ସମ୍ବଲପୁର/ ଝାରସୁଗୁଡ଼ା (ଓଡ଼ିଶା ରିପୋର୍ଟର): ଆଗକୁ ଗଣେଶ ପୂଜା ଓ ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ ଆସୁଥିବାରୁ ଶଟଡାଉନ୍ କଟକଣା ଭିତରେ ଏହା ଫିକା ପଡ଼ିଯିବାର ଆଶଙ୍କା ଦେଖାଦେଇଛି। ଝାରସୁଗୁଡ଼ାରେ ସର୍ବସାଧାରଣ ସ୍ଥାନରେ ଗଣେଶ ପୂଜା ପାଳନ କରିବାକୁ ବାରଣ କରିଛି ଜିଲ୍ଲା ପ୍ରଶାସନ । ସେହିପରି ନୂଆଁଖାଇ ଦିନ ସର୍ବସାଧାରଣ ସ୍ଥାନରେ ବି ଭେଟଭାଟ ହେବ ନାହିଁ ବୋଲି ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶନାମା ଜାରି ହୋଇଛି । କେବଳ ଘରେ ଓ ପରିବାର ସଦସ୍ୟଙ୍କୁ ନେଇ ଗଣେଶ ପୂଜା ଓ ନୂଆଁଖାଇ ପାଳନ ହେବ ବୋଲି ଆଦେଶ ଦିଆଯାଇଛି।
ଆସନ୍ତା ୨୩ରେ ପାଳିତ ହେବ ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ। ଏହାକୁ ଜାକଜମକରେ ତଥା ଉତ୍ସାହ ଉଦ୍ଦିପନାର ସହ ପାଳନ ନିମନ୍ତେ ବର୍ଷ ସାରା ଅପେକ୍ଷା କରିଥାନ୍ତି ପଶ୍ଚିମ ଓଡ଼ିଶା ବାସିନ୍ଦା। ହେଲେ ଚଳିତ ବର୍ଷ ଶଟଡାଉନ୍ ପାଇଁ ଏହା ଫିକା ପଡ଼ିଯିବା ଆଶଙ୍କା ଥିବାରୁ ଶଟଡାଉନ୍ ଘୁଞ୍ଚାଇବାକୁ ହୋଇଛି ଅନୁରୋଧ । ଏ ନେଇ ବିଚାର କରିବା ଲାଗି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ଅନୁରୋଧ କରିଛନ୍ତି ସମ୍ବଲପୁର ବିଧାୟକ ଜୟନାରାୟଣ ମିଶ୍ର ଓ ରେଙ୍ଗାଲି ବିଧାୟକ ନାଉରି ନାୟକ ।
ଏହି ଉଭୟ ବିଧାୟକ କରିଥିବା ଅନୁରୋଧ ଅନୁଯାୟୀ, ଆସନ୍ତା ୨୩ରେ ନୂଆଁଖାଇ ପର୍ବ ପଡୁଛି । ଏହା ପୂର୍ବରୁ ୨୨ ଓ ୨୩ ତାରିଖରେ ଶଟଡାଉନ୍ ଘୋଷଣା କରିଛି ଜିଲ୍ଲା ପ୍ରଶାସନ । ଏହାର ପ୍ରଭାବ ନୂଆଁଖାଇ ଉପରେ ପଡ଼ିବ। ପର୍ବ ପାଳନ ସହିତ କିଣାବିକା ଓ ଯାଆସ ପ୍ରଭାବିତ ହେବାର ଆଶଙ୍କା ଅଛି । ତେଣୁ ଶଟଡାଉନ୍ ଦିନ ପରିବର୍ତ୍ତନ କରି ଦୁଇ ଦିନ ପୂର୍ବରୁ ବା ପରେ ଶଟଡାଉନ୍ ଲାଗୁ କରିବାକୁ ଜୟନାରାୟଣ ଓ ନାଉରି ନାୟକ ଅନୁରୋଧ କରିଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
