ରଣପୁର ଏନଏସି ନିର୍ବାଚନ: ଆଜି ସରିବ ପ୍ରଚାର

ଭୁବନେଶ୍ୱର: ନୂଆକରି ଗଠିତ ରଣପୁର ଏନଏସିରେ ଆସନ୍ତା ୫ ତାରିଖରେ ମତଦାନ ହେବ। ଏଥିପାଇଁ ତିନି ପ୍ରମୁଖ ରାଜନୈତିକ ଦଳ ପକ୍ଷରୁ ଜୋରଦାର ପ୍ରଚାର କରାଯାଉଛି। ଦଳୀୟ ନେତାମାନେ ପ୍ରାର୍ଥୀଙ୍କୁ ସାଙ୍ଗରେ ଧରି ଡୋର-ଟୁ-ଡୋର କ୍ୟମ୍ପେନିଂ ଚଳାଇଛନ୍ତି। ଆଜି ପ୍ରଚାର ସରୁଥିବାବେଳେ ବିଜେପି ରାଜ୍ୟ ସଭାପତି କନକବର୍ଦ୍ଧନ ସିଂହଦେଓ, ଭୃଗୁ ବକ୍ସିପାତ୍ର, ସ୍ଥାନୀୟ ନେତ୍ରୀ ସୁରମାପାଢୀ, ରୁଦ୍ରମାଧବ ରାୟ ଓ ବ୍ରଜରାଜନଗର ବିଧାୟିକା ରାଧାରଣୀ ପଣ୍ଡା ପ୍ରମୁଖ ଦଳୀୟ ପ୍ରାର୍ଥୀଙ୍କ ଲାଗି ଭୋଟ ମାଗିଛନ୍ତି। ସେହିପରି କଂଗ୍ରେସ ମଧ୍ୟ ପଛରେ ପଡିନାହିଁ। ଏଠାକୁ ଦଳୀୟ ହେବିୱେଟ ଆସିନଥିଲେ ମଧ୍ୟ ଯୁବନେତା ସତ୍ୟଜିତ ପଟ୍ଟନାୟକଙ୍କ ନେତୃତ୍ୱରେ ଦଳ ପ୍ରଚାର ଚଲାଇଛନ୍ତି। ସେହିପରି ବିଜେଡି ତରଫରୁ ବିଧାୟକ ପ୍ରଭାତ ବିଶ୍ୱାଳ, ରଣପୁର ପୂର୍ବତନ ବିଧାୟକ ସତ୍ୟନାରୟଣ ପ୍ରଧାନ ଘରଘର ବୁଲି ଭୋଟ ମାଗୁଛନ୍ତି। ବିକାଶର ନାରାଦେଇ ଦଳ ସପକ୍ଷରେ ଭୋଟ ଦେବା ପାଇଁ ଏମାନେ ଲୋକଙ୍କୁ ପ୍ରବର୍ତ୍ତାଉଛନ୍ତି। ସଂରକ୍ଷଣ ନୀତିରେ ତ୍ରୁଟି ଯୋଗୁ ଏପ୍ରିଲ ୭ ତାରିଖରେ ଏଠାରେ ନିର୍ବାଚନ ହୋଇପାରିନଥିଲା। ରଣପୁର ଏନଏସିରେ ୯ହଜାର ୯ ଶହ ୬୯ ଭୋଟର ଥିବା ବେଳେ ୧୫ଟି ୱାର୍ଡ ପାଇଁ ନିର୍ବାଚନ ହେଉଛି। ନିର୍ବାଚନ ମୈଦାନରେ ୫୫ଜଣ ପ୍ରାର୍ଥୀ ଅଛନ୍ତି।