ବାତ୍ୟା ‘ନିସର୍ଗ’ରେ ଫସିଲେ ଟିମ୍ ଇଣ୍ଡିଆ କୋଚ୍ ରବି ଶାସ୍ତ୍ରୀ, ଶେଆର୍ କଲେ ଭିଡିଓ

ନୂଆଦିଲ୍ଲୀ: ପଶ୍ଚିମବଙ୍ଗରେ ଅମ୍ଫାନ୍ ପରେ ଏବେ ମହାରାଷ୍ଟ୍ରରେ ବାତ୍ୟା ‘ନିସର୍ଗ’ ମଧ୍ୟ ଖୁବ ତାଣ୍ଡବ ରଚିଛି। କରୋନା ଭାଇରସ୍ କବଳରେ ଫସିଥିବା ମହାରାଷ୍ଟ୍ରର ଅଧିକାଂଶ ସ୍ଥାନରେ ନିସର୍ଗର ତାଣ୍ଡବ ଦେଖିବାକୁ ମିଳିଛି। କିଛି ସ୍ଥାନରେ ପ୍ରବଳ ପବନ ସାଙ୍ଗକୁ ବର୍ଷା ମଧ୍ୟ ହୋଇଥିଲା, ଯେଉଁଥିରେ ଅନେକ ଗଛ ଭାଙ୍ଗି ପଡ଼ିଛି।

ଏପରିକି ପବନରେ ବିଭିନ୍ନ ବିଲ୍ଡିଂର ଛାତ ମଧ୍ୟ ଉଡ଼ିଯାଇଥିବା ବେଳେ ଏକାଧିକ ଗାଡ଼ି ଚୁରମାର୍ ହୋଇଯାଇଛି। ନିଗର୍ସ ସର୍ବପ୍ରଥମେ ଅଲିବାଗରେ ଲ୍ୟାଣ୍ଡଫଲ୍ କରିଥିଲା ଏବଂ ପରେ ରତ୍ନଗିରି ମୁହାଁ ହୋଇଥିଲା। ଏହି ବାତ୍ୟାର ପ୍ରଭାବ ଟିମ୍ ଇଣ୍ଡିଆର ମୁଖ୍ୟ କୋଚ୍ ରବି ଶାସ୍ତ୍ରୀଙ୍କ ଉପରେ ମଧ୍ୟ ପଡ଼ିଛି।


ବାତ୍ୟା ସମୟରେ ଶାସ୍ତ୍ରୀ ନିଜ ଘର ଭିତରେ ଫସି ରହିଥିଲେ ଏବଂ ବାହାରକୁ ବାହାରିପାରିନଥିଲେ। ତେବେ ବାତ୍ୟା ସମୟର ଭିଡିଓ ଶାସ୍ତ୍ରୀ ନିଜ ଟ୍ୱିଟର ଆକାଉଣ୍ଟରେ ଶେଆର୍ କରିଛନ୍ତି।

ଜୀବନରେ ପ୍ରଥମଥର ଲାଗି ଏଭଳି ବାତ୍ୟାକୁ ଆଖି ଆଗରେ ଦେଖି ଶାସ୍ତ୍ରୀ ଭୟଭୀତ ହୋଇପଡ଼ିଛନ୍ତି। ଶାସ୍ତ୍ରୀ ଟ୍ୱିଟ୍ କରି ଲେଖିଛନ୍ତି, “ଏଭଳି ଭୟାବହ ଦୃଶ୍ୟ ପୂର୍ବରୁ କେବେବି ଦେଖିନାହିଁ। ୧୦୦ କିମି ବେଗରେ ପବନ ଦେଖି ମୁଁ ଭୟଭୀତ।”