ତାଇଓ୍ୱାନ ଖେଳାଳି ଅଲିମ୍ପିକ୍ସରେ କାହିଁକି ‘ଚାଇନିଜ ତାଇପେଇ’ ନାଁରେ ଖେଳନ୍ତି?

ଟୋକିଓ: ଟୋକିଓରେ ଚାଲିଛି ଅଲିମ୍ପିକ୍ସ ୨୦୨୦। ୨୦୫+୧ଟି ଦେଶର ୧୧ ହଜାର ୯୦ ଜଣ ଖେଳାଳି ଏହି ଅଲିମ୍ପିକ୍ସରେ ଅଂଶ ଗ୍ରହଣ କରିଛନ୍ତି। ଭାରତ ସମେତ ଅନେକ ଦେଶର ଖେଳାଳି ବିଭିନ୍ନ ପଦକ ଜିତୁଛନ୍ତି। ଏଥି ମଧ୍ୟରେ ତାଇଓ୍ୱାନ ନାମକ ଏକ ଛୋଟିଆ ଦେଶ ମଧ୍ୟ ରହିଛି। ଯାହାର ଜନସଂଖ୍ୟା ଓଡ଼ିଶାର ଅଧା। ଅର୍ଥାତ୍ ୨.୩ କୋଟି। ଚାଇନାର ଏହି ପଡ଼ୋଶୀ ଦେଶ ଏଯାବତ ୧୨ଟି ପଦକ ଜିତିଛି ଯେଉଁଥିରେ ଦୁଇଟି ସ୍ୱର୍ଣ୍ଣ ପଦକ ରହିଛି। ଅଲିମ୍ପିକ୍ସରେ ଭାଗ ନେଇଥିବା ମୋଟ୍ ଦେଶ ମଧ୍ୟରୁ ୨୯ ନମ୍ୱର ଦେଶ ଭାବରେ ସର୍ବାଧିକ ପଦକ ଏଯାବତ ଜିତିଛି ତାଇଓ୍ୱାନ।

ଯେଉଁମାନେ ବିଭିନ୍ନ ଖେଳରେ ବିଜୟୀ ହୁଅନ୍ତି ସେମାନଙ୍କୁ ପଦକ ପ୍ରଦାନ କରାଯାଏ। ଏହି ସମୟରେ ଯିଏ ଯେଉଁ ଦେଶର ଖେଳାଳି ହୋଇଥିବେ ସେହି ଦେଶର ନାଁ ପଦକ ବିଜେତାଙ୍କ ଡ୍ରେସରେ ଲେଖା ହୋଇଥାଏ। ପଦକ ଗ୍ରହଣ କରିବା ବେଳେ ସେହି ଦେଶର ଜାତୀୟ ସଙ୍ଗୀତ ବାଜିଥାଏ। ଏହି ମୁହୂର୍ତ୍ତକୁ ଦେଖିବା ପାଇଁ ପ୍ରତ୍ୟେକ ଦେଶବାସୀ ଅପେକ୍ଷା କରନ୍ତି। ଆଉ ଦେଖିବା ବେଳେ ଭାବବିହ୍ୱଳ ମଧ୍ୟ ହୁଅନ୍ତି। କିନ୍ତୁ ତାଇଓ୍ୱାନର ଖେଳାଳି ଏହି ସୌଭାଗ୍ୟରୁ ବଞ୍ଚିତ।

ତାଇଓ୍ୱାନର ନିଜର ମୁଦ୍ରା, ସରକାର ଥିଲେ ମଧ୍ୟ ତାଇଓ୍ୱାନ ଅଲିମ୍ପିକ୍ସରେ ଭାଗ ନେବା ବେଳେ ଚାଇନିଜ ତାଇପେଇ ବୋଲି ସମ୍ୱୋଧିତ ହୁଏ। ତାଇଓ୍ୱାନ ଖେଳାଳିଙ୍କ ଡ୍ରେସରେ ଚାଇନିଜ ତାଇପେଇ ବୋଲି ଲେଖା ହୋଇଥାଏ। ସେମାନେ ପଦକ ଗ୍ରହଣ କରିବା ବେଳେ ତାଙ୍କ ଦେଶର ସଙ୍ଗୀତ ଗାନ ହୁଏ ନାହିଁ। କିନ୍ତୁ ଏହି ଛୋଟିଆ ଦେଶ ଭାରତ ଭଳି ବିକାଶଶୀଳ ଦେଶ ପାଖରୁ ଅଧିକ ମେଡାଲ ପ୍ରତିଥର ଜିତେ।

ତେବେ ତାଇଓ୍ୱାନ କାହିଁକି ଚାଇନିଜ ତାଇପେଇ ବୋଲି ସମ୍ୱୋଧିତ ହୁଏ ଏହାର କାରଣ ମଧ୍ୟ ରହିଛି। ଯେଉଁଥିରେ ମୁଖ୍ୟ କାରଣ ଅନ୍ତର୍ଜାତୀୟ ଅଲିମ୍ପିକ୍ସ କମିଟିର ଚାଇନା ପ୍ରୀତି ବୋଲି କୁହାଯାଏ। ଯିଏକି ପଡ଼ୋଶୀ ତାଇୱାନକୁ ଶତ୍ରୁ ବୋଲି ବିବେଚନା କରେ।

୧୯୪୯ରେ ଚାଇନାର ଗୃହଯୁଦ୍ଧ ଶେଷ ହେବା ପରେ ନ୍ୟାଶନାଲିଷ୍ଟ ଏବଂ ସେମାନଙ୍କର ରିପବ୍ଲିକ୍ ଚାଇନା ସରକାର ତାଇୱାନକୁ ପଳାଇଥିଲେ। ଏହି ଗୃହଯୁଦ୍ଧରେ ମାଓଙ୍କର ବିଜୟୀ ହୋଇଥିଲା। ପରେ ସେ କମ୍ୟୁନିଷ୍ଟ ଫୋର୍ସ ତିଆରି କରି ଚାଇନାକୁ ପିପୁଲ୍ସ ରିପବ୍ଲିକ୍ ଅଫ୍ ଚାଇନାରେ ପରିଣତ କରିଥିଲେ।

ଯଦିଓ ବେଜିଂର କମ୍ୟୁନିଷ୍ଟ କେବେ ତାଇୱାନକୁ ନିୟନ୍ତ୍ରଣ କରି ନାହାନ୍ତି, ହେଲେ ଏହା ପାଖରେ ଥିବା ଏକ ଦ୍ୱୀପ ହୋଇଥିବାରୁ ଚାଇନା ଏହାକୁ ନିଜର ବୋଲି ଦାବି କରେ। ଏକଦା ତାଇଓ୍ୱାନକୁ ନିଜ ଅଧୀନକୁ ନେବା ପାଇଁ ବେଜିଂର କମ୍ୟୁନିଷ୍ଟ ଚିନ୍ତା କରିଥିଲେ। ଚାଇନାର ମୁଖ୍ୟ ଉଦ୍ଦେଶ୍ୟ ହେଉଛି ତାଇଓ୍ୱାନ ନାମକୁ ବିଶ୍ୱର ବିଭିନ୍ନ ମଞ୍ଚରେ ବ୍ୟବହାର ଉପରେ ରୋକ୍ ଲଗାଇବା। କାରଣ ଚାଇନା ତାଇଓ୍ୱାନ ନିଜର ଏକ ଦ୍ୱୀପ ବୋଲି ଗ୍ରହଣ କରେ।

ତାଇୱାନ ଗୋଟିଏ ସ୍ୱାଧୀନ ରାଷ୍ଟ୍ର, ଜାତୀୟ ପତାକା ରହିବା ସହିତ ଏଠାରେ ଗଣତାନ୍ତ୍ରିକ ଶାସନ ରହିଛି। କିନ୍ତୁ ଚାଇନାର ଭୟରେ ନିଜକୁ ଅଲିମ୍ପିକ୍ସରେ ଗୋଟିଏ ଦେଶ ବୋଲି ବିବେଚନା କରିପାରେ ନାହିଁ। ଯାହାକୁ ଅନ୍ତର୍ଜାତୀୟ ଅଲିମ୍ପିକ୍ସ କମିଟି ମଧ୍ୟ ଚାଇନା ପକ୍ଷରେ ରହି ମତ ରଖେ।

୧୯୮୧ ମସିହାରେ International Olympic Committee ତାଇୱାନକୁ ଚାଇନାର ତାଇପେଇ ନାମରେ ନାମିତ କଲା ଏବଂ ସେତେବେଳେ ହିଁ ନିୟମ ହେଲା ଯେ ତାଇୱାନ ଏହାର ଜାତୀୟ ପତାକା ସହିତ ଖେଳିବ ନାହିଁ। ବର୍ତ୍ତମାନ ଟୋକିଓ ଅଲିମ୍ପିକ୍ସରେ ତାଇୱାନର ପତାକା ଅଲିମ୍ପିକ୍ସ ଗେମ୍ସ ଖେଳୁଥିବାର ଏକ ଚିତ୍ର ରହିଛି।

ଅନ୍ତର୍ଜାତୀୟ ଅଲିମ୍ପିକ୍ସ କମିଟି ଚାଇନାର ଭୟରେ ଏହି ଦେଶକୁ ନିଜ ନାମରେ ଖେଳିବାକୁ ଅନୁମତି ଦେଉ ନାହିଁ। କିନ୍ତୁ ଏହି ଅଲିମ୍ପିକ୍ସରେ ପାଲେଷ୍ଟାଇନ ଖେଳାଳୀ ନିଜକୁ ଏକ ଦେଶର ଖେଳାଳି ବୋଲି ମାନ୍ୟତା ପାଇଛନ୍ତି। କିନ୍ତୁ ଏଯାବତ ପାଲେଷ୍ଟାଇନ ବୋଲି କୌଣସି ଦେଶ ନାହିଁ। ଯାହାକୁ ନେଇ ବର୍ତ୍ତମାନ ଇସ୍ରାଏଲ୍ ଏବଂ ପାଲେଷ୍ଟାଇନଙ୍କ ମଧ୍ୟରେ ବିବାଦ ରହିଛି।

ଅନ୍ତର୍ଜାତୀୟ ଅଲିମ୍ପିକ୍ସ କମିଟିର ଆଭିିମୁଖ୍ୟ ନିରପେକ୍ଷ ନୁହେଁ!

ଯଦି ଅନ୍ତର୍ଜାତୀୟ ଅଲିମ୍ପିକ୍ସ କମିଟି ନିରପେକ୍ଷ ହୋଇଥାନ୍ତା, ତେବେ ଏହା ତାଇୱାନକୁ ପାଲେଷ୍ଟାଇନ ପରି ଗୋଟିଏ ଦେଶର ମାନ୍ୟତା ଦେଇଥାନ୍ତା। ଅଲିମ୍ପିକ୍ସ କମିଟି ଏଯାବତ  ସବୁବେଳେ ଚାଇନା ସମର୍ଥନରେ ସମସ୍ତ ନିଷ୍ପତ୍ତି ନିଏ। ଯାହାର ଆଉ ଏକ ଉଦାହରଣ ହଂକଂ। ଚାଇନା ହଂକଂକୁ ନିଜର ଏକ ରାଜ୍ୟ ବୋଲି ଦାବି କରେ। ଏହି କାରଣରୁ ହଂକଂକୁ ଅଲିମ୍ପିକ୍ସରେ ଏହି ନାମରେ ଖେଳିବାକୁ ଅନୁମତି ନାହିଁ। ଅଲିମ୍ପିକ୍ସ ଗେମ୍ସରେ ଏହି ଦେଶ ହଂକଂ ଚାଇନା ନାମରେ ଅଂଶଗ୍ରହଣ କରିଥାଏ ଏବଂ ଏଠାରେ ଖେଳାଳିମାନେ ସ୍ୱର୍ଣ୍ଣ ପଦକ ଜିତିଥିଲେ ମଧ୍ୟ ଜାତୀୟ ସଂଗୀତ ବଜାଯାଏ ନାହିଁ।

ହଂକଂ ଖେଳାଳି ଚାଇନା ଖେଳାଳି ଭାବରେ ଭାଗ ନିଅନ୍ତି 

ନିକଟରେ, ଟୋକିଓ ଅଲିମ୍ପିକ୍ସରେ ହଂକଂର ତରବାରୀ ଚାଳକ ବା ଫେନ୍ସର ସ୍ୱର୍ଣ୍ଣ ପଦକ ଜିତିଥିଲେ ​​ସେତେବେଳେ ପଦକ ସମାରୋହରେ ଚାଇନାର ଜାତୀୟ ସଂଗୀତ ବଜାଯାଇଥିଲା, କିନ୍ତୁ ଯେତେବେଳେ ହଂକଂ ମଲ୍‌ରେ ଏହି ସମାରୋହ ଦେଖୁଥିଲେ ସେଠିକାର ଲୋକମାନେ ଏହାକୁ ବିରୋଧ କରିଥିଲେ। ଯେଉଁମାନେ ପ୍ରତିବାଦ କରିଥିଲେ ସେମାନଙ୍କୁ ଗିରଫ କରାଯାଇଥିଲା। ସେମାନଙ୍କ ମଧ୍ୟରେ ସେଠାରେ ଜଣେ ୪୦ ବର୍ଷ ବୟସ୍କ ଜଣେ ସାମ୍ବାଦିକ ମଧ୍ୟ ଥିଲେ।

ତାଇଓ୍ୱାନ ସହ ଚାଇନାର ବିବାଦ

୧୯୫୨ ଅଲିମ୍ପିକ୍ସ ଗେମ୍ସ ପାଇଁ ଉଭୟ ତାଇୱାନ ଏବଂ ଚାଇନାକୁ ନିମନ୍ତ୍ରଣ ପଠାଯାଇଥିଲା। ସେତେବେଳେ ଉଭୟ ଦେଶର ସରକାର ନିଜକୁ ଚାଇନାରୁ ପ୍ରତିନିଧିତ୍ୱ କରନ୍ତି ବୋଲି ଦାବି କରିଥିଲେ। ତେବେ ଚାଇନାର ଚାପ ପରେ ତାଇୱାନ ନିଜ ନିଷ୍ପତ୍ତିରୁ ଓହରିଥିଲା। ୧୯୫୬ ମସିହାରେ ଯେତେବେଳେ ତାଇୱାନ ଫର୍ମୋଜା (ଏହା ଏକ ପର୍ତ୍ତୁଗୀଜ ଶବ୍ଦ, ଏହାର ଅର୍ଥ ସୁନ୍ଦର) ଚାଇନା ନାମରେ ଅଲିମ୍ପିକ୍ସ ଗେମ୍ସରେ ଭାଗ ନେଇଥିଲା। ଚାଇନା ଏହାକୁ ପସନ୍ଦ କରୁନଥିଲା ଏବଂ ଅଲିମ୍ପିକ୍ସ ଗେମ୍ସକୁ ବଏକଟ କରିବାକୁ ନିଷ୍ପତ୍ତି ନେଇଥିଲା।

ଫର୍ମୋଜା ନାକୁ ନେଇ ଦୀର୍ଘ ସମୟ ଧରି ବିବାଦ ଚାଲିଥିଲା ​​ଏବଂ ୧୯୭୨ ମସିହାରେ ତାଇୱାନକୁ ରିପବ୍ଲିକ୍ ଅଫ୍ ଚାଇନା ନାମରେ ଅଲିମ୍ପିକ୍ସରେ ଅନ୍ତର୍ଭୁକ୍ତ କରାଯାଇଥିଲା। ତେବେ ଚାଇନାର ଚାପ ପରେ ୧୯୭୯ ମସିହାରେ ଏହି ନାମ ବାତିଲ କରାଯାଇଥିଲା ଏବଂ ଅନ୍ତର୍ଜାତୀୟ ଅଲିମ୍ପିକ୍ସ କମିଟି ବେଜିଂ ସରକାରଙ୍କୁ ଚାଇନାର ସରକାରୀ ପ୍ରତିନିଧି ଭାବରେ ଗ୍ରହଣ କରିଥିଲା ​​ଏବଂ ସେହି ଦିନଠାରୁ ତାଇୱାନ ତାଇୱାନ ନାମରେ ଅଲିମ୍ପିକ୍ସ ଖେଳିପାରେ ନାହିଁ। ଏହା ଗୋଟିଏ ଦେଶ ପାଇଁ ଦୁର୍ଭାଗ୍ୟର କଥା। ବଡ କଥା ହେଉଛି ତାଇୱାନ ଉପରେ ରାଗି ଯାଇ ଚାଇନା ୩୨ ବର୍ଷ ଧରି ଅଲିମ୍ପିକ୍ସ ଗେମ୍ସରେ ଅଂଶଗ୍ରହଣ କରିନଥିଲା।

ରୁଷ କାହିଁକି ଆରଓସି ନାଁରେ ଅଲିମ୍ପିକ୍ସରେ ଭାଗ ନିଏ?

ଅନ୍ତର୍ଜାତୀୟ ଅଲିମ୍ପିକ୍ସ କମିଟିର ଏହି ଡବଲ୍ ଷ୍ଟାଣ୍ଡାର୍ଡର ଅନ୍ୟ ଏକ ଉଦାହରଣ ଯାହାକୁ ଆପଣ ରୁଷରୁ ବୁଝିବାକୁ ହେବ। ଏବେ ଅଲିମ୍ପିକ୍ସ ଗେମ୍ସରେ ରୁଷିଆ ଆରଓସି (ROC) ନାମରେ ଭାଗ ନେଇଛି। ୨୦୧୬ ରିଓ ଅଲିମ୍ପିକ୍ସରେ ଡୋପିଂ ଦୁର୍ନୀତି ପରେ ରୁଷକୁ ଏହି ଖେଳଗୁଡିକରେ ଭାଗ ନେବାକୁ ବାରଣ କରାଯାଇଥିଲା। କିନ୍ତୁ ଏହି ଖେଳଗୁଡିକରେ ପଦକ ବିଜେତାମାନଙ୍କ ମଧ୍ୟରେ ରୁଷ ବିଶ୍ୱରେ ଦ୍ୱିତୀୟ ସ୍ଥାନରେ ରହିଛି। ତେଣୁ ଅଲିମ୍ପିକ୍ସରେ ଭାଗ ନେବାକୁ ଯାଇ ଅନ୍ତର୍ଜାତୀୟ ଅଲିମ୍ପିକ୍ସ କମିଟି ନୂଆ ଉପାୟ ଦେଇ ରୁଷକୁ ଆରଓସି ଭାବରେ ଅନୁମତି ଦେଇଥିଲା। ତେବେ ରୁଷିଆ ଉପରେ ଏପରି ରୋକ୍ ଲଗାଇବା ପଛରେ ଶକୁନୀ ଚାଇନା ବୋଲି କୁହାଯାଏ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।