“ଆମ୍ଭେ ନିଶ୍ଚିତ ଯେ ସମସ୍ତ ପ୍ରୟାସ ଅଭିଯୁକ୍ତକୁ ମାମଲାଟିରେ ଦୋଷୀ ସାବ୍ୟସ୍ତ କରାଇବ । ତେଣୁ ଏ ଦୁଃଖଦ ଘଟଣାକୁ ରାଜନୀତିକରଣ କରାନଯାଉ।” ଆଜି ବିଧାନସଭାରେ ସ୍ୱାସ୍ଥ୍ୟମନ୍ତ୍ରୀ ନବ ଦାସ ହତ୍ୟା ପ୍ରସଙ୍ଗରେ ପ୍ରାୟ ୩ଘଣ୍ଟା ଧରି ସରଗରମ ଆଲୋଚନାବେଳେ ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ଏହି ବୟାନ ରଖିବା ପରୋକ୍ଷରେ ରାଜ୍ୟ ସରକାରଙ୍କ ଆଭିମୁଖ୍ୟକୁ ସ୍ପଷ୍ଟ କରିଛି । ନବ ଦାସ ହତ୍ୟା ମାମଲାର ଅଭିଯୁକ୍ତ ଗୋପାଳ ଦାସକୁ ଦୋଷୀ ସାବ୍ୟସ୍ତ କରିବା ପାଇଁ ସବୁ ପ୍ରୟାସ ସରକାର କରୁଛନ୍ତି କିନ୍ତୁ ଗୋପାଳ କାହିଁକି ହତ୍ୟା କଲା ଓ ତା’ପଛର ରହସ୍ୟ କ’ଣ ତାହା ଉଜାଗର କରିବା ଉପରେ କ୍ରାଇମବ୍ରାଂଚ ବିଶେଷ ଗୁରୁତ୍ୱ ଦେଉନଥିବା ସ୍ପଷ୍ଟ ହୋଇଛି । ଆଲୋଚନାବେଳେ ନବ ଦାସ ହତ୍ୟା ମାମଲାରେ ଯାଜପୁର ବିଧାୟକଙ୍କୁ ତଦନ୍ତ ପରିସରକୁ ଆଣିବା ପାଇଁ ବିଜେପି ଦାବି କରିଥିବାବେଳେ କଂଗ୍ରେସ ଘଟଣାସ୍ଥଳରେ ନବଙ୍କ ମୃତ୍ୟୁ ହୋଇଥିଲେ ବି କାହିଁକି ଭୁବନେଶ୍ୱର ଆଣି ନାଟକବାଜି କରାଗଲା ବୋଲି ପ୍ରଶ୍ନ କରିଛି । ମନ୍ତ୍ରୀଙ୍କ ଉତ୍ତରରେ ଅସନ୍ତୋଷ ବ୍ୟକ୍ତ କରି ଉଭୟ ବିଜେପି ଓ କଂଗ୍ରେସ ସଦସ୍ୟମାନେ କକ୍ଷତ୍ୟାଗ କରିଥିଲେ ।
ବିରୋଧୀ ଦଳ ନେତା ଜୟନାରାୟଣ ମିଶ୍ର ଓ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ଦ୍ୱାରା ଆଗତ ପ୍ରସ୍ତାବ “ରାଜ୍ୟର ଜଣେ କ୍ୟାବିନେଟ୍ ମନ୍ତ୍ରୀଙ୍କୁ ଅମାନବୀୟ ହତ୍ୟା ଓ ଗଭୀର ଷଡ଼ଯନ୍ତ୍ର, ହତ୍ୟାର କାରଣ, ଷଡ଼ଯନ୍ତ୍ରକାରୀ ଓ ଦୁବୃର୍ତ୍ତକୁ ଚିହ୍ନଟ କରିବାରେ ପୁଲିସ ବିଫଳ” ଉପରେ ଆଜି ସନ୍ଧ୍ୟାରେ ବିଧାନସଭାରେ ପ୍ରାୟ ୩ଘଣ୍ଟା ଧରି ଆଲୋଚନା ହୋଇଥିଲା । ବିରୋଧୀ ଦଳ ନେତା ଶ୍ରୀ ମିଶ୍ର ଏହି ହତ୍ୟା ପଛରେ ଷଡ଼ଯନ୍ତ୍ର ରହିଥିବା କହିବା ସହ କ୍ରାଇମବ୍ରାଂଚ କାହିିଁକି ହତ୍ୟା ପଛର କାରଣକୁ ଉଜାଗର କରୁନି । ତଦନ୍ତକୁ କେବଳ ଗୋପାଳ ଦାସଙ୍କ ମଧ୍ୟରେ ସୀମିତ ରଖି ବ୍ୟବସାୟିକ ଓ ରାଜନୀତିକ ଦିଗକୁ କାହିଁକି ବାଦ୍ ଦେଇଛି ବୋଲି ପ୍ରଶ୍ନ କରିଥିଲେ । ଏହାସହିତ ଯାଜପୁର ବିଧାୟକଙ୍କୁ ଏହି ମାମଲାରେ ତଦନ୍ତ ପରିସରଭୁକ୍ତ କରିବା ସହ ସିବିଆଇ ତଦନ୍ତ ଦାବି କରିଥିଲେ ।
Also Read
ସେହିପରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କ୍ରାଇମବ୍ରାଂଚ ତଦନ୍ତ ଉପରେ ପ୍ରଶ୍ନ ଉଠାଇବା ସହ ହାଇକୋର୍ଟଙ୍କ ତଦାରଖରେ ଏସଆଇଟି ତଦନ୍ତ ପାଇଁ ଦାବି କରିଥିଲେ । ଏବେ ହାଇକୋର୍ଟ ଯେଉଁ ବିଚାରପତି ନିଯୁକ୍ତି ଦେଇଛନ୍ତି ତାହା ପ୍ରଶାସନିକ ଅର୍ଡରରେ । କିନ୍ତୁ ଜୁଡିସିଆଲ ଅର୍ଡରରେ ହାଇକୋର୍ଟଙ୍କ ତଦାରଖରେ ଏସଆଇଟି ତଦନ୍ତ କରିବା ନିମନ୍ତେ ରାଜ୍ୟ ସରକାର ଚିଠି ଲେଖନ୍ତୁ । ନବ ଦାସଙ୍କୁ ଗୁଳିବଦ୍ଧ ହେବାପରେ ତାଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବାର ପୋଷ୍ଟମର୍ଟମ ରିପୋର୍ଟ କହୁଥିବାବେଳେ ଏୟାରପୋର୍ଟରେ କାହିଁକି ଏତେ ସମୟ ପକାଇ ରଖାଗଲା, ଭୁବନେଶ୍ୱର ଆଣି କାହିଁକି ନାଟକବାଜି କରାଗଲା ବୋଲି ସେ ପ୍ରଶ୍ନ କରିଥିଲେ ।
ଅନ୍ୟପକ୍ଷରେ ଆଲୋଚନାର ଉତ୍ତର ରଖି ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା କହିଥିଲେ ଯେ, ମନ୍ତ୍ରୀ ନବ ଦାସଙ୍କୁ ୨୦୨୩ ଜାନୁୟାରୀ ୨୯ତାରିଖରେ ପୁଲିସ ଏଏସଆଇ ଗୋପାଳ ଦାସ ନିଜ ସର୍ଭିସ ପିସ୍ତଲରୁ ଗୁଳି କରିଥିଲା । ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି । ସରକାର ଏହି ଘଟଣାର ଗୁରୁତ୍ୱକୁ ଉପଲବ୍ôଧ କରି ରାଜ୍ୟ ସରକାର କ୍ରାଇମବ୍ରାଂଚକୁ ତୁରନ୍ତ ମକଦ୍ଦମାର ତଦନ୍ତଭାର ଦେଇଥିଲେ । ତଦନ୍ତରେ ସ୍ୱଚ୍ଛତା ପାଇଁ ଓ ମାମଲାର ତଦାରଖ ପାଇଁ ରାଜ୍ୟ ସରକାର ଜାନୁୟାରୀ ୩୦ରେ ହାଇକୋର୍ଟଙ୍କୁ ଚିଠି ଲେଖି ଅନୁରୋଧ କରିଥିଲେ । ଫେବୃୟାରୀ ୧ରେ ହାଇକୋର୍ଟ ତାଙ୍କ ଚିଠି ମାଧ୍ୟମରେ ହାଇକୋର୍ଟର ଅବସରପ୍ରାପ୍ତ ବିଚାରପତି ଜେପି ଦାସଙ୍କୁ ମନୋନୀତ କରିଥିବା ନେଇ ସରକାରଙ୍କୁ ଅବଗତ କରାଇଥିଲେ ।
ତଦନ୍ତ ସମୟରେ ପ୍ରତ୍ୟକ୍ଷଦର୍ଶୀଙ୍କ ସହିତ ଅନ୍ୟାନ୍ୟ ସାକ୍ଷୀ, ନବ ଦାସଙ୍କ ପରିବାରବର୍ଗ, ସମ୍ପର୍କୀୟ, ବନ୍ଧୁବାନ୍ଧବ, ପଡ଼ୋଶୀ ଓ ସହକର୍ମୀଙ୍କୁ ପଚରାଉଚୁରା କରାଯାଇଛି । ବୈଜ୍ଞାନିକ ପଦ୍ଧତିରେ ତଦନ୍ତ ପାଇଁ ପ୍ରମାଣ ସଂଗ୍ରହ ଓ ଅପରାଧିକ ଦୃଶ୍ୟକୁ ସଂରକ୍ଷଣ ନିମନ୍ତେ ବିଭିନ୍ନ ବୃତ୍ତିଗତ ଅଧିକାରୀଙ୍କ ସହାୟତା ନିଆଯାଇଛି । ଅଭିଯୁକ୍ତର ପଲିଗ୍ରାଫ ଓ ନାର୍କୋ ଟେଷ୍ଟ କରାଯାଇଛି । ସିଆରପିସିର ୧୬୪ରେ ଅଭିଯୁକ୍ତ ଗୋପାଳ ଦାସର ବିବୃତି ରେକର୍ଡ କରାଯାଇଛି । ସେ ମନ୍ତ୍ରୀ ନବ ଦାସଙ୍କୁ ହତ୍ୟା କରିଥିବା ସ୍ୱୀକାର କରିଛି । ମାମଲାର ପାରିପାଶ୍ୱିର୍କ ପରିସ୍ଥିତିକୁ ଦେଖି ତଦନ୍ତରେ ଏଫବିଆଇର ସହାୟତା ନେବାକୁ କେନ୍ଦ୍ର ଗୃହ ମନ୍ତ୍ରଣାଳୟ ରାଜ୍ୟ ଗୃହ ବିଭାଗ ଅନୁରୋଧ କରିଛି । ମାମଲାଟିର ତଦନ୍ତ ଚାଲୁ ରହିଛି । ରାଜ୍ୟ କ୍ରାଇମବ୍ରାଂଚ ମାମଲାଟିର ବିଭିନ୍ନ ସମ୍ଭାବ୍ୟ ଦିଗକୁ ନେଇ ପରୀକ୍ଷା କରୁଛି । ଅପରାଧର ମୂଳରେ ପହଂଚିବା ଓ ମାମଲାଟିରେ ଦୋଷୀ ସାବ୍ୟସ୍ତ କରାଇବା ଭଳି ୨ଟି ଦିଗକୁ ନେଇ ବୃତ୍ତିଗତ ଓ ସ୍ୱଚ୍ଛ ପ୍ରଣାଳୀରେ ମାମଲାଟିର ତଦନ୍ତ କରାଯାଉଛି ।
ତେଣୁ କଳ୍ପନା ଉପରେ ଆଧାର କରି ଅଯଥା ଭିତ୍ତିହୀନ ଅଭିଯୋଗ କରିବାଠୁ ଦୂରେଇ ରହିବାକୁ ମନ୍ତ୍ରୀ ଶ୍ରୀ ବେହେରା କହିଥିଲେ । ରାଜ୍ୟ କ୍ରାଇମବ୍ରାଂଚ ସମସ୍ତ ଦିଗକୁ ଦୃଷ୍ଟିରେ ରଖି ତଦନ୍ତ କରୁଛନ୍ତି । ଜଣେ ପ୍ରିୟ ସହକର୍ମୀଙ୍କ ଦୁଃଖଦ ମୃତ୍ୟୁ ଘଟଣାକୁ ରାଜନୀତିକରଣ କରାନଯିବା ପାଇଁ ସେ ଅନୁରୋଧ କରିଥିଲେ ।
ସୂଚନାଯୋଗ୍ୟ, ନବ ଦାସ ହତ୍ୟା ମାମଲାରେ ଗତକାଲି ମୁଖ୍ୟମନ୍ତ୍ରୀ ଓ ଆଜି ଗୃହ ରାଷ୍ଟ୍ରମନ୍ତ୍ରୀ ବିଧାନସଭାରେ ସ୍ପଷ୍ଟୀକରଣ ରଖିଥିଲେ ମଧ୍ୟ ହତ୍ୟା ପଛର କାରଣ ୨୫ଦିନ ପରେ କାହିଁକି ଉନ୍ମୋଚନ ହୋଇପାରୁନି ଏବଂ ହତ୍ୟାକୁ ନେଇ ରାଜନୀତିକ ଓ ବ୍ୟବସାୟିକ ଦିଗରେ ତଦନ୍ତକୁ ତ୍ୱରାନ୍ୱିତ କାହିଁକି କରାଯାଉନି, ସେ ନେଇ କୌଣସି ଉତ୍ତର ରଖିନାହାନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
