ଗୋଟିଏ ନମ୍ବରରେ ଚାଲିଥିଲା ଦୁଇଟି ବସ୍, ଗୋଟିଏ ଜବତ

କେନ୍ଦ୍ରାପଡ଼ା: ଗୋଟିଏ ନମ୍ବରରେ ଦୁଇଟି ବସ୍ ଚାଲିଥିବା ଅଭିଯୋଗ ପାଇବା ପରେ କେନ୍ଦ୍ରାପଡ଼ା ଆର୍‌ଟିଓ ଗୋଟିଏ ବସ୍‌କୁ ଜବତ କରିଥିବା ବେଳେ ଅନ୍ୟ ବସ୍‌ଟିକୁ ଜବତ କରିବାକୁ ତନାଘନା ଚଳାଇଛି। ଜବତ ବସ୍‌ଟିର ରୋଡ୍ ପରିମିଟ୍ ନାହିଁ କି ଇନ୍‌ସ୍ୟୁରାନ୍ସ ବି ନାହିଁ।

ଓଆର୍‌ ୦୨ ଏଜେଡ୍ ୬୪୧୨ ନମ୍ବରରେ ଚାଲିଥିଲା ଦୁଇଟି ବସ୍। ଦୁଇଟି ଯାକ ବସ୍‌ର ରଙ୍ଗ ଏକା। ଗାଡ଼ି ଦୁଇଟିର ସାଜସଜ୍ଜା ବି ଏକା। ଯିଏ ଦେଖିବ, ସେ ଧୋକା ଖାଇଯିବ। ହେଲେ ଦୁଇଟି ବସ୍‌ର ଆଗରେ ଲେଖାଯାଇଥିବା ସାଇନ୍‌ବୋର୍ଡ ଥିଲା ଅଲଗା ଅଲଗା। ଗୋଟିଏ କେନ୍ଦ୍ରାପଡ଼ାର ରାଜନଗରରୁ ଭୁବନେଶ୍ୱର ଯାଉଥିଲା। ଅନ୍ୟଟି  କେନ୍ଦ୍ରାପଡ଼ା ଦେଇ କଟକରୁ ଚାନ୍ଦବାଲି ଯାଉଥିଲା।   ଗୋଟିଏ ନମ୍ବରରେ ଦୁଇଟି ବସ୍‌କୁ ଭିନ୍ନ ଭିନ୍ନ ସ୍ଥାନକୁ ଚଳାଇ ଦୀର୍ଘ ଦିନ ହେଲେ ଖଜଣା ଠକି ଚାଲିଥିଲେ ଉକ୍ତ ବସ୍ ମାଲିକ। କୌଣସି ସୂତ୍ରରୁ ଖବର ପାଇ କେନ୍ଦ୍ରାପଡ଼ା ଆର୍‌ଟିଓ ଗୋଟିଏ ବସ୍‌କୁ ଜବତ କରିଛି। ଅନ୍ୟଟିକୁ ଜବତ କରିବାକୁ ତନାଘନା ଚଳାଇଛି।