ନୂଆଦିଲ୍ଲୀ: କରୋନା ପାଇଁ ଆବଶ୍ୟକ ଆଣ୍ଟି ବଡି ବେସଡ୍ ରାପିଡ ଟେଷ୍ଟ କିଟ(ଆରଟିକେ) ନିଜ ଦେଶରେ ନିର୍ମାଣ କରିବାକୁ ଭାରତ ସରକାର ନିଷ୍ପତ୍ତି ନେଇଛନ୍ତି। ଏଥିପାଇଁ ଦେଶର ଥିବା ୩ଟି ଉତ୍ପାଦନ କମ୍ପାନୀ ମଧ୍ୟରୁ ୨ଟି ଏହାକୁ ତିଆରି ପ୍ରକ୍ରିୟା ମଧ୍ୟ ଆରମ୍ଭ କରିଦେଇଛନ୍ତି। କେନ୍ଦ୍ରୀୟ ଡ୍ରଗ୍ସ ଷ୍ଟାଣ୍ଡାର୍ଡ କଣ୍ଟ୍ରୋଲ ସଂଗଠନ(ସିଡିଏସ୍ସିଓ)ର ନିର୍ଦ୍ଦେଶକ୍ରମେ ୩ଟି ଭାରତୀୟ କମ୍ପାନୀକୁ ଆରଟିକେ ତିଆରି କରିବାକୁ ଲାଇସେନ୍ସ ପ୍ରଦାନ କରାଯାଇଛି।
ଭାରତ ସରକାର ଦେଶରେ କରୋନାର ରାପିଡ ଟେଷ୍ଟ କରିବାକୁ ଚାହୁଁଛନ୍ତି। ଏଥିପାଇଁ ସରକାର ଚାଇନାଠାରୁ ଆରଟିକେ ଆଣିବାକୁ ଅର୍ଡର ଦେଇଥିଲେ। ଚାଇନା ପ୍ରଥମେ ଏପ୍ରିଲ ୫ ଓ ପରେ ଏପ୍ରିଲ ୯ରେ ଏହାକୁ ଦେବ ବୋଲି କହିଥିଲା। ହେଲେ ଏଯାଏ ଏହା ଭାରତରେ ପହଞ୍ଚି ନଥିବାରୁ ସରକାର ନଜସ୍ୱ ପ୍ରଣାଳୀରେ ଏହି କିଟ୍ର ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି।
ଆଇସିଏମଆର କମ୍ପାନୀମାନଙ୍କୁ ଆରଟିକେ ନିର୍ମାଣ କରିବା ପାଇଁ ପ୍ରସ୍ତାବ ଦେଇଥିଲା। ଏହାପରେ ଦିଲ୍ଲୀର ଭାନଗାର୍ଡ ଡାଇଗ୍ନୋଷ୍ଟିକ, କେରଳର ଏଚଏଲଲଏ ଲାଇଫ କେୟାର ଲିଃ ଓ ଗୁଜରାଟର ଭୋକ୍ସଟୁର ବାଓ ଲିଃ ଲାଇସେନ୍ସ ପାଇଁ ଆବେଦନ କରିଥିଲେ। ଏମାନଙ୍କ ମଧ୍ୟରୁ ଏଚଏଲଏଲ ଓ ଭୋକ୍ସଟୁର ନିର୍ମାଣ କାମ ଆରମ୍ଭ କରିସାରିଛନ୍ତି।
ଏପ୍ରିଲ ୨୦ ସୁଦ୍ଧା ଏହି ଦୁଇ କମ୍ପାନୀ ୧ ଲକ୍ଷ ଆରଟିକେ ସରକାରଙ୍କୁ ଦେବେ। ଭାନଗାର୍ଡ ମଧ୍ୟ ୩ ସପ୍ତାହ ମଧ୍ୟରେ ଆରଟିକେର ନିର୍ମାଣ କାମ ଆରମ୍ଭ କରିବ। ବର୍ତ୍ତମାନ କରୋନା ଟେଷ୍ଟ ଆରଟି-ପିସିଆରରେ କରାଯାଉଛି। ଗୋଟିଏ ନମୁନା ପରୀକ୍ଷା ପାଇଁ ଏହି କିଟରେ ପ୍ରାୟ ୫ ଘଣ୍ଟା ସମୟ ଲାଗୁଛି।
ହେଲେ ଆରଟିକେରେ ଟେଷ୍ଟର ସମୟ ୩୦ ମିନିଟ ହୋଇଯିବ। ତେବେ ଆରଟିକେରେ ନେଗେଟିଭ ଆସୁଥିବା ନମୁନାଗୁଡ଼ିକୁ ଆଇସିଏମଆର ଆରଟି-ପିସିଆରରେ ପରୀକ୍ଷା କରି ନିଶ୍ଚିତ କରିବାରକୁ ଯୋଜନା ମଧ୍ୟ ରଖିଛି।
ଏଚଏଲଲ ଏକ ପବ୍ଲିକ ସେକ୍ଟର କମ୍ପାନୀ। ଏହି ସଂସ୍ଥା ନିରୋଧ ବ୍ରାଣ୍ଡର କଣ୍ଡୋମ ତିଆରି କରି ପରିଚୟ ଲାଭ କରିଥିଲା। ଏବେ ଏହା ଆରଟିକେ ନିର୍ମାଣ କାମ ହରିଆଣାର ମାନସେର ଠାରେ ଆରମ୍ଭ କରିଛି। ଏପ୍ରିଲ ୨୦ ସୁଦ୍ଧା ଏହି କମ୍ପାନୀ ୧ ଲକ୍ଷ ଆରଟିକେ ଦେବ ବୋଲି ଜଣାପଡ଼ିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
