ବାଇକ୍‌କୁ ଧକ୍କା ଦେଲା କାର୍; ଖୁଡ଼ୀ ମୃତ, ପୁତୁରା ଆହତ

ଯାଜପୁର(ଅଭୟ ପତି): ଯାଜପୁର ଜିଲ୍ଲା କୋରେଇ ଥାନା ଅନ୍ତର୍ଗତ ପାଟୁଳି ଛକ ନିକଟରେ ଏକ ବାଇକ୍‌କୁ  ପଛପଟୁ ଧକ୍କା ଦେଲା କାର୍‌। ଏହି ଦୁର୍ଘଟଣାରେ ବାଇକ୍‌ରେ ବସିଥିବା ମହିଳାଙ୍କ ମୃତ୍ୟୁ ଘଟିଥିବା ବେଳେ ବାଇକ୍‌ ଚାଳକ ଆହତ ହୋଇଛନ୍ତି। ମୃତ ମହିଳାଙ୍କ ନାଁ କମଳା ମଲ୍ଲିକ। ଏହି ଦୁର୍ଘଟଣାରେ ତାଙ୍କ ପୁତୁରା ରଞ୍ଜିତ ମଲ୍ଲିକ୍ ଆହତ ହୋଇଛନ୍ତି। ଉଭୟଙ୍କ ଘର ନରପଦା ଗାଁରେ।

ସୂଚନାଅନୁସାରେ, ଆଜି ସକାଳେ କମଳା ପୁତୁରା ରଞ୍ଜିତଙ୍କ ସହ ଯାଜପୁର ରୋଡ ଡାକ୍ତରଖାନାକୁ ଯାଇ ଘରକୁ ଫେରୁଥିଲେ। ଏହି ସମୟରେ ପାଟୁଳି ଛକ ନିକଟରେ ତାଙ୍କ ବାଇକ୍‌କୁ ଏକ କାର୍ ପଛପଟୁ ଧକ୍କା ଦେଇଥିଲା।  ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଯାଜପୁର ରୋଡ୍ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ କମଳାଙ୍କୁ ଡାକ୍ତର ମୃତ ଘୋଷଣା କରିଥିଲେ। ରଞ୍ଜିତଙ୍କୁ ପ୍ରାଥମିକ ଚିକିତ୍ସା ପରେ ଘରକୁ ପଠାଇ ଦିଆଯାଇଛି।

ପୁଲିସ୍‌ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଦୁର୍ଘଟଣା ଘଟାଇଥିବା କାର୍ ଫେରାର୍ ହୋଇଯାଇଛି। ସୂଚନାଯୋଗ୍ୟ, ଗତ ଦୁଇ ଦିନ ତଳେ ଏହି ପାଟୁଳି ଛକ ନିକଟରେ ଦୁଇ ବାଇକ୍‌ ମୁହାଁମୁହିଁ ଧକ୍କା ହୋଇଥିଲା। ଏଥିରେ ଦୁଇ ବାଇକ୍ ଆରୋହୀଙ୍କ ମୃତ୍ୟୁ ଘଟିଥିଲା।