ଟୋକିଓ: କୋରାନା ଭୟରେ ଜାପାନର ୟୋକୋହାମ ବନ୍ଦରରେ ସମସ୍ତଙ୍କ ଠାରୁ ଅଲଗା ହୋଇ ରହିଥିବା ଜାହାଜରେ ଆଜି ଦୁଇ ଜଣଙ୍କ ମୃତ୍ୟୁ ଘଟିଛି। ଡାଇମଣ୍ଡ ପ୍ରିନ୍ସସେସ ନାମକ ଏହି ଜାହାଜରେ ୧୬୦ ଭାରତୀୟଙ୍କ ସମେତ ୩୭ ଶହରୁ ଅଧିକ ଯାତ୍ରୀ ଓ କ୍ରୁ ସଦସ୍ୟ ରହିଛନ୍ତି। ଏମାନଙ୍କୁ ଦୀର୍ଘ ଦିନ ହେଲା ଏଠାରେ ସମସ୍ତଙ୍କ ଠାରୁ ଅଲଗା କରି ରଖାଯାଇଥିଲା।
ସମୟକ୍ରମେ ଏଠାରୁ ଲୋକଙ୍କୁ ପରୀକ୍ଷା ନୀରାକ୍ଷା କରି ଛଡ଼ା ଯାଉଛି। ବର୍ତ୍ତମାନ ସୁଦ୍ଧା ୭ ଭାରତୀୟଙ୍କ ସମେତ ୬ ଶହରୁ ଅଧିକ ଲୋକ କରୋନା ଭାଇରସରେ ଆକ୍ରାନ୍ତ ଥିବା ଜଣାପଡ଼ିଥିଲା। ହେଲେ ଏବେ ଜାହାଜରେ ଥିବା ଜଣେ ୮୭ ବର୍ଷୀୟ ବୃଦ୍ଧ ଓ ୮୪ ବର୍ଷୀୟ ବୃଦ୍ଧା କରୋନାରେ ଆକ୍ରାନ୍ତ ହୋଇ ପ୍ରାଣ ହରାଇଛନ୍ତି।
ଏମାନେ କରୋନାରେ ଆକ୍ରାନ୍ତ ଥିବାରୁ ବୃଦ୍ଧଙ୍କୁ ଫେବୃଆରୀ ୧୧ ଓ ବୃଦ୍ଧାଙ୍କୁ ୧୨ ତାରିଖରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ଏବେ ଉଭୟଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ଜାହାଜରେ ଥିବା ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।