ବାଙ୍ଗାଲୋରର ବ୍ୟାଟ୍ସମ୍ୟାନଙ୍କୁ ଆଉଟ୍ କରିବା ଆମ ପାଇଁ ଚ୍ୟାଲେଞ୍ଜ ହେବ: ଭୁବନେଶ୍ୱର କୁମାର

ନୂଆଦିଲ୍ଲୀ: ଆସନ୍ତାକାଲି ଖେଳା ଯିବ ଚଳିତ ଆଇପିଏଲ୍‌ର ଫାଇନାଲ୍ ମ୍ୟାଚ୍। ଏଥିରେ ମୁହାଁମୁହିଁ ହେବେ ରୋୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର ଓ ସନ୍‌ରାଇଜର୍ସ ହାଇଦ୍ରାବାଦ। ତେବେ ତା’ପୂର୍ବରୁ ହାଇଦ୍ରାବାଦର ବୋଲର ଭୁବନେଶ୍ୱର କୁମାର କହିଛନ୍ତି ଯେ ବାଙ୍ଗାଲୋରର ବ୍ୟାଟ୍ସମ୍ୟାନ ମାନଙ୍କୁ ଆଉଟ୍ କରିବା ତାଙ୍କ ଦଳର ବୋଲରମାନଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ।

ସେ କହିଛନ୍ତି,“ବାଙ୍ଗାଲୋରର ବ୍ୟାଟ୍ସମ୍ୟାନଙ୍କୁ ଆଉଟ୍ କରିବା ପାଇଁ ଆମକୁ ସ୍ୱତନ୍ତ୍ର ରଣକୌଶଳ ପ୍ରସ୍ତୁତ କରିବାକୁ ପଡ଼ିବ। ବାଙ୍ଗାଲୋର ପକ୍ଷରୁ ୩୫ ପ୍ରତିଶତ ରନ୍ ବିରାଟ କୋହଲି କରୁଛନ୍ତି। ବିରାଟ, ଗେଲ୍ ଓ ଏବି ଡି ଭିଲିୟର୍ସଙ୍କୁ ଆଉଟ୍ କରିବା ଆମ ପାଇଁ ବଡ଼ କାର୍ଯ୍ୟ ହେବ। ଆମେ ଭାବୁଛୁ ଫାଇନାଲରେ ଭଲ ଲଢ଼େଇ ଦେଖିବାକୁ ମିଳିବ।”

ଗତକାଲି ଗୁଜରାଟକୁ ହରାଇ ଫାଇନାଲରେ ପହଞ୍ଚିଥିଲା ହାଇଦ୍ରାବାଦ ଦଳ। ଦଳ ପାଇଁ ଏହି ବିଜୟ ଆଣି ଦେଇଥିଲେ ଡେଭିଡ୍ ୱାର୍ନର। ସେ ୫୮ ବଲ୍‌ରୁ ୯୩ ରନ୍ କରି ଅପରାଜିତ ରହିଥିଲେ।