ମୁମ୍ବାଇ: ହୋମଗାର୍ଡ ଡିଜି ପଦରୁ ପରମ ବୀର ସିଂଙ୍କୁ ନିଲମ୍ବିତ କରିଛନ୍ତି ମହାରାଷ୍ଟ୍ର ସରକାର। ଡ୍ୟୁଟିରେ ଅନଧିକୃତ ଅନୁପସ୍ଥିତି ସହ ବିଭିନ୍ନ ଅନିୟମିତତା ନେଇ ସରକାର ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ତେବେ ସରକାରୀ ଆଦେଶ ଅନୁଯାୟୀ, ନିଲମ୍ବନ ସମୟରେ ସିଂଙ୍କୁ ଅଲ ଇଣ୍ଡିଆ ସର୍ଭିସେସ୍ ନିୟମ ଅନୁଯାୟୀ ଡିଏ ସହ ଅନ୍ୟାନ୍ୟ ଭତ୍ତା ପ୍ରଦାନ କରାଯିବ।
ମୁମ୍ବାଇର ପୂର୍ବତନ ପୁଲିସ କମିଶନର ପରମ ବୀର୍ ସିଂଙ୍କ ବିରୋଧରେ ଆଇଏଏସ୍ ଅଧିକାରୀ ଦେବାଶିଷ ଚକ୍ରବର୍ତ୍ତୀଙ୍କ ରିପୋର୍ଟକୁ ଗ୍ରହଣ କରିଛନ୍ତି ମହାରାଷ୍ଟ୍ର ସରକାର । ଅଲ ଇଣ୍ଡିଆ ସିଭିଲ ସର୍ଭିସ ନିୟମ ଉଲ୍ଲଂଘନ ନେଇ ପରମ ବୀର ସିଂଙ୍କ ବିରୋଧରେ ଦେବାଶିଷ ତଦନ୍ତ କରିଥିଲେ। ସେହିପରି ମହାରାଷ୍ଟ୍ର ଗୃହ ବିଭାଗ ମଧ୍ୟ ପ୍ରଶାସନିକ ତ୍ରୁଟି ପାଇଁ ପରମ ବୀର ସିଂଙ୍କ ବିରୋଧରେ ବିଭାଗୀୟ ତଦନ୍ତ କରିଥିଲେ। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସୂଚନାନୁସାରେ, ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଆଜି ସସପେନ୍ସ ଫାଇଲରେ ଦସ୍ତଖତ କରିଛନ୍ତି ।ଏହାପୂର୍ବରୁ ମହାରାଷ୍ଟ୍ର ଗୃହମନ୍ତ୍ରୀ ଦିଲୀପ ୱାଲସେ-ପାଟିଲ ଖୁବ୍ ଶୀଘ୍ର ପରମ ବୀର ସିଂଙ୍କୁ ନିଲମ୍ବିତ କରାଯିବ ବୋଲି କହିଥିଲେ।
ଉଲ୍ଲେଖଯୋଗ୍ୟ, ଗତ ଜୁନ୍ ମାସରେ ମହାରାଷ୍ଟ୍ର ସରକାର ଅତିରିକ୍ତ ମୁଖ୍ୟ ସଚିବ (ଯୋଜନା) ଦେବାଶିଷ ଚକ୍ରବର୍ତ୍ତୀଙ୍କୁ ଅଖିଳ ଭାରତୀୟ ସିଭିଲ୍ ସର୍ଭିସ୍ ନିୟମ ଉଲ୍ଲଂଘନ ଅଭିଯୋଗରେ ପରମ ବୀର ସିଂଙ୍କ ବିରୋଧରେ ତଦନ୍ତ କରିବାକୁ କହିଥିଲେ। ଅକ୍ଟୋବରରେ, ଦେବାଶିଷ ଚକ୍ରବର୍ତ୍ତୀ ପରମ ବୀର ସିଂଙ୍କ ବିରୋଧରେ ବିଭାଗୀୟ ତଦନ୍ତ ପାଇଁ ସୁପାରିଶ କରି ଏକ ପ୍ରତିକୂଳ ରିପୋର୍ଟ ଦାଖଲ କରିଥିଲେ। ଚକ୍ରବର୍ତ୍ତୀ ପୂର୍ବରୁ ହୋଇଥିବା ପ୍ରସଙ୍ଗରେ ବରଖାସ୍ତ ହୋଇଥିବା ପୁଲିସ ଅଧିକାରୀ ସଚିନ ୱାଜେଙ୍କ ପୁନଃସ୍ଥାପନ, ଅନିଲ ଦେଶମୁଖଙ୍କ ବିରୋଧରେ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ସିଂଙ୍କ ଚିଠି ଏବଂ ଆଣ୍ଟିଲିଆ ବୋମା ଭୟ ମାମଲାରେ ପୁଲିସ ମୁଖ୍ୟ ଭାବରେ ନିଜର କର୍ତ୍ତବ୍ୟ ପାଳନ କରିବାରେ ସିଂଙ୍କ ଦ୍ୱାରା ଗୁରୁତର ତ୍ରୁଟି ଦର୍ଶାଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
