ଦେଶରେ ଏକକ ନିର୍ବାଚନକୁ ନେଇ ରାମନାଥ କୋବିନ୍ଦଙ୍କ କମିଟି କରିଥିବା ସୁପାରିଶକୁ ଆଜି କେନ୍ଦ୍ର କ୍ୟାବିନେଟ୍ ମଞ୍ଜୁରୀ ଦେବା ପରେ ରାଜ୍ୟ ରାଜନୀତି ଉଷ୍ମ ହୋଇଛି। ଏକକ ନିର୍ବାଚନକୁ କଂଗ୍ରେସ ସିଧାସଳଖ ବିରୋଧ କରୁଥିବାବେଳେ ମାତ୍ର ୮ ମାସ ପୂର୍ବରୁ ସମର୍ଥନ ଦେଇଥିବା ବିଜେଡି ଏବେ ବୁଲେଇବଙ୍କେଇ ବିରୋଧ ଆରମ୍ଭ କରିଛି।
ବିଜେଡି ଚଳିତ ବର୍ଷ ଜାନୁୟାରୀ ୨୪ ତାରିଖରେ ରାମନାଥ କୋବିନ୍ଦଙ୍କ ନେତୃତ୍ୱାଧୀନ ଉଚ୍ଚସ୍ତରୀୟ କମିଟିକୁ ଚିଠି ଲେଖି ଦେଶରେ ଏକକ ନିର୍ବାଚନକୁ ସମର୍ଥନ ଜଣାଇଥିଲା । ବିଭିନ୍ନ ଅବଧିରେ ଓ ପର୍ଯ୍ୟାୟରେ ଏକାଧିକ ନିର୍ବାଚନ ହେବା ଯୋଗୁ ଆର୍ଥିକ ଚାପ ଓ ଶାସନ କାର୍ଯ୍ୟରେ ବିଳମ୍ବ ହେଉଛି । ଯେଉଁଥିପାଇଁ ଦଳ ଦୀର୍ଘଦିନ ଧରି ଏକାଠି ନିର୍ବାଚନ କରିବା ଉପରେ ଗୁରୁତ୍ୱ ଦେଇଆସୁଛି । ଏକାଠି ନିର୍ବାଚନ ହେଲେ ଏସବୁ ସମସ୍ୟା ଦୂର ହୋଇଯିବ, ଆଉ ଯାହାର ଫଳସ୍ୱରୂପ ସଂଘୀୟ ସହଭାଗିତା ସୁଦୃଢ଼ ହେବା ସହ ବିକାଶ କାର୍ଯ୍ୟକ୍ରମରେ ସମନ୍ୱୟ ଓ କାର୍ଯ୍ୟାନ୍ୱୟନରେ ସୁଧାର ଆସିପାରିବ ବୋଲି ବିଜେଡି ଯୁକ୍ତି ବାଢ଼ିଛି । ଏହାସହିତ ଏହି ପ୍ରସଙ୍ଗରେ ନିର୍ଣ୍ଣାୟକ ସିଦ୍ଧାନ୍ତରେ ଉପନୀତ ହେବା ପାଇଁ ମଧ୍ୟ ଉଚ୍ଚସ୍ତରୀୟ କମିଟିଙ୍କୁ ଚିଠି ଲେଖି ଆହ୍ୱାନ ଦେଇଥିଲା।
Also Read
ଆଜି ରାମନାଥ କୋବିନ୍ଦଙ୍କ ଏହି ରିପୋର୍ଟ ଓ ସୁପାରିଶକୁ କେନ୍ଦ୍ର କ୍ୟାବିନେଟ ମଞ୍ଜୁର କରିବା ପରେ ବିଜେଡିର ସ୍ୱର ବଦଳିଯାଇଛି। ଦଳର ମୁଖପାତ୍ର ଲେନିନ୍ ମହାନ୍ତି ଓ ଦଳର ବିଧାୟକ ଗଣେଶ୍ୱର ବେହେରା ପ୍ରମୁଖ ଗଣମାଧ୍ୟମରେ ଏହାକୁ ବୁଲେଇବଙ୍କେଇ ବିରୋଧ କରିବା ଆରମ୍ଭ କରିଛନ୍ତି। ବିଜେଡି ମୁଖପାତ୍ର ଶ୍ରୀ ମହାନ୍ତି କହିଛନ୍ତି ଯେ, ଏବେ ଯଦି କୌଣସି ରାଜ୍ୟରେ ରାଷ୍ଟ୍ରପତି ଶାସନ ଲାଗୁ ହୁଏ ଓ ତା’ହେଲେ କ’ଣ ସମ୍ପୃକ୍ତ ରାଜ୍ୟ ଯଦି ଏକକ ନିର୍ବାଚନ ପାଇଁ ୪ବର୍ଷ ଅପେକ୍ଷା କରିବ କି? ସେହିପରି ବିଜେଡି ବିଧାୟକ ଶ୍ରୀ ବେହେରା କହିଛନ୍ତି ଯେ, ୨୦୨୯ ମସିହାରେ ଏକକ ନିର୍ବାଚନ ହେବାଭଳି ଲାଗୁନି । ସେତେବେଳେ ୨୮ଟି ରାଜ୍ୟ ମଧ୍ୟରୁ ପ୍ରାୟ ୧୭ଟି ରାଜ୍ୟରେ ନିର୍ବାଚିତ ସରକାରଙ୍କ କାର୍ଯ୍ୟକାଳ ମାତ୍ର ୨ବର୍ଷ ହୋଇଥିବ । ତା’ହେଲେ ସମ୍ପୃକ୍ତ ରାଜ୍ୟଗୁଡ଼ିକରେ ପୁଣିଥରେ ମଧ୍ୟବର୍ତ୍ତୀ ନିର୍ବାଚନ ଲଦି ଦିଆଯିବ କି? ବିଜେଡି ଏବେ ସିଧାସଳଖ ନହେଲେ ବି ବୁଲେଇବଙ୍କେଇ ‘ଏକକ ନିର୍ବାଚନ’କୁ ବିରୋଧ ଆରମ୍ଭ କରିଛି ।
ଏବେ ପ୍ରଶ୍ନ ଉଠୁଛି, ଏକକ ନିର୍ବାଚନ ପାଇଁ ଗଠିତ ରାମନାଥ କୋବିନ୍ଦ କମିଟି ଆଗରେ ଯେଉଁ ୪୭ଟି ରାଜନୀତିକ ଦଳ ନିଜର ମତ ରଖିଥିଲେ ସେଥିରେ ୧୫ଟି ଦଳ ସିଧାସଳଖ ଏହାକୁ ବିରୋଧ କରିଥିବାବେଳେ ବିଜେଡି କାହିଁକ ସମର୍ଥନ କରିଥିଲା ଓ ଏବେ କେଉଁ କାରଣରୁ ନିଜ ଛେପ ନିଜେ ଢ଼ୋକିବାରେ ଲାଗିଛି । ଏବେ ବିଜେଡି ଶାସନରେ ନଥିବାରୁ ନିଜର ଆଭିମୁଖ୍ୟରେ ପରିବର୍ତ୍ତନ ଆଣିଛି ନା ବିଜେପି ନେତୃତ୍ୱାଧୀନ ଏନଡିଏ ଉପରେ ଚାପ ପକାଇବାକୁ ଏଭଳି ଆଭିମୁଖ୍ୟ ପୋଷଣ କରିଛି ।
ଉଲ୍ଲେଖଯୋଗ୍ୟ, ରାମନାଥ କୋବିନ୍ଦଙ୍କ କମିଟି ପାଖରେ କେବଳ ରାଜନୀତିକ ଦଳଗୁଡ଼ିକ ନୁହଁନ୍ତି ଦେଶର ୪ଜଣ ପୂର୍ବତନ ପ୍ରଧାନ ବିଚାରପତି- ଜଷ୍ଟିସ ଦୀପକ ମିଶ୍ର, ଜଷ୍ଟିସ ରଞ୍ଜନ ଗୋଗେଇ, ଜଷ୍ଟିସ ଶରତ ଅରବିନ୍ଦ ବୋବଡେ ଓ ଜଷ୍ଟିସ ୟୁ ୟୁ ଲଳିତ ମଧ୍ୟ ଏହି ଏକକ ନିର୍ବାଚନ ସପକ୍ଷରେ ମତ ରଖିଛନ୍ତି । ସେହିପରି ପୂର୍ବତନ ମୁଖ୍ୟ ନିର୍ବାଚନ ଆୟୋଗ ଅଚଳ କୁମାର ଜୋଟି, ଓପି ରାୱତ, ସୁନୀଲ ଅରୋରା ଓ ସୁଶୀଲ ଚନ୍ଦ୍ରା ମଧ୍ୟ ଏହି ଏକକ ନିର୍ବାଚନ ପ୍ରସ୍ତାବକୁ ସମର୍ଥନ କରିଛନ୍ତି । ଏହି ସମସ୍ତ ବ୍ୟକ୍ତିମାନେ କମିଟି ଅଧ୍ୟକ୍ଷ ରାମନାଥ କୋବିନ୍ଦଙ୍କ ସହ ଆଲୋଚନାବେଳେ ନିଜର ଲିଖିତ ସମର୍ଥନ ଜଣାଇଛନ୍ତି । ବିଭିନ୍ନ ସଂଗଠନ ସମେତ ବ୍ୟବସାୟିକ ସଂଘ ଓ ସାଧାରଣ ଲୋକେ ମଧ୍ୟ ଏହି ଏକକ ନିର୍ବାଚନ ସପକ୍ଷରେ କୋବିନ୍ଦ କମିଟି ପାଖରେ ନିଜର ଆଭିମୁଖ୍ୟ ରଖିଥିବା ଆଜି ସାର୍ବଜନୀନ ହୋଇଥିବା ଏହି ଉଚ୍ଚସ୍ତରୀୟ କମିଟି ରିପୋର୍ଟରୁ ଜଣାପଡ଼ିଛି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
