ବଦଳି ଗଲା ଶାହାଙ୍କ ଠାଣୀ: କାଲି ଥିଲେ ନରମ, ଆଜି ପୂରା ଗରମ

ଭୁବନେଶ୍ୱର (ଓଡ଼ିଶା ରିପୋର୍ଟର): ଶେଷ ହୋଇଛି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ଦୁଇଦିନିଆ ଓଡ଼ିଶା ଗସ୍ତ। ଏହି ଦୁଇଦିନ ମଧ୍ୟରେ ବିଜେପି ମୁଖିଆଙ୍କର ଦୁଇ ପ୍ରକାର ଠାଣୀ ଦେଖିବାକୁ ମିଳିଥିଲା। କାଲିର ଠାଣୀ ଥିଲା କିଛିଟା ନରମ, ହେଲେ ଆଜି ଦେଇଥିଲେ ରଣ ହୁଙ୍କାର। ଆଜି ବଲାଙ୍ଗିରରେ ବିଜେପି ଯୁବମୋର୍ଚ୍ଚା ସମାବେଶରେ ଉଦ୍‌ବୋଧନ ଦେଇ ବିଜେଡି ହିଂସାର ରାସ୍ତା ଧରିଥିବା ସିଧାସଳଖ ଅଭିଯୋଗ କରିଛନ୍ତି। ତାଙ୍କ ସରକାର କ୍ଷମତାକୁ ଆସିଲେ ଅପରାଧୀଙ୍କୁ ପାତାଳରୁ ଖୋଜି ବାହାର କରାଯିବ ବୋଲି ଚେତାବନୀ ଦେଇଛନ୍ତି। ଏଥିସହ ରାଜ୍ୟ ସରକାର ପଶ୍ଚିମ ଓଡ଼ିଶା ପ୍ରତି ଅନ୍ୟାୟ କରୁଥିବା କହି ପଶ୍ଚିମବାସୀଙ୍କ ମନ ଜିତିବାକୁ ପ୍ରୟାସ କରିଛନ୍ତି।

ଆହୁରି ପଢନ୍ତୁ : ଶାହାଙ୍କ ମଧ୍ୟାହ୍ନ ଭୋଜନ ଡ୍ରାମା, ଖାଦ୍ୟର ମାନ ଯାଞ୍ଚ କଲେ ସ୍ୱାସ୍ଥ୍ୟ ଟିମ୍‌

ପଶ୍ଚିମ ଓଡ଼ିଶାରେ ଗଡ଼କୁ ଆହୁରି ମଜଭୁତ୍ କରିବାକୁ ବଲାଙ୍ଗିରରେ ଶାହା ଖେଳିଛନ୍ତି ପଶ୍ଚିମ ଓଡ଼ିଶା କାର୍ଡ। କୋଶଳ କଳାମଣ୍ଡପ ପଡ଼ିଆରେ ଆୟୋଜିତ ବିଜେପି ଯୁବମୋର୍ଚ୍ଚା ସମାବେଶରେ ପଶ୍ଚିମବାସୀଙ୍କ ପ୍ରତି ରାଜ୍ୟ ସରକାର ସଉତୁଣୀ ଭଳି ଆଭିମୁଖ୍ୟ ରଖିଥିବା କହିଛନ୍ତି। ଓଡ଼ିଶାରେ ୩୩ ପ୍ରତିଶତ ଜଳସେଚନ ସୁବିଧା ଥିଲା ବେଳେ ପଶ୍ଚିମ ଓଡ଼ିଶାରେ ୧୧ ପ୍ରତିଶତ କାହିଁକି ରହିଛି ବୋଲି ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି। ପଶ୍ଚିମ ଓଡ଼ିଶାରେ ବେକାରୀ ସମସ୍ୟା ପ୍ରସଙ୍ଗ ଉଠାଇ ଯୁବଗୋଷ୍ଠୀଙ୍କୁ ଆକୃଷ୍ଟ କରିବାକୁ ଚେଷ୍ଟା କରିଛନ୍ତି। ଏପରିକି ସାମଗ୍ରିକ ବିକାଶରେ ନବୀନ୍ ଫେଲ୍ ମାରିଥିବା ଅଭିଯୋଗ କରି ସରକାରକୁ ବଦଳାଇବାର ଆହ୍ୱାନ ଦେଇଛନ୍ତି।

ପୋଡ଼ା ବିଦ୍ୟୁତ୍‌ ଟ୍ରାନ୍ସଫର୍ମର

ମଞ୍ଚରେ ଉଦ୍‌ବୋଧନ ଦେବା ଦେବା ବେଳେ ନବୀନ ସରକାରଙ୍କୁ ପୋଡ଼ା ବିଦ୍ୟୁତ୍‌ ଟ୍ରାନ୍ସଫର୍ମର ସହ ତୁଳନା କରି ଉପାଡ଼ି ଫିଙ୍ଗିଦେବାକୁ ଆହ୍ୱାନ ଦେଇଥିଲେ ଶାହା। ଅଭିଯୋଗ କରିଥିଲେ- ବିଜେପିର ସଫଳତାରେ ବିଜେଡି ବିଚଳିତ ହୋଇ ହିଂସାର ରାସ୍ତା ବାଛୁଛି। ରାଜ୍ୟରେ ୧୪ରୁ ଅଧିକ ବିଜେପି କର୍ମୀଙ୍କ ହତ୍ୟା କରାଯାଇଛି। ବିଜେପି ସରକାରକୁ ଆସିଲେ ଏହି ଅପରାଧୀଙ୍କୁ ପାତାଳରୁ ଖୋଜି ବାହାର କରିବୁ।

ସେହିପରି ତ୍ରିପୁରାଠୁ ଏଠି ବିଜେପିକୁ ବଡ଼ ସଫଳତା ମିଳିବ ବୋଲି ଦମ୍ଭ ଦେଖାଇଥିଲେ ଶାହା। ଅନ୍ୟପକ୍ଷରେ ଅମିତ ଶାହାଙ୍କ ମନ୍ତବ୍ୟ ଉପରେ ଦୃଢ଼ ଜବାବ ଦେଇଛି ବିଜେଡି।

କଲୋନୀପଡ଼ାରେ ଖାଇଲେ ମଧ୍ୟାହ୍ନ ଭୋଜନ

ଭବାନୀପାଟଣାରୁ ୧୧୦ କିଲୋମିଟର ବଲାଙ୍ଗିର ଆସିବା ବାଟରେ ଫ୍ଲୋରାଇଡ୍ ଆକ୍ରାନ୍ତ ଗାଁ ସଇଁତଳାର ବେନିଆବନ୍ଧରେ ଅଟକିଥିଲେ ଶାହା। ଗାଁ ବୁଲିଥିଲେ, ନଳକୂଅ ଦେଖି ପାଣିର ସମସ୍ୟାକୁ ନେଇ ପରେ ସରକାରଙ୍କୁ ଟାର୍ଗେଟ କରିବା ସହ ତାଙ୍କ ସରକାର ଆସିଲେ ପାଖ ନଈରେ ଚେକ୍‌ଡ୍ୟାମ ବାନ୍ଧିବାର ପ୍ରତିଶ୍ରୁତି ଦେଇଥିଲେ। ଏହାପରେ ଦେଓଗାଁ ହରିଜନ ବସ୍ତି କଲୋନିପଡ଼ା ଯାଇ ମହେଶ୍ୱର ସୁନା ଘରେ ପଙ୍ଗତରେ ବସି ମଧ୍ୟାହ୍ନ ଭୋଜନ କରିଥିଲେ। ସାଙ୍ଗରେ ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଜୁଏଲ୍ ଓରାମ ଏବଂ ଦଳୀୟ କର୍ମକର୍ତ୍ତା ମଧ୍ୟ ଖାଇଥିଲେ। ବଲାଙ୍ଗିର ଗସ୍ତ ଅବସରରେ ପଥରଚେପା ଗାଁରେ ବିଜେପିର ୨୬ଟି ଜିଲ୍ଲା କାର୍ଯ୍ୟାଳୟର ଶୁଭ ଦେଇଥିଲେ ଶାହ।

ଆହୁରି ପଢନ୍ତୁ: ମାଟିଘରେ ତଳେ ବସି ପତ୍ରଖଲିରେ ଖାଇଲେ ଭାତ ଓ ମୁଗଡ଼ାଲି