ଖୋର୍ଦ୍ଧା-ବଲାଙ୍ଗିର ରେଳପଥରେ ଆଜି ଗଡିବ ପ୍ରଥମ ଟ୍ରେନ୍

ଖୋର୍ଦ୍ଧା: ଗୁରୁବାର ଖୋର୍ଦ୍ଧା-ବଲାଙ୍ଗିର ରେଳପଥରେ ଗଡିବ ପ୍ରଥମ ଟ୍ରେନ୍। ଏଥିପାଇଁ ଆଜି ଓଡ଼ିଶା ଆସୁଛନ୍ତି କେନ୍ଦ୍ର ରେଳ ମନ୍ତ୍ରୀ ସୁରେଶ ପ୍ରଭୁ। ଖୋର୍ଦ୍ଧାଠାରୁ ବେଗୁନିଆ ପର୍ଯ୍ୟନ୍ତ ରେଳଲାଇନ୍ ଖୋର୍ଦ୍ଧା ଓ ବେଗୁନିଆ ଷ୍ଟେସନ୍ ତଥା ପାସେଞ୍ଜର ଟ୍ରେନ୍ ଚଳାଚଳର ଶୁଭାରମ୍ଭ କରିବେ ରେଳମନ୍ତ୍ରୀ ଶ୍ରୀ ପ୍ରଭୁ। ୧୯୪୫ ମସିହାରେ ଏହି ରେଳପଥ ପାଇଁ ସର୍ଭେ ହୋଇଥଲା ଏବଂ ମଞ୍ଜୁର ହୋଇଥିଲା ୧୯୯୩ ମସିହାରେ। ୨୦୦୧ରୁ ଜମି ଅଧିଗ୍ରହଣ ଆରମ୍ଭ ହେବା ପରେ ୨୦୦୭ରୁ ଖୋର୍ଦ୍ଧା ପଟୁ ଆରମ୍ଭ ହୋଇଥିଲା ଖୋର୍ଦ୍ଧା-ବଲାଙ୍ଗିର ରେଳପଥର ନିର୍ମାଣ କାମ। ତେବେ ୨୮୯ କିଲୋମିଟର ଲମ୍ୱ ବିଶିଷ୍ଟ ଖୋର୍ଦ୍ଧା-ବଲାଙ୍ଗିର ରେଳପଥର ଖୋର୍ଦ୍ଧା ପଟୁ ବେଗୁନିଆ ଯାଏଁ ୩୨ କିଲୋମିଟର କାମ ସରିଛି। ତେଣୁ ବର୍ତ୍ତମାନ ପାଇଁ ଖୋର୍ଦ୍ଧାରୁ ବେଗୁନିଆ ପର୍ଯ୍ୟନ୍ତ ହିଁ ଟ୍ରେନ୍ ଚାଲିବ। ଖୋର୍ଦ୍ଧା-ବଲାଙ୍ଗିର ରେଳପଥରେ ସଂପୂର୍ଣ୍ଣ ଭାବେ ଟ୍ରେନ୍ ଚଳାଚଳ କରିବା ପରେ ଖୋର୍ଦ୍ଧା ସମେତ ନୟାଗଡ଼, ବୌଦ୍ଧ, ସୋନପୁର, ବଲାଙ୍ଗିର ଓ ପଶ୍ଚିମ ଓଡ଼ିଶାବାସୀଙ୍କ ପାଇଁ ଏହା ଲାଇଫ୍ ଲାଇନ୍ ହେବ।