ଯାଆଁଳା ଶିଶୁକନ୍ୟାଙ୍କୁ ପାଇଖାନାରେ ଛାଡ଼ି ପଳାଇଲା ମାଆ

ବଲାଙ୍ଗିର(ମନରଂଜନ ଯୋଶୀ): ବଲାଙ୍ଗିର ସହରରେ ଏକ ଅଭାବନୀୟ ଘଟଣା ଘଟିଛି। ରେଲୱେ ଷ୍ଟେସନ୍ ପାଇଖାନାରେ ୨ ମାସର ଯାଆଁଳା ଶିଶୁକନ୍ୟାଙ୍କୁ ଛାଡ଼ି ମାଆ ଫେରାର ହୋଇଯାଇଛି। ଦୁଇ ଶିଶୁଙ୍କୁ ପାଇଖାନା ଭିତରୁ ଉଦ୍ଧାର କରିଛି ଚାଇଲ୍ଡ ଲାଇନ୍। ଉଭୟଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଡାକ୍ତରଖାନରେ ଭର୍ତ୍ତି କରାଯାଇଛି।

ଶିଶୁକନ୍ୟାଙ୍କୁ ଏକ ବ୍ୟାଗ୍‌ରେ ଭର୍ତ୍ତି କରି ମାଆ ଛାଡ଼ି ପଳାଇଥିବା ସୂଚନା ମିଳିଛି। ତେବେ କାହିଁକି ଓ କେଉଁ ପରିସ୍ଥିତିରେ ଜନ୍ମ କଲା ମାଆ ଦୁଇ ଶିଶୁଙ୍କୁ ଛାଡି ପଳାଇଲା ତାକୁ ନେଇ ତଦନ୍ତ ଆରମ୍ଭ ହୋଇଛି।

ବଲାଙ୍ଗିର ଜିଲ୍ଲା ମୁଖ୍ୟ ଚିକିତ୍ସାଳୟ ଡାକ୍ତର ସୁରଜିତ୍ ନାୟକ କହିଛନ୍ତି,“ଉଭୟ ଶିଶୁଙ୍କ ସ୍ୱାସ୍ଥ୍ୟାବସ୍ଥା ଭଲ ଅଛି।”

ପ୍ରତ୍ୟକ୍ଷଦର୍ଶୀ କପିଳେଶ୍ୱର କୁମାର କହିଛନ୍ତି,“ପାଇଖାନା ଘରେ ଦୁଇଟି ଶିଶୁକୁ କେହି ବ୍ୟାଗ୍‌ ଭିତରେ ପକାଇ ପଳାଇଥିବା ନେଇ ଆମକୁ ଜଣେ ବ୍ୟକ୍ତି କହିଥିଲେ। ଏହାପରେ ଆମେ ସେଠାକୁ ଯାଇ ରେଲୱେ ପୋଲିସକୁ ଖବର ଦେଇଥିଲୁ। ପୋଲିସ ଘଟଣାସ୍ଥଳରେ ପହଞ୍ଚି ଡାକ୍ତରଖାନକୁ ଖବର ଦେଇଥିଲେ। ସଙ୍ଗେ ସଙ୍ଗେ ଡାକ୍ତର ଆସି ଶିଶୁଙ୍କୁ ସ୍ୱାସ୍ଥ୍ୟ ପରୀକ୍ଷା କରି ଡାକ୍ତରଖାନାକୁ ଅଣାଇଥିଲେ।”

ସୂଚନାଯୋଗ୍ୟ, ଏପ୍ରିଲ୍‌ ୨୩ ତାରିଖରେ ଯାଜପୁର ଜିଲ୍ଲା କୁଆଖିଆ ଥାନା ଅନ୍ତର୍ଗତ ସୁଆଁସାହି ନିକଟସ୍ଥ ଜାତୀୟ ରାଜପଥ କଡ଼ରୁ  ଏକ ନବଜାତ ଶିଶୁକନ୍ୟାକୁ ଉଦ୍ଧାର କରାଯାଇଥିଲା। ଶିଶୁଟିକୁ କେହି ଏକ କପଡ଼ାରେ ଗୋଡ଼ାଇ ରାସ୍ତାକଡ଼ରେ ରଖି ଚାଲିଯାଇଥିଲା।