ନୂଆଦିଲ୍ଲୀ: ସାଧାରଣତନ୍ତ୍ର ଦିବସରେ ଚାଷୀଙ୍କ ଟ୍ରାକ୍ଟର ରାଲି ବେଳେ ଦିଲ୍ଲୀରେ ହୋଇଥିବା ହିଂସାକାଣ୍ଡ ପୂରା ଦେଶକୁ ଦୋହଲାଇ ଦେଇଥିଲା। ଏହି ହିଂସାକାଣ୍ଡ ପରେ ଏକାଧିକ ଟ୍ୱିଟର୍ ଆକାଉଣ୍ଟରେ ଆପତ୍ତିଜନକ ହାସଟ୍ୟାଗ୍ ଟ୍ରେଣ୍ଡ୍ କରୁଥିଲା। ଏବେ କେନ୍ଦ୍ର ସରକାରଙ୍କ ଇଲେକ୍ଟ୍ରୋନିକ୍ସ ଓ ଆଇଟି ମନ୍ତ୍ରାଳୟର ନିର୍ଦ୍ଦେଶ ପରେ ଟ୍ୱିଟର୍ ଇଣ୍ଡିଆ ୨୫୦ରୁ ଅଧିକ ଆକାଉଣ୍ଟକୁ ବ୍ଲକ୍ କରିଦେଇଛି। ଏହି ଆକାଉଣ୍ଟ ଗୁଡ଼ିକରେ ଚାଷୀ ଆନ୍ଦୋଳନକୁ ନେଇ ଗୁଜବ ସୃଷ୍ଟି କରିବାର ଅଭିଯୋଗ ରହିଛି। ଚାଷୀ ଆନ୍ଦୋଳନକୁ ନେଇ #ModiPlanningFarmerGenocide ନାମକ ହାସଟ୍ୟାଗ୍ ଚଲାଯାଇଥିଲା। ଏହି ହାସଟ୍ୟାଗର ଅର୍ଥ ହେଉଛି ମୋଦି ସରକାର ଚାଷୀଙ୍କ ହତ୍ୟା ପ୍ରସ୍ତୁତି ଚଳାଉଛନ୍ତି।
ଶନିବାରଠାରୁ ଏହି ହାସଟ୍ୟାଗ୍ ଲିଡ୍ କରୁଥିଲା। ଏଥିରେ ଅନେକ ଟ୍ୱିଟ୍/ଟ୍ୱିଟର୍ ଆକାଉଣ୍ଟ ବିଦେଶରୁ ପରିଚାଳନା ହେଉଥିଲା। ସସପେଣ୍ଡ ହୋଇଥିବା ଅନେକ ଆକାଉଣ୍ଟ/ଟ୍ୱିଟ୍ ଚାଷୀ ସଂଗଠନ ଓ ଚାଷୀ ନେତା ସମ୍ବନ୍ଧିତ ଥିଲା। ବ୍ଲକ୍ କରାଯାଇଥିବା ଆକାଉଣ୍ଟ ମଧ୍ୟରେ ଚାଷୀ ଏକତା ମୋର୍ଚ୍ଚା, ଦ କାରବାନ୍, ମାନିକ ଗୋୟଲ, Tractor2twitr ଓ jatt_junction ଭଳି ଆକାଉଣ୍ଟ ସାମିଲ୍ ଅଛି।
ସୂଚନାଯୋଗ୍ୟ, ଗାଜିପୁର, ଟିକ୍ରୀ ଓ ସିଂଘୁ ବର୍ଡର ଏବଂ ଏହାର ଆଖପାଖ ଅଞ୍ଚଳରେ କିଛି ଦିନ ପାଇଁ ଇଣ୍ଟରନେଟ୍ ସେବା ବନ୍ଦ କରିଦିଆଯାଇଥିଲା। ଯାହାକୁ ନେଇ ଖୁବ୍ ବିରୋଧ ଦେଖା ଦେଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
