ନୂଆଦିଲ୍ଲୀ: ସାରା ଦେଶରେ ଏବେ ଡେଲଟା ଭାରିଆଣ୍ଟ ସଂକ୍ରମଣ ଚିନ୍ତାର କାରଣ ପାଲଟିଛି। ଏଯାବତ ୫୧ରୁ ଅଧିକ ଏହି ଭାରିଆଣ୍ଟରେ ସଂକ୍ରମଣ ହୋଇଛନ୍ତି। ସର୍ବାଧିକ ସଂକ୍ରମିତ ମହାରାଷ୍ଟ୍ରରୁ ରହିଛନ୍ତି। ଏହାରି ଭିତରେ କୋଭିଡ ବାବଦରେ ଗବେଷଣା କରିବା ପାଇଁ କେନ୍ଦ୍ର ସରକାରଙ୍କ ଦ୍ୱାରା ଗଠିତ ନ୍ୟାସନାଲ ଟେକ୍ନିକାଲ ଆଡଭାଇଜରି ଗ୍ରୁପ ଅନ୍ ଇମ୍ୟୁନିଜେସନର ମୁଖ୍ୟ ଡାକ୍ତର ଏନକେ ଆରୋରା କହିଛନ୍ତି ଏହି ଡେଲଟା ପ୍ଲସ ଭାରିଆଣ୍ଟ ମଣିଷର ଫୁସଫୁସକୁ ଅଧିକ ସଂକ୍ରମଣ କରୁଛି। କୋଭିଡର ଅନ୍ୟ ମ୍ୟୁଟାଣ୍ଟ ତୁଳନାରେ ଏହି ଡେଲଟା ପ୍ଲସ ଭାରିଆଣ୍ଟ ଫୁସଫୁସରେ ଥିବା ମ୍ୟୁକୋସାଲ ଲିନିଂକୁ ଅଧିକ ସଂକ୍ରମଣ କରୁଛି।
ସେ କହିଛନ୍ତି, ଯଦିଓ ଏହା ଫୁସଫୁସରେ ଥିବା ମ୍ୟୁକୋସାଲ ଲିନିଂକୁ ସଂକ୍ରମଣ କରୁଛି କିନ୍ତୁ ଏହା କେତେ ମାରାତ୍ମକ ବା ଏହା କେତେ ମାତ୍ରାରେ ଜଣଙ୍କୁ ପ୍ରଭାବିତ କରିବ, ଅନ୍ୟ ଜଣଙ୍କୁ ସଂକ୍ରମଣ କରିପାରିବ ସେ ବାବଦରେ ଏବେ କିଛି କହିହେବନି। ଖବର ସରବରାହ ସଂସ୍ଥା ପିଟିଆଇକୁ ପ୍ରତିକ୍ରିୟା ଦେଇ ସେ କିନ୍ତୁ ସ୍ପଷ୍ଟ କରିଛନ୍ତି ଯଦି ଜଣେ ଟିକାର ଗୋଟିଏ ଡୋଜ କିମ୍ୱା ଦୁଇଟି ଯାକ ନେଇଥିବେ ସେମାନଙ୍କ ପାଖରେ ଏହି ସଂକ୍ରମଣ ଏତେଟା ଗୁରୁତର ହେବନି। ଏମିତିକି ଏହି ଡେଲଟା ପ୍ଲସ ଜଣଙ୍କୁ ସଂକ୍ରମିତ ହୋଇଥିଲେ ବି ତାଙ୍କ ପାଖରେ କୌଣସି ଲକ୍ଷଣ ଦେଖିବାକୁ ନମିଳିପାରେ।
ଏହି ଭାରିଆଣ୍ଟ ବାବଦରେ ଅଧିକରୁ ଅଧିକ ଆଗାମୀ ଦିନରେ ଗବେଷଣା କରିବାର ଆବଶ୍ୟକ ରହିଛି ବୋଲି ସେ କହିଛନ୍ତି। କିନ୍ତୁ ଜେନମ ସିକ୍ୱେନ୍ସର ଧାରା ଅବ୍ୟାହତ ରହିଥିବାରୁ ଠିକ୍ ସମୟରେ ଏହି ଭାରିଆଣ୍ଟ ଚିହ୍ନଟ ହୋଇପାରିଛି। କହିବାକୁ ଗଲେ ବହୁ ପୂର୍ବରୁ ଏହି ଭାରିଆଣ୍ଟ ଚିହ୍ନଟ ହୋଇଛି। ତେଣୁ ସମସ୍ତେ ସତର୍କ ହୋଇପାରିଛନ୍ତି ବୋଲି ସେ କହିଛନ୍ତି।
ସୂଚନାଯୋଗ୍ୟ, ଆଜି ସାରା ଦେଶରେ ୪ ଜଣ ଡେଲଟା ପ୍ଲସ ଭାରିଆଣ୍ଟରେ ଚିହ୍ନଟ ହୋଇଛନ୍ତି। ସର୍ବାଧିକ ସଂକ୍ରମିତ ମହାରାଷ୍ଟ୍ରରୁ ରହିଛନ୍ତି। ଏହି ସଂକ୍ରମଣରେ ପ୍ରଥମ ମୃତ୍ୟୁ ମଧ୍ୟପ୍ରଦେଶର ଉଜ୍ଜୈନରୁ ହୋଇଛି। ଏହାପରେ କେନ୍ଦ୍ର ସରକାର ରାଜ୍ୟ ସରକାରଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ଆବଶ୍ୟକ ସ୍ଥଳରେ ମାଇକ୍ରୋ କଣ୍ଟେନମେଣ୍ଟ ଜୋନ ଘୋଷଣା କରିବାକୁ କେନ୍ଦ୍ର ସରକାର ରାଜ୍ୟ ସରକାରକୁ ପରାମର୍ଶ ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
