୧ ତାରିଖରୁ ଟ୍ରାକ୍‌ରେ ଦୌଡ଼ିବ ଲୋକାଲ ଟ୍ରେନ୍‌

ମୁମ୍ବାଇ: ମହମାରୀ କରୋନା ଯୋଗୁ ବନ୍ଦ ରହିଥିବା ଲୋକାଲ ଟ୍ରେନ ସେବା ପୁଣିଥରେ ଦେଶରେ ଆରମ୍ଭ ହେବ। ଆସନ୍ତା ୧ ତାରିଖରୁ ମୁମ୍ବାଇର ଲାଇଫ ଲାଇନ କୁହାଯାଉଥିବା ଲୋକାଲ ଟ୍ରେନ୍‌ ଟ୍ରାକ୍‌ରେ ଦୌଡ଼ିବା ଆରମ୍ଭ କରିବ। ଆଜି ସକାଳେ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଅଫିସ ପକ୍ଷରୁ ମୁମ୍ବାଇରେ ପର୍ଯ୍ୟାୟକ୍ରମେ ଲୋକାଲ ଟ୍ରେନ ସେବା ଆରମ୍ଭ କରାଯିବ ବୋଲି ସୂଚନା ଦିଆଯାଇଛି।

ସରକାରଙ୍କ ନିଷ୍ପତ୍ତି ଅନୁଯାୟୀ, ସୋମବାର ଠାରୁ ପ୍ରଥମ ଟ୍ରେନ ସେବା ସକାଳ ୭ଟା ଯାଏ, ଏହାପରେ ମଧ୍ୟାହ୍ନରୁ ଅପରାହ୍ନ ୪ଟା ଓ ରାତି ୯ଟାରୁ ଦିବସର ଶେଷ ଟ୍ରେନ ଯାଏ ସେବା ଆରମ୍ଭ ହେବ। ଏହି ସମୟରେ ସାଧାରଣ ଲୋକ ଟ୍ରେନରେ ଯିବା ଆସିବା କରିପାରିବେ। ବାକି ସମୟରେ ଟ୍ରେନ ଚାଲିବ। ହେଲେ ଏହାକୁ କେବଳ ଜରୁରୀ କାଳୀନ ସେବାରେ ନିୟୋଜିତ ଲୋକମାନେ ବ୍ୟବହାର କରିପାରିବେ।

ଏବେ ମୁମ୍ବାଇରେ କେବଳ ମହିଳା ଓ ଜରୁରୀ ସେବାରେ ନିୟୋଜ କର୍ମଚାରୀମାନେ ସ୍ୱତନ୍ତ୍ର ପାସ୍‌ ନେଇ ଲୋକାଲ ଟ୍ରେନରେ ଯିବା ଆସିବା କରୁଛନ୍ତି। ସାଧାରଣ ଲୋକଙ୍କ ପାଇଁ ଟ୍ରେନ୍‌ ସେବାକୁ ବନ୍ଦ ରଖାଯାଇଥିଲା।

ଏବେ ମହାରାଷ୍ଟ୍ରରେ କରୋନା ସଂକ୍ରମଣ ହାର କମିଥିବାରୁ ଲୋକାଲ ଟ୍ରେନ ଚଳାଚଳ କରିବାକୁ ସରକାର ନିଷ୍ପତ୍ତି ନେଇଛନ୍ତି। ଟ୍ରେନ ଚାଲିବାକୁ ଥିଲେ ହେଁ ସମସ୍ତେ ମାସ୍କ ପିନ୍ଧିବେ ଓ ସାନିଟାଇଜର ମଧ୍ୟ ବ୍ୟବହାର କରିବେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।