ନୂଆଦିଲ୍ଲୀ: ଭାରତରତ୍ନ ଅଟଳ ବିହାରୀ ବାଜପେୟୀଙ୍କର ଆଜି ପ୍ରଥମ ଶ୍ରାଦ୍ଧ ବାର୍ଷିକୀ। ଏହି ଅବସରରେ ତାଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହ, ବିଜେପି କାର୍ଯ୍ୟକାରିଣୀ ସଭାପତି ଜେପି ନଡ୍ଡାଙ୍କ ସମେତ ଅନେକ ବିଜେପି ନେତା।
ଆଜି ସକାଳେ ସ୍ୱର୍ଗତ ବାଜପେୟୀଙ୍କ ସ୍ମାରକୀ 'ସଦୈବ ଅଟଳ' ନିକଟକୁ ଯାଇଥିଲେ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ଅନ୍ୟାନ୍ୟ ନେତା। ଏହି ସମୟରେ ବାଜପେୟୀଙ୍କ ପୋଷ୍ୟ ଝିଅ ନମିତା କୌଲ ଭଟ୍ଟଚାର୍ଯ୍ୟ ଏବଂ ନାତୁଣୀ ନିହାରିକା ଉପସ୍ଥିତ ଥିଲେ।
ଗତବର୍ଷ ଅଗଷ୍ଟ ୧୬ର ବାଜପେୟୀଙ୍କ ଦେହାନ୍ତ ହୋଇଥିଲା। ସେ ଦୀର୍ଘ ଦିନ ଧରି ଅସୁସ୍ଥ ଥିଲେ ଏହାପରେ ଏମ୍ସ ହସ୍ପିଟାଲରେ ଚିକିତ୍ସିତ ହେଉଥିବା ସମୟରେ ତାଙ୍କର ଦେହାନ୍ତ ହୋଇଥିଲା।
ବିଜେପି ଦଳକୁ ଗଢ଼ିବାରେ ଯେଉଁ କିଛି ବ୍ୟକ୍ତିଙ୍କ ଅବଦାନ ରହିଛି ସେମାନଙ୍କ ମଧ୍ୟରେ ବାଜପେୟୀ ଥିଲେ ଅଗ୍ରଗଣ୍ୟ। ତାଙ୍କ ନେତୃତ୍ୱରେ ଏନଡିଏ ଗଢ଼ି ଉଠିଥିଲା। ସେ ଥିଲେ ବିଜେପିର ପ୍ରଥମ ପ୍ରଧାନମନ୍ତ୍ରୀ। ସେ ୧୯୯୬ରେ ଏବଂ ୧୯୯୮ରୁ ୨୦୦୪ ମଧ୍ୟରେ ଲଗାତର ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ହୋଇଥିଲେ।
ବାଜପେୟୀଙ୍କର ଜନ୍ମଦିନ ଡିସେମ୍ୱର ୨୫। ତାଙ୍କ ଜନ୍ମଦିନକୁ ଦେଶରେ ଗୁଡ ଗଭର୍ଣ୍ଣାନ୍ସ ଦିବସ ଭାବେ ପାଳନ କରାଯାଏ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
