ବଲାଙ୍ଗିର(ଓଡ଼ିଶା ରିପୋର୍ଟର) ପୁଣି କ୍ୟାମେରାରେ କଳା ଡିଲ୍ । ପୁଣି ଦୁର୍ନୀତିଖୋର୍ ସରକାରୀ କର୍ମଚାରୀଙ୍କ ପାଇଁ ଚର୍ଚ୍ଚାରେ ବଲାଙ୍ଗିର ପୁଇନ୍ତଳା ବ୍ଲକ୍ର ତିନିଟି ପଞ୍ଚାୟତ ଦାୟିତ୍ୱରେ ଥିବା ଭିଏଡବ୍ଲୁ। ବନ୍ୟା କ୍ଷୟକ୍ଷତିର ସର୍ଭେ କରିବା ନାଁରେ ଚାଷୀଙ୍କୁ ଘରକୁ ଡାକି ଲାଞ୍ଚ ମାଗିବା ଦୃଶ୍ୟ କ୍ୟାମେରାରେ କଏଦ ହୋଇଛି। ଏନେଇ ଖବର ପ୍ରସାରଣ ପରେ ସଂପୃକ୍ତ ଭିଏଡବ୍ଲୁଙ୍କୁ ଜିଲ୍ଲାପାଳ ସସ୍ପେଣ୍ଡ୍ କରିଛନ୍ତି। ଗତ ଅଗଷ୍ଟରେ ଲଗାଣ ବର୍ଷା ଯୋଗୁଁ ବନ୍ୟା ପ୍ରଭାବିତ ହୋଇଥିଲା ପୁଇନ୍ତଳା ବ୍ଲକ୍ । ହଜାର ହଜାର ହେକ୍ଟର ଜମିରେ ପାଣି ସୁଅ ଚାଲି ବାଲି ଚରିଯାଇଥିଲା ।
ଚାଷୀଙ୍କ ଭରସା ଥିଲା ସରକାରୀ ସହାୟତା ଉପରେ। କିନ୍ତୁ ବିଡ଼ମ୍ବନା, ଚାଷୀଙ୍କ ସର୍ବନାଶ ହୋଇଥିବା ବେଳେ ସରକାରୀ ଅଧିକାରୀ ଓ କର୍ମଚାରୀଙ୍କ ପୁଷମାସ ପାଲଟିଛି। ତେବେ ପୁଇନ୍ତଳାର ଏ ଲାଞ୍ଚ କାରବାର ସଂପର୍କରେ ଖବର ପ୍ରସାରଣ ପରେ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସଂପୃକ୍ତ ଭିଏଡବ୍ଲୁଙ୍କୁ ନିଜେ ଜିଲ୍ଲାପାଳ ନିଲମ୍ବନ କରିବା ସହ କୃଷି ଉପନିର୍ଦ୍ଦେଶକଙ୍କୁ ତଦନ୍ତ ନିର୍ଦ୍ଦେଶ ଦେଇଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।