କେବଳ କେନ୍ଦ୍ରାପଡ଼ା ନୁହେଁ, ଓଡ଼ିଶା ପାଇଁ କିଛି କରିବାକୁ ଇଚ୍ଛା: ବୈଜୟନ୍ତ

ନିର୍ବାଚନରେ ଭାଗ ନେବାକୁ ହେଲେ ନିର୍ବାଚନ ପୂର୍ବରୁ ହିଁ କିଛି ନିଷ୍ପତ୍ତି ନେବି, କହିଲେ ପୂର୍ବତନ ସାଂସଦ

ଭୁବନେଶ୍ୱର (ଓଡ଼ିଶା ରିପୋର୍ଟର): କେନ୍ଦ୍ରାପଡ଼ାର ପୂର୍ବତନ ସାଂସଦ ବୈଜୟନ୍ତ ପଣ୍ଡା ତାଙ୍କର ଭବିଷ୍ୟତ ରାଜନୀତିକ କାର୍ଯ୍ୟକ୍ରମ ସଂପର୍କରେ ଗଣମାଧ୍ୟମରେ ନିଜର ମତ ରଖିଛନ୍ତି।

ଆଜି କଟକ ଜିଲ୍ଲାର ମାହାଙ୍ଗା ନିକଟସ୍ଥ ବ୍ରାହ୍ମଣମଣିଯୋରୀ ଗାଁ ଗସ୍ତ ଅବସରରେ ସେ ସାମ୍ବାଦିକଙ୍କ ପ୍ରଶ୍ନର ଉତ୍ତରରେ କହିଛନ୍ତି- “କେବଳ କେନ୍ଦ୍ରାପଡ଼ା ନୁହେଁ, ମୋର ଇଚ୍ଛା ସାରା ଓଡ଼ିଶା ପାଇଁ କିଛି କରିବାକୁ। ଆଗାମୀ ଦିନରେ କେଉଁ ଦଳରେ ସାମିଲ ହେବି, କିମ୍ବା ନୂଆ କିଛି ଆରମ୍ଭ କରିବି, ଏବେ ଏ ସଂପର୍କରେ ମୁଁ ଚିନ୍ତା କରୁଛି। ଏ ନେଇ ଲୋକଙ୍କ ମତ ନେଉଛି। ସବୁ କିଛି ବିଷୟରେ ଚିନ୍ତା କରୁଛି। ନିର୍ବାଚନରେ ଭାଗ ନେବାକୁ ହେଲେ ନିର୍ବାଚନ ପୂର୍ବରୁ ହିଁ କିଛି ନିଷ୍ପତ୍ତି ନେବି।”

ସେ ଆହୁରି ମଧ୍ୟ କହିଛନ୍ତି- “ଲୋକଙ୍କ ସେବା ପାଇଁ ରାଜନୀତି ଏକମାତ୍ର ମାଧ୍ୟମ ନୁହେଁ। ହେଲେ ଦୁଇଦଶନ୍ଧି ଧରି ଯେହେତୁ ରାଜନୀତି ଜରିଆରେ ଲୋକଙ୍କ ସେବା କରିଆସୁଛି, ତେଣୁ ରାଜନୀତି ଜରିଆରେ ତାହା କରିବା ମୋ ପାଇଁ ଉଚିତ ହେବ।”

 

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।