ଦିଲ୍ଲୀପ କୁମାରଙ୍କୁ ପଦ୍ମବିଭୂଷଣ ସମ୍ମାନରେ ସମ୍ମାନିତ କରାଗଲା

ନୂଆଦିଲ୍ଲୀ: ବଲିଉଡ୍ ଅଭିନେତା ଦିଲ୍ଲୀପ କୁମାରଙ୍କୁ ଆଜି ପଦ୍ମବିଭୂଷଣ ସମ୍ମାନରେ ସମ୍ମାନିତ କରାଯାଇଛି। କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ମୁମ୍ୱାଇସ୍ଥିତ ଦିଲୀପଙ୍କ ବାସଭବନକୁ ତାଙ୍କୁ ଏହି ସମ୍ମାନ ପ୍ରଦାନ କରିଛନ୍ତି। ଏପ୍ରିଲରେ ସ୍ୱାସ୍ଥ୍ୟଗତ କାରଣରୁ ନୂଆଦିଲ୍ଲୀରେ ଆୟୋଜିତ ଉତ୍ସବରେ ଦିଲ୍ଲୀପ ଯୋଗଦେଇପାରି ନ ଥିଲେ। ତେଣୁ ଆଜି ତାଙ୍କୁ ସ୍ୱତନ୍ତ୍ର ଭାବେ ଭାରତ ସରକାରଙ୍କ ପକ୍ଷରୁ ସମ୍ମାନିତ କରାଯାଇଛି।

ଦିଲ୍ଲୀପ କୁମାରଙ୍କ ପ୍ରକୃତ ନାଁ ୟୁସୁଫ ଖାନ। ଫିଲ୍ମ ଜଗତରେ ପାଦଦେବା ପରେ ଯୁସୁଫରୁ ସେ ହୋଇଯାଇଥିଲେ ଦିଲ୍ଲୀପ। ଆଉ ଏହି ନାଁ ତାଙ୍କୁ ଆଣିଦେଇଥିଲା ଢେର ସଫଳତା। ଆନ୍, ଦାଗ୍, ଦେବଦାସ, ମଧୁମତୀ, ପେଗାମ୍, ମୁଗଲେ-ଇ-ଆଜମ୍, ଗଙ୍ଗାଜମୁନା ଭଳି ଅନେକ ହିଟ୍ ଫିଲ୍ମରେ ସେ ହିରୋ ଥିଲେ। ଗତ ୧୧ ତାରିଖରେ ସେ ୯୩ ବର୍ଷରେ ପଦାର୍ପଣ କରିଛନ୍ତି। ତେବେ ଚେନ୍ନାଇ ବନ୍ୟାସ୍ଥିତିକୁ ଦୃଷ୍ଟିରେ ରଖି ସେ ନିଜ ଜନ୍ମଦିନ ପାଳନ କରିନାହାନ୍ତି।