ନୂଆଦିଲ୍ଲୀ: କରୋନା ମୁକାବିଲା ପାଇଁ ଜାରି ହୋଇଥିବା ଲକଡାଉନ ଗାଇଡଲାଇନକୁ ରାଜ୍ୟ ସରକାରମାନେ ନିଜ ଇଚ୍ଛା ଅନୁସାରେ ବଦଳାଇ ପାରିବେ ନାହିଁ। କେନ୍ଦ୍ର ଜାରି କରୁଥିବା ଗାଇଡଲାଇନକୁ ସମସ୍ତେ ପାଳନ କରିବାକୁ ବାଧ୍ୟ। କୌଣସି ରାଜ୍ୟ ଲକଡାଉନ ନିୟମକୁ ଦୁର୍ବଳ କରି ନିଜ ଇଚ୍ଛା ଅନୁସାରେ ସ୍ଥାନୀୟ ଅଞ୍ଚଳରେ କାମ କରିବାକୁ ଅନୁମତି ଦେଇ ପାରିବେ ନାହିଁ ବୋଲି ଆଜି କେନ୍ଦ୍ର ସରକାରଙ୍କ ପକ୍ଷରୁ ଦେଶର ସବୁ ରାଜ୍ୟ ସରକାରମାନଙ୍କୁ ଅବଗତ କରାଇ ଦିଆଯାଇଛି।
ଦେଶର ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ସ୍ୱରାଷ୍ଟ୍ର ସଚିବ ଅଜୟ ଭାଲ୍ଲା ଲେଖିଥିବା ଚିଠିରେ କୁହାଯାଇଛି ଯେ କେନ୍ଦ୍ର ସରକାର ଜାରି କରିଥିବା ଗାଇଡଲାଇନ ଅନୁସାରେ ଲକଡାଉନ ବେଳେ ବିଭିନ୍ନ କାର୍ଯ୍ୟକୁ ଅନୁମତି ମିଳିବ। କରୋନା ସଂକ୍ରମିତ ହୋଇ ନଥିବା ଅଞ୍ଚଳରେ ୨୦ ତାରିଖରୁ ଯେଉଁ ସବୁ କ୍ଷେତ୍ରକୁ ଖୋଲିବାକୁ କୁହାଯାଇଛି ସେସବୁ କାର୍ଯ୍ୟକ୍ଷମ ହେବ। ଏହାବାଦ ରାଜ୍ୟ ସରକାରମାନେ ନିଜ ଇଚ୍ଛାରେ କୌଣସି କାମକୁ ଆରମ୍ଭ କରିବା ପାଇଁ ଅନୁମତି ଦେଇ ପାରିବେ ନାହିଁ।
କିଛି ରାଜ୍ୟରେ ନିଜସ୍ୱ ଗାଇଡଲାଇନ ଜାରି କରି ବିଭିନ୍ନ କାମକୁ ଅନୁମତି ଦେବା ସହ କୋଭିଡ-୧୯ ଲକଡାଉନ ନିୟମକୁ କୋହଳ କରିବାକୁ ଚେଷ୍ଟା କରୁଥିବା ନଜରକୁ ଆସିଛି। ହେଲେ ଲକଡାଉନ ସମୟରେ କ’ଣ କୋହଳ ହେବ ସେ ବିଷୟରେ ସ୍ୱରାଷ୍ଟ୍ର ମନ୍ତ୍ରଣାଳୟ ହିଁ ଗାଇଡଲାଇନ ଜାରି କରିବେ।
ଏହାକୁ ସମସ୍ତ ରାଜ୍ୟ ମାନିବାକୁ ବାଧ୍ୟ। ସ୍ୱରାଷ୍ଟ୍ର ମନ୍ତ୍ରଣାଳୟ ଗାଇଡଲାଇନରେ କୋହଳ କରାଯାଇ ନଥିବା କ୍ଷେତ୍ରକୁ ରାଜ୍ୟମାନେ କାର୍ଯ୍ୟକ୍ଷମ କରିବାକୁ ଅନୁମତି ଦେଇପାରିବେ ନାହିଁ। ତେଣୁ ରାଜ୍ୟ ସରକାରମାନେ କଡ଼ାକଡ଼ି ଭାବେ ଏହି ନିୟମକୁ ପାଳନ କରନ୍ତୁ ବୋଲି ଚିଠିରେ ଲେଖାଯାଇଛି।
କେରଳ ସରକାର ଦୁଇଟି ଜୋନରେ ଲକଡାଉନ ନିୟମକୁ କୋହଳ କରିବା ସହ ଘରୋଇ ଗାଡ଼ି ଚଳାଚଳ କରିବାକୁ ଅନୁମତି ଦେଇଥିଲେ। ସେହିପରି ନିଜ ଇଚ୍ଛାରେ ଯୁଗ୍ମ-ଅଯୁଗ୍ମ ଗାଡ଼ି ଚଳାଚଳ ନିୟମ ପ୍ରଣୟନ କରିଥିଲେ। ଖାଲି ସେତିକି ନୁହେଁ ଆଜିଠାରୁ ହୋଟେଲ ଓ ରେଷ୍ଟୁରାଣ୍ଟରେ ବସିକି ଖାଇ ହେବ ବୋଲି କେରଳ ସରକାର ଗାଇଡଲାଇନ ଜାରି କରିଥିଲେ।
ରାଜସ୍ଥାନ ସରକାର ମଧ୍ୟ ପରିବର୍ତ୍ତିତ ଗାଇଡଲାଇନ ଜାରି କରିବାକୁ ଘୋଷଣା କରିଥିଲେ। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ସବୁ ରାଜ୍ୟକୁ ଗାଇଡଲାଇନ ପାଳନ କରିବାକୁ ତାଗିଦ କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
