ନବୀନଙ୍କୁ ଧର୍ମେନ୍ଦ୍ରଙ୍କ କଟାକ୍ଷ: ଆପଣ ରାଜା, ମୁଁ ହଳିଆ

ଭୁବନେଶ୍ୱର: ରାଜ୍ୟର ସହରୀ ଲୋକଙ୍କ ପାଇଁ ଆଜି ଦୁଇଟି ମେଗା ପ୍ରକଳ୍ପ ଶୁଭାରମ୍ଭ ହୋଇଛି। କେନ୍ଦ୍ର ସରକାରଙ୍କ ‘ପ୍ରଧାନମନ୍ତ୍ରୀ ଉର୍ଜା ଗଙ୍ଗା ଯୋଜନାରେ’ ନାଲକୋ ନଗରରେ ଘରକୁ ପାଇପ୍‌ ଯୋଗେ ଗ୍ୟାସ୍‌ ଯୋଗାଣର ଶୁଭାରମ୍ଭ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ସେହିପରି କଟକର ଇନଡୋର ଷ୍ଟାଡିୟମରେ ସହରାଞ୍ଚଳର ୧୮୨ଟି ପାଇପ୍ ପାନୀୟ ଜଳ ପ୍ରକଳ୍ପର ଶୁଭାରମ୍ଭ କରିଛନ୍ତି ମୁଖମନ୍ତ୍ରୀ ନବୀନ ପଟ୍ଟନାୟକ। ତେବେ ଏହି ଦୁଇ ପ୍ରକଳ୍ପର ଶୁଭାରମ୍ଭ ସହ ବିଜେଡି ଓ ବିଜେପି ମଧ୍ୟରେ ଆରମ୍ଭ ହୋଇଛି ବାକ୍‌ଯୁଦ୍ଧ। ଗ୍ୟାସ୍‌ ପାଇପ୍‌ର ଶୁଭାରମ୍ଭ ବେଳେ ପାଣି, ବିଜୁଳି ଓ ପେଟ୍ରୋଲ ପ୍ରସଙ୍ଗକୁ ନେଇ ନବୀନଙ୍କୁ ଟାର୍ଗେଟ କରିଛନ୍ତି ଧର୍ମେନ୍ଦ୍ର। ସେ ନବୀନଙ୍କୁ ରାଜା ଓ ନିଜକୁ ହଳିଆ ବୋଲି କହିଥିଲେ।

ଧର୍ମେନ୍ଦ୍ର କହିଛନ୍ତି- “ରନ୍ଧନ ଗ୍ୟାସ ଯୋଗାଣ ପାଇଁ ପାଇପ୍‌ ବିଛାଇବା କାମରେ ବିଜେଡି ସରକାର ବିଳମ୍ବ କରିଛନ୍ତି। ମୋଦି ପେଟ୍ରୋଲ ଓ ଡିଜେଲରେ ଅଢେଇ ଟଙ୍କା କମ କଲ। ଆପଣ ଆଖି ବୁଜି ବିରାଡି ବୈଷ୍ଣବ ପାଲଟି ଗଲେ। ଏକଥା ପଚାରିଲେ, କହୁଛ ଅପପ୍ରଚାର କରୁଛୁ। ଏଇଟା କ’ଣ ଆପଣଙ୍କ ଶ୍ରେଷ୍ଟ ସାର୍ଟିଫିକେଟ୍‌। ୧୭ ବର୍ଷ ଧରି ଶାସନ ପରେ ଆପଣଙ୍କର ପାଣି କଥା ମନେ ପଡିଲା।”

ଗଣତନ୍ତ୍ରରେ ଦୀର୍ଘ ସମୟ ପାଇଁ ରାଧୁଆ ମିଛୁଆର କାହାଣୀ ଚଳେନାହିଁ ବୋଲି ଆକ୍ଷେପ କରି ବିଦ୍ୟୁତ ଯୋଗାଣ ପ୍ରସଙ୍ଗରେ ମଧ୍ୟ ରାଜ୍ୟ ଉପରେ ବର୍ଷିଥିଲେ ଧର୍ମେନ୍ଦ୍ର।

ଧର୍ମେନ୍ଦ୍ରଙ୍କ ମନ୍ତବ୍ୟ ପରେ ଏକ ସାମ୍ବାଦିକ ସମ୍ମିଳନୀରେ ପାଇପ୍ ଗ୍ୟାସ୍ ଯୋଗାଣର ଶ୍ରେୟ ଛଡ଼ାଇ ନେବାକୁ ପ୍ରୟାସ କରିଥିଲା ବିଜେଡି।  ପାଇପ ଯୋଗେ ରନ୍ଧନ ଗ୍ୟାସ ଯୋଗାଣ ଏବେକାର ସରକାରଙ୍କ ନୁହେଁ ବୋଲି ବିଜେଡି କହିଛି।

ବିଜେଡି ମୁଖପାତ୍ର ପ୍ରତାପ ଦେବ କହିଛନ୍ତି- “୨୦୦୯ରେ ଏଥିପାଇଁ ନବୀନ କେନ୍ଦ୍ରକୁ ଚିଠି ଲେଖିଥିଲେ। ୨୦୧୨ରେ ଗେଲ ଅଧିକାରୀଙ୍କ ସହ ମୁଖ୍ୟ ଶାସନ ସଚିବଙ୍କର ଏ ନେଇ ସମୀକ୍ଷା ବୈଠକ ବି ହୋଇଥିଲା।”

ପର୍ଯ୍ୟଟନ୍‌ ଓ ସଂସ୍କୃତି ମନ୍ତ୍ରୀ ଅଶୋକ ପଣ୍ଡା କହିଛନ୍ତି- “ରାଜନୈତିକ ଉଦ୍ଦେଶ୍ୟ ରଖି ପାଇପ୍‌ ଯୋଗେ ଗ୍ୟାସ୍‌ ଯୋଗାଣ ପ୍ରକଳ୍ପ ଗରିବଙ୍କ ବସ୍ତିରେ ଆରମ୍ଭ ନକରି କେନ୍ଦ୍ର ସରକାର ଏକ କଲୋନୀରେ ଶୁଭାରମ୍ଭ କରିଛନ୍ତି। ୨୦୨୦ ପୂର୍ବରୁ ଟ୍ୱିନ୍‌ସିଟି ବାସିନ୍ଦାଙ୍କୁ ଏହାର ଫାଇଦା ମିଳିବା ଅସମ୍ଭବ।”

ଅନ୍ୟପକ୍ଷରେ ଗ୍ୟାସ୍‌ ପାଇପ୍‌ କାର୍ଯ୍ୟକ୍ରମକୁ ଭୁବନେଶ୍ୱର ସାଂସଦ ପ୍ରସନ୍ନ ପାଟ୍ଟଶାଣୀ, ବିଧାୟକ ପ୍ରିୟଦର୍ଶୀ ମିଶ୍ର ଓ ୨ ଜଣଙ୍କ କର୍ପୋରେଟରଙ୍କୁ କେନ୍ଦ୍ର ସରକାର ନିମନ୍ତ୍ରଣ କରିଥିଲେ। ହେଲେ ସେମାନଙ୍କୁ ଦେଖିବାକୁ ମିଳି ନଥିଲା।

ସାଂସଦ ପାଟ୍ଟଶାଣୀ କହିଛନ୍ତି, ସହରୀ ଲୋକଙ୍କ ଲାଗି ପାଣି ଗ୍ୟାସ ଠାରୁ ପାଣି ଅଧିକ ଗୁରୁତ୍ୱପୂର୍ଣ୍ଣ। ସେଥିପାଇଁ କାର୍ଯ୍ୟକ୍ରମକୁ ଯାଇ ନଥିଲି।