ଜାମିନ୍ ଶୁଣାଣି ପୂର୍ବରୁ ବଢ଼ିଲା ଆର୍ଯ୍ୟନଙ୍କ ମୁସ୍କିଲ୍‌; ଜଣେ ଅଭିନେତ୍ରୀଙ୍କ ସହିତ ଡ୍ରଗ୍ସ ବିଷୟରେ ହୋଇଥିଲେ କଥାବାର୍ତ୍ତା

ମୁମ୍ବାଇ: ଡ୍ରଗ୍ସ ମାମଲାରେ ଜେଲ୍‌ରେ ଥିବା ବଲିଉଡ୍‌ ଷ୍ଟାର ଶାହରୁଖ ଖାଁଙ୍କ ପୁଅ ଆର୍ଯ୍ୟନଙ୍କ ଅଡ଼ୁଆ ବଢ଼ିଛି। ଆଜି ତାଙ୍କର ଜାମିନ୍ ଶୁଣାଣି ହେବାକୁ ଥିବା ବେଳେ ତା’ପୂର୍ବରୁ କୋର୍ଟରେ ତାଙ୍କ ବିରୋଧରେ ଆଉ କିଛି ତଥ୍ୟ ଦାଖଲ କରିଛି ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନ୍‌ସିବି)। ଅକ୍ଟୋବର ୨ରେ କ୍ରୁଜ୍ ପାର୍ଟି ବେଳେ ସେ ବଲିଉଡ୍‌ର ଜଣେ ଅପ୍‌କମିଂ ଅଭିନେତ୍ରୀଙ୍କ ସହିତ ଡ୍ରଗ୍ସ ବିଷୟରେ କଥାବାର୍ତ୍ତା ହୋଇଥିଲେ। ସେମାନଙ୍କ ମଧ୍ୟରେ ଡ୍ରଗ୍ସ ନେଇ ହୋଇଥିବା ଚାଟ୍ ମେସେଜ୍‌ ଗୁଡ଼ିକୁ ଏନ୍‌ସିବି କୋର୍ଟରେ ଦାଖଲ କରିଥିବା କିଛି ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି।

ଏହି ଖବର ଅନୁଯାୟୀ, ଆର୍ଯ୍ୟନ ଓ ଉକ୍ତ ଅଭିନେତ୍ରୀଙ୍କ ମଧ୍ୟରେ ଡ୍ରଗ୍ସକୁ ନେଇ କଥାବାର୍ତ୍ତା ହୋଇଥିଲା। ପୂର୍ବ ଶୁଣାଣି ବେଳେ ଏନ୍‌ସିବି ପକ୍ଷରୁ ସେମାନଙ୍କ ମଧ୍ୟରେ ଆଦାନପ୍ରଦାନ ହୋଇଥିବା ଚାଟ୍ ମେସେଜ୍ ଗୁଡ଼ିକୁ କୋର୍ଟରେ ଦାଖଲ କରାଯାଇଥିଲା। ଏହା ସହିତ କିଛି ଡ୍ରଗ୍ସ ବିକ୍ରେତାଙ୍କ ସହିତ ଆର୍ଯ୍ୟନଙ୍କର ହୋଇଥିବା ଚାଟ୍ ମେସେଜ୍‌କୁ ମଧ୍ୟ କୋର୍ଟରେ ଦାଖଲ କରିଥିଲା ଏନ୍‌ସିବି। ତେବେ ବଲିଉଡ୍‌ର ଏହି ଅପ୍‌କମିଂ ଅଭିନେତ୍ରୀ ଜଣଙ୍କ କିଏ, ସେ ନେଇ କିଛି ସୂଚନା ମିଳିନାହିଁ।

ଆଜି ମୁମ୍ବାଇର ଏକ ସ୍ୱତନ୍ତ୍ର କୋର୍ଟରେ ଆର୍ଯ୍ୟନଙ୍କ ଜାମିନ ଆବେଦନ ଉପରେ ଶୁଣାଣି ହେବ। ଅକ୍ଟୋବର ୨ରେ ମୁମ୍ବାଇରେ କ୍ରୁଜ୍‌ ପାର୍ଟିରେ ଚଢ଼ାଉ ପରେ ଆର୍ଯ୍ୟନଙ୍କ ସମେତ ୮ ଜଣଙ୍କୁ ଗିରଫ କରିଛି ଏନ୍‌ସିବି। ସେମାନଙ୍କ ମଧ୍ୟରେ ୨ ଜଣ ମହିଳା ଅଛନ୍ତି। ଆର୍ଯ୍ୟନଙ୍କୁ ଆର୍ଥର ରୋଡ୍ ଜେଲ୍‌ରେ ରଖାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।