ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶ୍ରୀମଦ ଭଗବଦ ଗୀତାର ଶ୍ଳୋକ ଉପରେ ୨୧ ଜଣ ବିଦ୍ୱାନଙ୍କର ବ୍ୟାଖ୍ୟା ଥିବା ପାଣ୍ଡୁଲିପିର ଉନ୍ମୋଚନ କରିଛନ୍ତି। ଏହି ଅବସରରେ ଜମ୍ମୁ ଓ କଶ୍ମୀରର ଉପରାଜ୍ୟପାଳ ଶ୍ରୀ ମନୋଜ ସିହ୍ନା ଏବଂ ଜମ୍ମୁ ଓ କଶ୍ମୀର ଧର୍ମାର୍ଥ ଟ୍ରଷ୍ଟର ଅଧ୍ୟକ୍ଷ ଟ୍ରଷ୍ଟି ଡ. କରଣ ସିଂ ଉପସ୍ଥିତ ଥିଲେ। ଏହି ଅବସରରେ ପ୍ରଧାନମନ୍ତ୍ରୀ ଭାରତୀୟ ଦର୍ଶନ ଉପରେ ଡ. କରଣ ସିଂଙ୍କ ଦ୍ୱାରା କରାଯାଇଥିବା କାର୍ଯ୍ୟକୁ ପ୍ରଶଂସା କରିଥିଲେ। ତାଙ୍କର ପ୍ରୟାସ ଜମ୍ମୁ କଶ୍ମୀରର ସେହି ପରିଚୟକୁ ଜୀବନ୍ତ କରିପାରିଛି ଯାହାକି ବହୁ ଶତାବ୍ଦୀ ଧରି ସମଗ୍ର ଭାରତର ବିଚାର ପରମ୍ପରାକୁ ଆଗେଇ ନେଇଥିଲା।
ସେ କହିଥିଲେ, ଗୀତାର ଗଭୀର ଅଧ୍ୟୟନ ପାଇଁ ହଜାର ହଜାର ବିଦ୍ୱାନ ସେମାନଙ୍କର ଜୀବନକୁ ସମର୍ପି ଦେଇଛନ୍ତି। ଯାହାକି ଗୋଟିଏ ଗ୍ରନ୍ଥର ପ୍ରତ୍ୟେକ ଶ୍ଳୋକର ଭିନ୍ନ ଭିନ୍ନ ବ୍ୟାଖ୍ୟାର ବିଶ୍ଳେଷଣ ଏବଂ ବହୁସଂଖ୍ୟକ ମନିଷୀମାନଙ୍କର ଅଭିବ୍ୟକ୍ତିରୁ ସ୍ପଷ୍ଟ ଭାବେ ପ୍ରତୀୟମାନ ହୋଇଥାଏ। ସେ ଉଲ୍ଲେଖ କରିଥିଲେ ଯେ ଏହା ଭାରତର ଆଦର୍ଶଗତ ସ୍ୱାଧୀନତା ଏବଂ ସହନଶୀଳତାର ଏକ ପ୍ରତୀକ, ଯାହା ପ୍ରତ୍ୟେକ ବ୍ୟକ୍ତିଙ୍କୁ ନିଜସ୍ବ ଦୃଷ୍ଟିକୋଣ ରଖିବା ଲାଗି ଅନୁପ୍ରାଣିତ କରିଥାଏ।
ପ୍ରଧାନମନ୍ତ୍ରୀ କହିଥିଲେ, ଭାରତକୁ ଏକତ୍ରିତ କରିଥିବା ଆଦି ଶଙ୍କରାଚାର୍ଯ୍ୟ ଗୀତାକୁ ଆଧ୍ୟାତ୍ମିକ ଚେତନା ଭାବେ ଦେଖିଥିଲେ। ରାମାନୁଜାଚାର୍ଯ୍ୟଙ୍କ ଭଳି ସନ୍ଥମାନେ ଗୀତାକୁ ଆଧ୍ୟାତ୍ମିକ ଜ୍ଞାନର ଅଭିବ୍ୟକ୍ତି ଭାବେ ଦେଖିଥିଲେ। ସ୍ୱାମୀ ବିବେକାନନ୍ଦଙ୍କ ପାଇଁ ଗୀତା ଅଦମ୍ୟ ପରିଶ୍ରମ ଏବଂ ଅବିସ୍ମରଣୀୟ ଆତ୍ମବିଶ୍ୱାସର ଉତ୍ସ ଥିଲା। ଶ୍ରୀ ଅରବିନ୍ଦଙ୍କ ପାଇଁ ଗୀତା ଜ୍ଞାନ ଏବଂ ମାନବିକତାର ପ୍ରକୃତ ମୂର୍ତ୍ତରୂପ ଥିଲା। ମହାତ୍ମା ଗାନ୍ଧୀଙ୍କ ପାଇଁ ଗୀତା ସଙ୍କଟ ସମୟରେ ଆଶାର ଆଲୋକ ଥିଲା। ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଦେଶଭକ୍ତି ଓ ସାହସ ପାଇଁ ଗୀତା ଏକ ପ୍ରେରଣା ଥିଲା। ଏହି ଗୀତାକୁ, ବାଲ ଗଙ୍ଗାଧର ତିଲକ ବ୍ୟାଖ୍ୟା କରିଥିଲେ ଏବଂ ସ୍ୱାଧୀନତା ଆନ୍ଦୋଳନକୁ ନୂଆ ଶକ୍ତି ଯୋଗାଇ ଥିଲା।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଆମର ଗଣତନ୍ତ୍ର ଆମକୁ ବିଚାର ଓ କାର୍ଯ୍ୟରେ ସ୍ୱାଧୀନତା ଦେବା ସହିତ ଜୀବନର ପ୍ରତ୍ୟେକ କ୍ଷେତ୍ରରେ ସମାନ ଅଧିକାର ପ୍ରଦାନ କରିଥାଏ। ଏହି ସ୍ୱାଧୀନତା ଆମ ସମ୍ବିଧାନର ରକ୍ଷକ ହୋଇଥିବା ଗଣତାନ୍ତ୍ରିକ ସଂସ୍ଥାଗୁଡ଼ିକ ନିକଟରୁ ଆସିଥାଏ । ତେଣୁକରି ସେ କହିଥିଲେ, ଆମେ ଆମର ଅଧିକାର ବିଷୟରେ କହିବା ସମୟରେ, ଆମେ ଆମର ଗଣତାନ୍ତ୍ରିକ କର୍ତ୍ତବ୍ୟକୁ ମନେ ରଖିବା ଉଚିତ।
ପ୍ରଧାନମନ୍ତ୍ରୀ କହିଥିଲେ ଯେ ଗୀତା ହେଉଛି ସମଗ୍ର ଜଗତ ଏବଂ ପ୍ରତ୍ୟେକ ପ୍ରାଣୀଙ୍କ ପାଇଁ ଏକ ପୁସ୍ତକ। ଏହାର ବହୁ ଭାରତୀୟ ଏବଂ ଅନ୍ତର୍ଜାତୀୟ ଭାଷାରେ ଅନୁବାଦ କରାଯାଇଛି, ବହୁ ଅନ୍ତର୍ଜାତୀୟ ଗବେଷକମାନେ ବିଭିନ୍ନ ଦେଶରେ ଏହା ଉପରେ ଗବେଷଣା କରୁଛନ୍ତି।
https://twitter.com/narendramodi/status/1369253113509543937?s=20
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
