ବାରିପଦା: ଭିଜିଲାନ୍ସ ଜାଲରେ କୋଟିପତି ସହକାରୀ ଯନ୍ତ୍ରୀ

ବାରିପଦା: ଭିଜିଲାନ୍ସ ଜାଲରେ ପଡିଛନ୍ତି ଜଣେ କୋଟିପତି ସହକାରୀ ଯନ୍ତ୍ରୀ। ସହକାରୀ ଯନ୍ତ୍ରୀ ଜଣଙ୍କ ହେଲେ ମୟୂରଭଞ୍ଜ ଜିଲ୍ଲା ସୁବର୍ଣ୍ଣପୁର ଜଳସେଚନ ପ୍ରକଳ୍ପ ବୈଶିଙ୍ଗା ଡିଭିଜନର କମଳାକାନ୍ତ ବେହେରା। ଭିଜିଲାନ୍ସ ଅଧିକାରୀମାନେ ତାଙ୍କ ପାଖରେ କୋଟିଏରୁ ଊର୍ଦ୍ଧ୍ୱ ଟଙ୍କାର ସ୍ଥାବର ଅସ୍ଥାବର ସମ୍ପତ୍ତି ଠାବ କରିଛନ୍ତି।

ଆୟ ବର୍ହିଭୁତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ବିଭାଗ ପକ୍ଷରୁ ଆଜି କମଳାକାନ୍ତଙ୍କ ବାରିପଦା ସ୍ଥିତ ବାସଭବନରେ ଚଢାଉ କରାଯାଇଥିଲା। ଏହାସହ ତଖତପୁର ଅଞ୍ଚଳରେ ଥିବା ତାଙ୍କ ବାସଭବନ, ଉଦଳାରେ ଥିବା ତାଙ୍କ ପୈତୃକ ଘର ଓ କାର୍ଯ୍ୟାଳୟରେ ଏକକାଳୀନ ଚଢାଉ କରାଯାଇଥିଲା। ଚଢାଉ ବେଳେ କମଳାକାନ୍ତଙ୍କ ଦୁଇ ମହଲାର ଘର, ବାରିପଦା ରଘୁନାଥପୁର ଓ ତୁଳସୀଚଉରାଠାରେ ଦୁଇଟି ଘର, ବିଭିନ୍ନ ସ୍ଥାନରେ ଜମି, ୩୦ ଲକ୍ଷ ଟଙ୍କାର ବ୍ୟାଙ୍କ ଡିପୋଜିଟ୍‌, ଏକାଧିକ ପାସ୍‌ବୁକ୍‌, ଗହଣା, ୩ଟି ବାଇକ୍‌, ଗୋଟିଏ କାର ଓ ନଗଦ ଟଙ୍କା ଥିବା ଜଣାପଡିଛି। ଏହାର ମୂଲ୍ୟ କୋଟିଏରୁ ଊର୍ଦ୍ଧ୍ୱ ହେବ ବୋଲି ଭିଜିଲାନ୍ସ ବିଭାଗ ପକ୍ଷରୁ ସୂଚନା ଦିଆଯାଇଛି।