ବ୍ରହ୍ମପୁର: ସୋମବାର ଜାମିନରେ ମୁକୁଳିଲେ ଏମକେସିଜି ମେଡିକାଲ କଲେଜର ୬ଜଣ ଡାକ୍ତରୀ ଛାତ୍ର ଓ ୩ ଜୁନିୟର ଡାକ୍ତର। ଆଟ୍ରୋସିଟି ମାମଲାରେ ଜିଲ୍ଲା ଦୌରାଜଜ୍ଙ୍କ କୋର୍ଟ ଏବଂ ୫୦୬ ଦଫାର ୩ଟି ମାମଲାରେ ଆଜି ଏସଡିଜେମ୍ଙ୍କ କୋର୍ଟରୁ ସମସ୍ତଙ୍କୁ ଜାମିନ୍ ମିଳିଛି। ସେମାନଙ୍କୁ ସର୍ତ୍ତମୂଳକ ଜାମିନ୍ ଦିଆଯାଇଛି। ଜଣେ ଜାମିନଦାର ଓ ୧୦ ହଜାର ଟଙ୍କାର ମୁଚାଲିକାରେ ସେମାନଙ୍କୁ ଜାମିନ୍ ଦିଆଯାଇଛି।
ଗତ ୨୯ ତାରିଖରେ ବିଳମ୍ବିତ ରାତିରେ ଜଣେ ରୋଗୀର ଚିକିତ୍ସାକୁ ନେଇ ରୋଗୀଙ୍କ ସଂପର୍କୀୟ, ପୋଲିସ୍ ଓ ସାମ୍ବାଦିକଙ୍କୁ ଗାଳିଗୁଲଜ କରିବା ଓ ମାଡ଼ ମାରିବା ଅଭିଯୋଗରେ ଏମାନଙ୍କୁ ଗିରଫ କରାଯାଇଥିଲା।
ଏମାନଙ୍କ ବିରୋଧରେ ଥିବା ମାମଲା ପ୍ରତ୍ୟାହାର ଦାବିରେ ଆନ୍ଦୋଳନ ପାଇଁ ଚେତାବନୀ ଦେଇଛନ୍ତି ବିଭିନ୍ନ ଜୁନିୟର ଡାକ୍ତର ସଂଘ। ଏସ୍ସିବି ଜୁନିୟର ଡାକ୍ତର ଛାତ୍ର ସଂଘ ପକ୍ଷରୁ ଏନେଇ ଆଜି ସ୍ୱାସ୍ଥ୍ୟମନ୍ତ୍ରୀ ଓ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଛି। ଦାବି ପୂରଣ ନ ହେଲେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଆନ୍ଦୋଳନକୁ ଓହ୍ଲାଇବା ପାଇଁ ଚେତାବନୀ ଦେଇଛନ୍ତି ସେମାନେ। ବୁର୍ଲା ଜୁନିୟର ଡାକ୍ତର ସଂଘ ମଧ୍ୟ ସେମାନଙ୍କ ଦାବିକୁ ସମର୍ଥନ କରିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।