୍ତି । ମୋଦିଙ୍କ ପ୍ରତି ଓଡ଼ିଶାବାସୀଙ୍କ କେତେ ରାଗ ସେ କଥା ମୋଦି ଜାଣିଛନ୍ତି। ସେଥିପାଇଁ ସେ ସଡ଼କରେ ନ ଯାଇ ହେଲିକପ୍ଟରରେ କଟକ ଯିବେ।’

ମୋଦିଙ୍କ ବର୍ତ୍ତମାନ ଶକ୍ତିହୀନ ହୋଇ ପଡିଥିବା ତଥା ଶିଳ୍ପପତି, ବ୍ୟାଙ୍କ, ବହୁରାଷ୍ଟ୍ରୀୟ କଂପାନୀ ସ୍ୱାର୍ଥରେ ବ୍ୟସ୍ତ ରହିଥିବା ଅଭିଯୋଗ କରିଛନ୍ତି ସିବ୍ବଲ । ବିଦେଶରୁ କଳାଧନ ଫେରାଇବାରେ ପ୍ରତିଶ୍ରୁତି ଆଜି ପ୍ରତିଶ୍ରୁତିରେ ହିଁ ରହିଯାଇଛି । ଏମିତି କହୁକହୁ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମଧ୍ୟ ଛାଡି ନାହାନ୍ତି। ଓଡ଼ିଶାର ୬୦ ଲକ୍ଷ ଯୁବକ ବାହାର ରାଜ୍ୟରେ କାମ କରୁଛନ୍ତି। ରାଜ୍ୟରେ ଶିକ୍ଷା ବିପର୍ଯ୍ୟସ୍ତ ହୋଇପଡିଥିବା ବେଳେ ବେକାର ସମସ୍ୟା ଉତ୍କଟ ହେଲାଣି ଏଣୁ ମୁଖ୍ୟମନ୍ତ୍ରୀ ନବୀନ ମଧ୍ୟ ସମାଲୋଚନାର ଯୋଗ୍ୟ ବୋଲି ସେ କହିଛନ୍ତି।

Previous ArticleNext Article

Send this to a friend