ଭୁବନେଶ୍ୱର: ଭୁବନେଶ୍ୱର ଉପକଣ୍ଠ ଗଡ଼ଜଣ୍ଟୁଣିଆରେ ସୁଦର୍ଶନଙ୍କ ଦାରୁ ଛେଦନ ଲାଗି ଜୋରସୋରରେ ଆରମ୍ଭ ହୋଇଛି ପ୍ରସ୍ତୁତି ପର୍ବ । କାକଟପୁର ଦେଉଳୀ ମଠରେ ଅବସ୍ଥାନ କରୁଥିବା ଯାତ୍ରୀ ଆଜି ଅପରାହ୍ଣରେ ଏହିଠାରେ ପହଞ୍ଚିବାର କାର୍ଯ୍ୟକ୍ରମ ରହିଛି । ସେଦୃଷ୍ଟିରୁ ଶବରପଲ୍ଲୀର କାମ ଆଜି ଶେଷ ହେବ । ସେହିପରି ମହାଯଜ୍ଞ ପାଇଁ ମଣ୍ଡପ କାର୍ଯ୍ୟ ମଧ୍ୟ ଆଗେଇ ଚାଲିଛି । ଆସନ୍ତାକାଲି ବଢିଭୋରରୁ ଭୂମି ଓ ଦାରୁପୂଜାପରେ ଅଙ୍କୁରୋପଣ ଆଦି କାର୍ଯ୍ୟ କରାଯିବ । ତ’ପରଦିନ ଏହିଠାରେ ମହାଯଜ୍ଞ ଅନୁଷ୍ଠିତ ହେବ । ପୂର୍ଣ୍ଣାହୂତି ପରେ ଦାରୁ ଛେଦନ କାର୍ଯ୍ୟ କରାଯିବ । ସେପଟେ ଗଡ଼ଜଣ୍ଟୁଣିଆରେ ଗହଳିଚହଳି ଲାଗି ରହିଛି । ଶହ ଶହ ସଂଖ୍ୟାରେ ଭକ୍ତଙ୍କର ସମାଗମ ହେବା ସହ ପୂଜାର୍ଚ୍ଚନା ମଧ୍ୟ କରାଯାଉଛି । ଦାରୁର ସୁରକ୍ଷା ନିମନ୍ତେ ବହୁ ସଂଖ୍ୟାରେ ପୋଲିସ ମୁତୟନ କରାଯାଇଛି । ଅପରାହ୍ଣରେ ଦେଉଳିମଠରୁ ଦଇତାପତି, ଶ୍ରୋତିୟ ବ୍ରାହ୍ମଣ ଓ ବିଶ୍ୱାବସୁ ସେବାୟତମାନେ ଆସି ଏଠାରେ ପହଞ୍ଚିବାର କାର୍ଯ୍ୟକ୍ରମ ରହିଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।