ଜମ୍ମୁ ଓ କାଶ୍ମୀର: ସୀମାରେ ଅନୁପ୍ରବେଶ ଉଦ୍ୟମ ପଣ୍ଡ, ୩ ଆତଙ୍କୀ ନିହତ

ଶ୍ରୀନଗର:  ଜମ୍ମୁ-କାଶ୍ମୀରର କୁପୱାରା ଜିଲ୍ଲାର ଟୁଟମାର ଗଲି ଅଞ୍ଚଳରେ ଶନିବାର ନିୟନ୍ତ୍ରଣ ରେଖା ଡେଇଁ ଭାରତ ମଧ୍ୟରେ ଅନୁପ୍ରବେଶ କରିବାକୁ ଆତଙ୍କବାଦୀମାନେ କରିଥିବା ଉଦ୍ୟମକୁ ପଣ୍ଡ କରି ଦେଇଛି ଭାରତୀୟ ସେନା।  ଯବାନମାନଙ୍କ ଗୁଳିରେ ନିହତ ହୋଇଛନ୍ତି ୩ ଆତଙ୍କୀ। ଯବାନଙ୍କ ପଟରୁ କେହି ହତାହତ ହୋଇନାହାନ୍ତି।

ଶନିବାର ଭୋର ସମୟରେ ଯବାନ ମାନେ ଏଠାରେ ପାଟ୍ରୋଲିଂ କରୁଥିବା ବେଳେ କିଛି ଗିତିବିଧି ଲକ୍ଷ୍ୟ କରିଥିଲେ। ଆତଙ୍କବାଦୀମାନେ ଅନୁପ୍ରବେଶ କରିବାକୁ ଉଦ୍ୟମ କରୁଥିବା ନେଇ ସେମାନେ ନିଶ୍ଚିତ ହୋଇଯାଇଥିଲେ।  ଏହା ପରେ ସେମାନେ ଆତଙ୍କବାଦୀମାନଙ୍କୁ ଚାଲେଞ୍ଜ କରିଥିଲେ। ଦୁଇ ପକ୍ଷ ମଧ୍ୟରେ ଗୁଳିବିନିମୟ ହୋଇଥିଲା। ଏଥିରେ ତିନି ଆତଙ୍କୀ ନିହତ ହୋଇଥିଲେ।

ଗତ କିଛି ଦିନ ହେଲା ଜମ୍ମୁ ଓ କାଶ୍ମୀରରେ ନିୟନ୍ତ୍ରଣ ରେଖା ନିକଟରେ ଆତଙ୍କବାଦୀଙ୍କର ଅନୁପ୍ରବେଶ ଉଦ୍ୟମ ଘଟଣା ବଢ଼ିଯାଇଛି। ଗତ ମେ’୩୦ ତାରିଖରେ ମଧ୍ୟ ତଂଗଧାର ଜିଲ୍ଲାରେ ନିୟନ୍ତ୍ରଣ ରେଖା ନିକଟରେ ଏଭଳି ଏକ ଉଦ୍ୟମକୁ ପଣ୍ଡ କରିଥିଲା ଭାରତୀୟ ସେନା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।