ନୂଆଦିଲ୍ଲୀ: ମହାରାଷ୍ଟ୍ରର ଜଣେ ବ୍ୟକ୍ତି ଶିରଡ଼ି ସାଇ ବାବାଙ୍କ ନାମ ଭୋଟର୍ ତାଲିକାରେ ସ୍ଥାନିତ କରିବାକୁ ଉଦ୍ୟମ କରିଥିଲେ। ଯାଞ୍ଚ ବେଳେ ଏହା ଜଣାପଡ଼ିବା ପରେ ଉକ୍ତ ଯୁବକଙ୍କ ନାଁରେ ପୁଲିସ୍ ମାମଲା ରୁଜୁ କରିଛି। ତେବେ ଏହି ଯୁବକଙ୍କ ପରିଚୟ ମିଳିପାରି ନାହିଁ।
ଏହି ଅଜ୍ଞାତ ଯୁବକ ଜଣଙ୍କ ନିର୍ବାଚନ କମିଶନ୍ଙ୍କ ଅନ୍ଲାଇନ୍ ବ୍ୟବସ୍ଥା ମାଧ୍ୟମରେ ଅହମଦନଗର ଜିଲ୍ଲାର ଶିରଡ଼ି ବିଧାନସଭା ନିର୍ବାଚନ ମଣ୍ଡଳୀରେ ଶିରଡ଼ି ସାଇ ବାବାଙ୍କ ନାଁକୁ ମତଦାତା ଭାବେ ଯୋଡ଼ିକୁ ପ୍ରୟାସ କରିଥିଲେ।
ଅନ୍ଲାଇନ୍ରେ ଆସିଥିବା ଆବେଦନଗୁଡ଼ିକର ଯାଞ୍ଚ କଲା ବେଳେ ଅଧିକାରୀମାନେ ଏହା ଜାଣିପାରିଥିଲେ ଓ ପୁଲିସ୍କୁ ସୂଚନା ଦେଇଥିଲେ।
ରାହତା ଥାନାର ଅଧିକାରୀ ଅରୁଣ ପରଦେଶୀ କହିଛନ୍ତି,“ଘଟଣାଟି ଗତବର୍ଷ ଡିସେମ୍ବର ମାସର। ଉକ୍ତ ଅଜ୍ଞାତ ବ୍ୟକ୍ତିଙ୍କ ବିରୋଧରେ ଆଇଟି ଆଇନ୍ର ବିଭିନ୍ନ ଧାରାରେ ମାମଲା ରୁଜୁ କରାଯାଇଛି ଓ ତଦନ୍ତ ଜାରି ରହିଛି।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।