‘ଡିଜିଙ୍କ ପୁଅକୁ ଯଦି ୧୫ ବର୍ଷ ଜେଲ୍‌, ତେବେ ସାଧାରଣ ଲୋକଙ୍କୁ କେତେ ବର୍ଷ?’: ନ୍ୟାୟ ବ୍ୟବସ୍ଥା ଉପରେ ପ୍ରଶ୍ନ ଉଠାଇଲେ ବିତ୍ତିହୋତ୍ର

କଟକ: ବହୁ ବିଳମ୍ୱରେ ନ୍ୟାୟ ମିଳିଲା। ତଥାପି ଭାରତୀୟ ନ୍ୟାୟ ବ୍ୟବସ୍ଥା ଉପରେ ବିଶ୍ୱାସ ରହିଛି। ଏହି ବ୍ୟବସ୍ଥାରେ ଉନ୍ନତି ଆବଶ୍ୟକ ରହିଛି। ଯଦି ଜଣେ ଡିଜିଙ୍କ ପୁଅଙ୍କୁ ନ୍ୟାୟ ମିଳିବା ପାଇଁ ୧୫ ବର୍ଷ ଲାଗୁଛି, ତାହାହେଲେ ସାଧାରଣ ଲୋକଙ୍କୁ କେତେ ବର୍ଷ ଲାଗିବ? ଏହା ଉପରେ ଏବେ କାମ କରିବାକୁ ଚାହୁଁଛି। ଏଲ୍‌ଏଲ୍‌ବି ପଢ଼ି ଗରିବ ବନ୍ଦୀଙ୍କୁ ନ୍ୟାୟ ଦେବା ପାଇଁ ଆଗାମୀ ଦିନରେ କାମ କରିବି ବୋଲି କହିଛନ୍ତି ଓଡ଼ିଶାର ପୂର୍ବତନ ହୋମଗାର୍ଡ ଡିଜି ବିଦ୍ୟାଭୂଷଣ ମହାନ୍ତିଙ୍କ ପୁଅ ବିତ୍ତିହୋତ୍ର ମହାନ୍ତି। ଜର୍ମାନୀ ଯୁବତୀ ବଳାତ୍କାର ଅଭିଯୋଗରେ ରାଜସ୍ଥାନ ଜେଲ୍‌ରେ ବନ୍ଦୀ ଜୀବନ କାଟୁଥିଲେ। ସୁପ୍ରିମକୋର୍ଟରୁ ସର୍ତ୍ତମୂଳକ ଜାମିନ୍‌ ପାଇବା ପରେ ସେ ଜେଲରୁ ମୁକୁଳି ଗତକାଲି ଜନ୍ମସ୍ଥାନ ନିଜ ଘର କଟକକୁ ଆସିଛନ୍ତି।

ସେ କହିଛି-“ଭାରତରେ ନ୍ୟାୟିକ ବ୍ୟବସ୍ଥା ଜଟିଳ। ବେଲ୍‌ ମିଳୁନି। ଯଦି ବେଲ୍‌ ମିଳୁଛି ବିଳମ୍ୱ ହେଉଛି, ଫେର୍‌ ଶୁଣାଣି ହୋଇପାରୁନି। ମାମଲାର ଶୁଣାଣି ନମ୍ୱର ଆସୁବା ପାଇଁ ବର୍ଷବର୍ଷ ଲାଗି ଯାଉଛି। ଫଳରେ ଜେଲ ଜୀବନ ବିତାଉଛନ୍ତି ଅନେକ କଏଦୀ।”

ସେ ଆହୁରି ମଧ୍ୟ କହିଛନ୍ତି-“ବନ୍ଦୀ ଜୀବନ ଭିତରେ ଦେଖିଛି ଜେଲ୍‌ରେ ବହୁ ନିର୍ଯାତନା ଦିଆଯାଉଛି। ଜେଲ କର୍ମଚାରୀମାନେ ଦିଆସିଲ୍‌ ବକ୍ସ ପାଇଁ ଲାଞ୍ଚ ନେଉଛନ୍ତି। ବିଶେଷକରି ଗରିବ ବନ୍ଦୀଙ୍କୁ ବହୁ ନିର୍ଯାତନା ଦିଆଯାଉଛି। ଏବେ ସାମାଜିକ କାମ କରିବାକୁ ଚାହୁଁଛି। ଯେଉଁ ଗରିବ ଲୋକ ଅସୁବିଧାରେ ପଡ଼ିଥିବେ ତାକୁ ସାହାର୍ଯ୍ୟ କରିବାକୁ ଚେଷ୍ଟାକରିବି।”