ବିବାହ ପାଇଁ ୫୦, ଶବ ସଂସ୍କାର ପାଇଁ ୨୦ ଜଣଙ୍କୁ ଅନୁମତି, ଜାଣନ୍ତୁ କ’ଣ ବନ୍ଦ ରହିବ

କୋଲକାତା: ପୁଣି କାୟା ମେଲାଇଲାଣି କରୋନା। ରବିବାର କୋଭିଡ କଟକଣାକୁ କଡ଼ାକଡ଼ି କରିଛି ପଶ୍ଚିମବଙ୍ଗ। କରୋନାକୁ ପ୍ରତିରୋଧ ପାଇଁ ଆବଶ୍ୟକ ନୀତିନିୟମକୁ ପଶ୍ଚିମବଙ୍ଗ ସରକାର ପୁନର୍ବାର ଲାଗୁ କରିଛନ୍ତି। ମାମଲାର ଗମ୍ଭୀରତାକୁ ଅନୁଧ୍ୟାନ କରି ରାଜ୍ୟରେ ସ୍କୁଲ କଲେଜ ବନ୍ଦ କରି ଦିଆଯାଇଛି। ସରକାରୀ ଓ ବେସରକାରୀ କାର୍ଯ୍ୟାଳୟରେ ୫୦ ପ୍ରତିଶତ  କର୍ମଚାରୀଙ୍କୁ ନେଇ କାମ କରିବାକୁ କୁହାଯାଇଛି। ରାତି ୧୦ଟାରୁ ସକାଳ ୫ଟା ପର୍ଯ୍ୟନ୍ତ ନାଇଟ୍ କର୍ଫ୍ୟୁ ଲାଗୁ କରାଯାଇଛି। ହରିୟାଣା , ଉତ୍ତରପ୍ରଦେଶ ଓ ଦିଲ୍ଲୀରେ ମଧ୍ୟ ସମାନ ନିମୟ ଲାଗୁ କରାଯାଇଛି। ରାତି ବଳେ କେବଳ ଜରୁରୀକାଳୀନ ସେବାକୁ  ଅନୁମତି ଦିଆଯାଇଛି।  ପଶ୍ଚିମବଙ୍ଗରେ ଆସନ୍ତା କାଲି ତଥା ସୋମବାରଠାରୁ ସ୍କୁଲ, କଲେଜ ଓ ବିଶ୍ୱବିଦ୍ୟାଳୟକୁ ବନ୍ଦ କରି ଦିଆଯାଇଛି। ସେହିପରି ସୁଇମିଂ ପୁଲ୍, ଜିମ୍, ସ୍ପା ଏବଂ ବିୟୁଟି ସେଲୁନ୍ ଏବଂ ଫିଟନେସ୍‌ ସେଣ୍ଟର ମଧ୍ୟ ବନ୍ଦ ରହିବ ।

ବେଙ୍ଗଲ ମୁଖ୍ୟଶାସନ ସଚିବ ଏଚ୍.କେ ଦ୍ୱିବେଦୀ କହିଛନ୍ତି ଯେ, ସରକାରୀ ଏବଂ ବେସରକାରୀ କାର୍ଯ୍ୟାଳୟଗୁଡିକ ୫୦ ପ୍ରତିଶତ କ୍ଷମତାରେ କାର୍ଯ୍ୟ କରିପାରିବେ। ସେହିପରି ସବୁ ପ୍ରଶାସନକି ବୈଠକ ଭର୍ଚୁଆଲ କରାଯିବ। ଯଥା ସମ୍ଭବ ୱାର୍କ ଫ୍ରମ ହୋମ ଉପରେ ଗୁରୁତ୍ୱ ଦେବାକୁ କୁହାଯାଇଛି। ସେହିପରି ୫୦ ପ୍ରତିଶତ କ୍ଷମତାରେ କୋଲକାତା ମେଟ୍ରୋ ଟ୍ରେନ୍‌ ଚାଲିବ। ଲୋକାଲ ଟ୍ରେନ୍ କେବଳ ସନ୍ଧ୍ୟା ୭ଟା ପର୍ଯ୍ୟନ୍ତ ଚାଲିବ। ତେବେ ଦୂରଗାମି ଟ୍ରେନ୍‌ ଗୁଡ଼ିକର ଚଳାଚଳ ସ୍ୱାଭାବିକ୍ ରହିବ। ସିନେମା ହଲ୍, ରେଷ୍ଟୁରାଣ୍ଟ ଏବଂ ବାର୍ ୫୦ ପ୍ରତିଶତ କ୍ଷମତା ଏବଂ ରାତି ୧୦ ଟା ପର୍ଯ୍ୟନ୍ତ ଚାଲିବାକୁ ଅନୁମତି ଦିଆଯାଇଛି। ସପିଂ ମଲ୍ ସକାଳ ୧୦ ଟାରୁ ୫ ଟା ପର୍ଯ୍ୟନ୍ତ ଖୋଲା ରହିବ। କିନ୍ତୁ ଭିଡ଼ ୫୦ ପ୍ରତିଶତରେ ରହିବା ଜରୁରୀ।  ବିବାହ ତଥା ଅନ୍ୟାନ୍ୟ ସାମାଜିକ, ଧାର୍ମିକ ଏବଂ ସାଂସ୍କୃତିକ ଉତ୍ସବ ପାଇଁ ୫୦ ଜଣ ଏବଂ ଅନ୍ତିମ ସଂସ୍କାର ପାଇଁ ୨୦ଜଣଙ୍କ ମଧ୍ୟରେ ସୀମିତ ରହିବ।

ସୂଚନା ଅନୁଯାୟୀ, ଗତକାଲି ରାଜ୍ୟରେ ୪୫୧୨ଟି ନୂଆ କୋଭିଡ୍‌ ମାମଲା ରିପୋର୍ଟ ହୋଇଛି। ଏଥିସହ କୋଭିଡ୍‌ କେସ ଲୋଡ଼ ୧୩,୩୦୦ଛୁଇଁଛି। ଯାହାକି କୋଭିଡ୍‌ ମାମଲାରେ ମହାରାଷ୍ଟ୍ର ଏବଂ କେରଳ ପରେ ଦେଶର ତୃତୀୟ ସର୍ବାଧିକ ରାଜ୍ୟ ଭାବେ ପଶ୍ଚିମବଙ୍ଗ ଉଭା ହୋଇଛି। ସେହିପରି ବେଙ୍ଗଲରେ ୨୦ଟି  ଓମିକ୍ରନ୍ ମାମଲା ରେକର୍ଡ଼ କରାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।