ଔରାଙ୍ଗାବାଦ: ଦେଶରେ ଚାଷୀ ଆନ୍ଦୋଳନ ତୀବ୍ର ହେବା ପଛରେ ପାକିସ୍ତାନ ଏବଂ ଚାଇନାର ହାତ ରହିଛି। କେନ୍ଦ୍ରମନ୍ତ୍ରୀ ରାଓସାହେବ ଦାନଭେ ବୁଧବାର ଏହା କହିଛନ୍ତି। ସଂଶୋଧିତ ନାଗରିକତା ଅଧିନିୟମ (ସିଏଏ) ଏବଂ ନ୍ୟାସନାଲ ରେଜିଷ୍ଟର ଅଫ୍ ସିଟିଜେନ୍ସ (ଏଆରସି)କୁ ନେଇ ମୁସଲମାନଙ୍କୁ ବିଭ୍ରାନ୍ତି କରାଯାଇଥିଲା। ଏଯାବତ କୌଣସି ମୁସଲମାନ ଦେଶ ଛାଡ଼ିଛନ୍ତି କି ବୋଲି ସେ ପ୍ରଶ୍ନ କରିଛନ୍ତି। ଏହି ଉଦ୍ୟମ ସଫଳ ହୋଇନି। ଏବେ ସବୁ ବିଫଳ ହେବାରୁ ଚାଷୀଙ୍କୁ ଭ୍ରମିତ କରାଯାଉଛି ବୋଲି ଦାନଭେ କହିଛନ୍ତି।
ବୁଧବାର କେନ୍ଦ୍ରମନ୍ତ୍ରୀ ମହାରାଷ୍ଟ୍ରର ଜାଲନା ଜିଲ୍ଲାରେ ଏକ ସ୍ୱାସ୍ଥ୍ୟ କେନ୍ଦ୍ରର ଉଦଘାଟନ କରିଥିଲେ। ଏହି ଅବସରରେ ସେ ଏଭଳି ମତ ରଖିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ହେଉଛନ୍ତି କୃଷକମାନଙ୍କର ପ୍ରଧାନମନ୍ତ୍ରୀ ଏବଂ ତାଙ୍କ ନିଷ୍ପତ୍ତି କୃଷକଙ୍କ ବିରୋଧରେ ହେବ ନାହିଁ ବୋଲି ସେ କହିଛନ୍ତି।
ପୂର୍ବରୁ ସମସ୍ତ ଉଦ୍ୟମ ସଫଳ ହୋଇପାରି ନାହିଁ। ଏବେ ଚାଷୀମାନଙ୍କୁ ମୋହରା କରି ଭ୍ରମିତ କରାଯାଉଛି ବୋଲି ସେ କହିଛନ୍ତି। ଏହା ଦେଶର ଅନ୍ୟତମ ଷଡ଼ଯନ୍ତ୍ର। ଚାଷୀ ଆନ୍ଦୋଳନ ପଛରେ ଉଭୟ ପଡୋଶୀ ଦେଶ ଅଛନ୍ତି ବୋଲି କହିଛନ୍ତି। ହେଲେ କେଉଁ ଆଧାରରେ ମନ୍ତ୍ରୀ କହିଛନ୍ତି ତାହା ସ୍ପଷ୍ଟ କରି ନାହାନ୍ତି।
ତେବେ କେନ୍ଦ୍ରମନ୍ତ୍ରୀଙ୍କ ଏହି ମନ୍ତବ୍ୟକୁ କଟାକ୍ଷ କରିଛି ଶିବସେନା। ଶିବସେନା ମୁଖପାତ୍ର ତଥା ପୂର୍ବତନ କେନ୍ଦ୍ର ମନ୍ତ୍ରୀ ଅରବିନ୍ଦ ସାୱନ୍ତ କହିଛନ୍ତି ଯେ ମହାରାଷ୍ଟ୍ରରେ କ୍ଷମତା ହରାଇବା କାରଣରୁ ବିଜେପି ନେତା ନିଜ ଅସ୍ଥିତ୍ୱ ହରାଇଛନ୍ତି। ସେମାନେ ଏବେ କଣ କହୁଛନ୍ତି, କଣ କରୁଛନ୍ତି ଧାରଣା ନାହିଁ ବୋଲି ସାଓ୍ୱନ୍ତ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
