ବସ୍‌ ଧକ୍କାରେ ଚାଲିଗଲା ୩ ଜୀବନ

ରାଇରଙ୍ଗପୁର(ରାଜେଶ ଶର୍ମା): ଝାରଖଣ୍ଡ ଦେଇ ଯାଇଥିବା ୨୨୦ ନମ୍ୱର ଜାତୀୟ ରାଜପଥରେ ଆଜି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଫଳରେ ୩ ଜଣ ଓଡ଼ିଆଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ମୟୂରଭଞ୍ଜ ଜିଲ୍ଲା ବିଜାତଳା ବ୍ଲକର ବାଟଦୁଆ ଗାଁର ବୋଲି ଜଣାପଡ଼ିଛି। ମଙ୍ଗଲ ମାନସିଂହ, ତାଙ୍କ ୧୦ ବର୍ଷର ପୁଅ ଓ ଅନ୍ୟ ଜଣେ ମହିଳା।

ସୂଚନାରୁ ପ୍ରକାଶ, ବାଟଦୁଆ ଗାଁର ମଙ୍ଗଲ ମାନସିଂହ ଗତ କିଛି ବର୍ଷ ଧରି ଜାମସେଦପୁରରେ ରୁହନ୍ତି। ଆଜି ଶ୍ରୀ ମାନସିଂ ବାଇକରେ ନିଜ ଗାଁରୁ ଜାମସେଦପୁର ଅଭିମୁଖେ ଯାଉଥିଲେ। ୨୨୦ ନମ୍ୱର ଏନ୍‌ଏଚ୍‌ର ତିରିଲଡିହି ନିକଟରେ ଜାମସେଦପୁରରୁ ଚାଇଁବସା ଯାଉଥିବା ଏକ ଯାତ୍ରୀବାହୀ ବସ୍‌ ଶ୍ରୀ ମାନସିଂହଙ୍କ ବାଇକ୍‌କୁ ଧକ୍କା ଦେଇଥିଲା। ଫଳରେ ଘଟଣା ସ୍ଥଳରେ ଶ୍ରୀ ମାନସିଂହ, ତାଙ୍କ ୧୦ ବର୍ଷର ପୁଅ ଓ ଜଣେ ମହିଳାଙ୍କ ମୃତ୍ୟୁ ଘଟିଛି। ଝାରଖଣ୍ଡ ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଦେଇଛି।