ମୁମ୍ୱାଇ: ମହାରାଷ୍ଟ୍ର ରାଜ୍ୟପାଳ ଭଗତ ସିଂହ କୋଶିଆରି ରାଜ୍ୟର ତୃତୀୟ ସର୍ବାଧିକ ଆସନ ଜିତିଥିବା ଦଳ ଏନସିପିକୁ ସରକାର ଗଢ଼ିବା ପାଇଁ ଆମନ୍ତ୍ରଣ କରିଛନ୍ତି। ଆଜି ରାତି ୮ଟା ୩୦ ସୁଦ୍ଧା ଏନସିପି ସରକାର ଗଢ଼ିବା ପାଇଁ ରାଜ୍ୟପାଳଙ୍କ ନିକଟରେ ପ୍ରସ୍ତାବ ଦେବ। ରାଜ୍ୟରେ ଏନସିପି ସରକାର ଗଢ଼ିବ କି ନାହିଁ ଆଜି ଗଣମାଧ୍ୟମ ପ୍ରତିନିଧି ଦଳର ସୁପ୍ରିମୋ ଶରଦ ପାଓ୍ୱାରଙ୍କୁ ଏ ନେଇ ପ୍ରଶ୍ନ କରିଥିଲେ। ହେଲେ ଶରଦ ଏହି ପ୍ରଶ୍ନର ସିଧା ଉତ୍ତର ଦେଇନଥିଲେ। ଆଶଙ୍କା କରାଯାଉଛି ଏବେ ସହଯୋଗୀ ଏନସିପିକୁ ସରକାର ଗଢ଼ିବା ପାଇଁ ସମର୍ଥନ ଦେବା ପ୍ରସଙ୍ଗରେ ଦୋଛକିରେ ରହିଛି।
ଶରଦ ପାଓ୍ୱାରଙ୍କୁ ଗଣମାଧ୍ୟମ ପ୍ରତିନିଧି ଆହୁରି ପ୍ରଶ୍ନ କରିଥିଲେ, କଂଗ୍ରେସ ସହିତ ଆଜି ବୈଠକ ରହିଛି କି? ଜବାବ ଦେବାକୁ ଯାଇ ଶରଦ କହିଥିଲେ, କିଏ କହିଲା ବୈଠକ ରହିଛି? ମୋତେ ଜଣା ନାହିଁ। ସରକାର ଗଢ଼ିବାରେ କଂଗ୍ରେସ ବିଳମ୍ୱ କରୁଛି କି? ଜବାବରେ ପାଓ୍ୱାର କହିଥିଲେ ମୁଁ କଂଗ୍ରେସ ନେତାଙ୍କ ସହ କଥା ହେବି।
ଦଳର ଅନ୍ୟତମ ପ୍ରମୁଖ ନେତା ଅଜିତ ପାଓ୍ୱାର କହିଛନ୍ତି, କଂଗ୍ରେସର ସମର୍ଥନ ଚିଠି ମିଳିନାହିଁ। ସରକାର ଗଢ଼ିବା ପାଇଁ କଂଗ୍ରେସର ସମର୍ଥନ ଆବଶ୍ୟକ ରହିଛି। ସୋମବାର କଂଗ୍ରେସ ନେତାଙ୍କ ସହ ବୈଠକ ହୋଇଥିଲା। ଅପରାହ୍ନ ୪ଟାରେ ସମର୍ଥନ ପତ୍ର ପଠାଇବ ବୋଲି କଂଗ୍ରେସ କହିଥିଲା। ହେଲେ ଅପରାହ୍ନ ୪ଟାରେ ମିଳିନଥିଲା ସମର୍ଥନ ପତ୍ର। ପରେ ସନ୍ଧ୍ୟା ୭ଟାରେ ସମର୍ଥନ ପତ୍ର ମିଳିବ ବୋଲି ଜଣାପଡ଼ିଥିଲା। ହେଲେ ଏହାପରେ ବି କଂଗ୍ରେସ ସମର୍ଥନ ପତ୍ର ପଠାଇ ନାହିଁ। ଆଜି ଏନସିପି ନେତାଙ୍କ ସହ ଶରଦ ପାଓ୍ୱାରଙ୍କର ବୈଠକ ରହିଛି। ତେଣୁ କଂଗ୍ରେସ ନେତାଙ୍କ ସହିତ ଶରଦ ପାଓ୍ୱାରଙ୍କର ଆଲୋଚନା ହେବା ସମ୍ଭବ ନୁହେଁ ବୋଲି ଅଜିତ ପାଓ୍ୱାର କହିଛନ୍ତି।
ସୂଚନାଯୋଗ୍ୟ, ଗତକାଲି ଶିବସେନା ନେତା ଆଦିତ୍ୟ ଠାକରେ ରାଜ୍ୟପାଳଙ୍କୁ ଭେଟିଥିଲେ। ସରକାର ଗଢ଼ିବା ପାଇଁ ଶିବସେନା ରାଜି ରହିଛି, ହେଲେ ଆଉ ୪୮ ଘଣ୍ଟା ସମୟ ମାଗିଥିଲେ ରାଜ୍ୟପାଳଙ୍କୁ। ରାଜ୍ୟପାଳ କିନ୍ତୁ ଅଧିକ ସମୟ ଦେଇନଥିଲେ। ପରେ ରାଜ୍ୟପାଳ ତୃତୀୟ ସର୍ବାଧିକ ଆସନ ଜିତିଥିବା ଦଳ ଏନସିପିକୁ ସରକାର ଗଢ଼ିବା ପାଇଁ ଆମନ୍ତ୍ରଣ କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
