ପଙ୍ଗପାଳ ଆକ୍ରମଣକୁ ଜାତୀୟ ବିପତ୍ତି ଘୋଷଣା କରିବାକୁ କହିଲେ ମନ୍ତ୍ରୀ

ଜୟପୁର: ଦେଶର କିଛି ରାଜ୍ୟରେ ଲକ୍ଷ ଲକ୍ଷ ପଙ୍ଗପାଳ ଏକର ଏକର ଫସଲ ଖାଇ ଯାଉଛନ୍ତି। ଏଥିଯୋଗୁ ଚାଷୀମାନଙ୍କର ବ୍ୟାପକ କ୍ଷତି ହୋଇଛି। ଏହାକୁ ଦୃଷ୍ଟିରେ ରଖି ରାଜସ୍ଥାନର କୃଷି ମନ୍ତ୍ରୀ ଲାଲଚାନ୍ଦ କଟାରିଆ ପଙ୍ଗପାଳ ଆକ୍ରମଣକୁ ଜାତୀୟ ବିପତ୍ତି ଘୋଷଣା ପାଇଁ ଦାବି ଜଣାଇଛନ୍ତି। କେନ୍ଦ୍ର ସରକାର ତୁରନ୍ତ ଏନେଇ ନିଷ୍ପତ୍ତି ନିଅନ୍ତୁ ବୋଲି ସେ କହିଛନ୍ତି।

ଏଥିସହ ଯଥାଶୀଘ୍ର କେନ୍ଦ୍ରୀୟ ଯୋଜନାଗୁଡ଼ିକର ପ୍ରଥମ ଇନଷ୍ଟଲମେଣ୍ଟ ପାଉଣା ଦେବାକୁ ସେ କେନ୍ଦ୍ର ସରକାରଙ୍କୁ ନିବେଦନ କରିଛନ୍ତି। ଏ ନେଇ ଶ୍ରୀ କଟାରିଆ ଭିଡିଓ କନ୍ଫରେନ୍ସଂ ଜରିଆରେ କେନ୍ଦ୍ର କୃଷିମନ୍ତ୍ରୀଙ୍କ ସହ କଥା ହୋଇଛନ୍ତି।

ଶ୍ରୀ କଟାରିଆଙ୍କ ବ୍ୟତୀତ ନାଗାଉର ସାଂସଦ ତଥା ରାଷ୍ଟ୍ରୀୟ ଲୋକ ତାନ୍ତ୍ରିକ ଦଳର ଆବାହକ ହନୁମାନ ବେନୁୱାଲ ପଙ୍ଗପାଳ ହମଲାକୁ ଜାତୀୟ ବିପତ୍ତି ଘୋଷଣା କରିବାଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିକୁ ଚିଠି ଲେଖିଛନ୍ତି।

ଖରିଫ ଋତୁ ୨୦୧୯ରେ କୃଷି ବୀମା କମ୍ପାନୀର ବାକି ଥିବା ୩୮୦ କୋଟି ଟଙ୍କା ଶୀଘ୍ର ଚାଷୀଙ୍କୁ ଦେବା ଲାଗି ଶ୍ରୀ କଟାରିଆ ନିର୍ଦ୍ଦେଶ ଦେଇଛନ୍ତି ।

କଟାରିଆ କହିଛନ୍ତି ଯେ ଚାଷୀଙ୍କ ପାଇଁ କେନ୍ଦ୍ର ସରକାର ଏକାଧିକ ଯୋଜନା କରିଛନ୍ତି। ହେଲେ ଅଧିକାଂଶ ଯୋଜନାର ଇନଷ୍ଟଲମେଣ୍ଟ ଏଯାଏ ରାଜ୍ୟ ପାଖକୁ ଆସିନାହିଁ। ତେଣୁ ଚାଷୀଙ୍କ ସ୍ୱାର୍ଥକୁ ଦୃଷ୍ଟିରେ ରଖି କେନ୍ଦ୍ର ସରକାର ତୁରନ୍ତ ଅର୍ଥ ମଞ୍ଜୁର କରନ୍ତୁ ବୋଲି ସେ କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।