ଶ୍ରୀନଗର: ଜମ୍ମୁ କଶ୍ମୀରରେ ଆଜି କଡ଼ା ସୁରକ୍ଷା ଭିତରେ ନିରାଡମ୍ୱର ଭାବରେ ଇଦ୍-ଉଲ୍-ଜୁହା ବା ବକ୍ରୀ ଇଦ ପାଳିତ ହେଉଛି। ମୁଖ୍ୟତଃ ଶ୍ରୀନଗରରେ ଅଧିକ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଆଜି ଇଦ୍ ଅବସରରେ ୬ ଘଣ୍ଟା ପାଇଁ ଢ଼ିଲା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ନିଷ୍ପତ୍ତି ନେଇଥିଲେ ସରକାର। ହେଲେ ହିଂସା ହେବାର ସୂଚନା ମିଳିବା ପରେ ପୁଣି ଥରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛନ୍ତି।
ମୁସଲମାନ୍ ସମ୍ପ୍ରଦାୟର ଲୋକମାନେ ସେମାନଙ୍କ ନିକଟବର୍ତ୍ତୀ ମସଜିଦ୍ ଗୁଡ଼ିକୁ ଯାଇ ଇଦ୍ ପ୍ରାର୍ଥନା କରିଛନ୍ତି। ବଡ଼ ବଡ଼ ମସଜିଦ୍ ଗୁଡ଼ିକ ବନ୍ଦ ରହିଥିବା ସୂଚନା ରହିଛି।
ଗିରଫ ହୋଇଥିବା ଜମ୍ମୁ କଶ୍ମୀରର ଦୁଇ ପୂର୍ବତନ ମୁଖ୍ୟମନ୍ତ୍ରୀ ଉମର ଅବଦୁଲହା ଏବଂ ମେହବୁବା ମୁଫତିଙ୍କୁ ମଧ୍ୟ ଇଦ୍ ପ୍ରାର୍ଥନା ପାଇଁ ନିକଟ ମସଜିଦଙ୍କୁ ଯିବେ ବୋଲି ଜଣାପଡ଼ିଛି।
https://twitter.com/MajorPoonia/status/1160797963876261888
ସୂଚନାଯୋଗ୍ୟ, ଜମ୍ମୁ କଶ୍ମୀରକୁ ସ୍ୱତନ୍ତ୍ର ରାଜ୍ୟର ମାନ୍ୟତା ଦେଉଥିବା ଧାରା ୩୭୦କୁ କେନ୍ଦ୍ର ସରକାର ଗତ ସପ୍ତାହରେ ହଟାଇଛନ୍ତି। ଏହାପରେ ହିଂସା ହୋଇପାରେ ବୋଲି ଆକଳନ କରି ଜମ୍ମୁ କଶ୍ମୀରରେ କର୍ଫ୍ୟୁ ଓ ଧାରା ୧୪୪ ଲାଗୁ କରାଯାଇଛି। ଅନ୍ୟପଟେ ଧାରା ୩୭୦ ହଟିଲେ ଭୟଙ୍କର ଆନ୍ଦୋଳନ ହେବ ବୋଲି ଧମକ ଦେଇଥିବା ଜମ୍ମୁ କଶ୍ମୀରର ପ୍ରମୁଖ ନେତା ମାନଙ୍କୁ ଗିରଫ କରି ଜେଲରେ ରଖାଯାଇଛି। ସେହିପରି ପାକିସ୍ତାନ ପଟୁ ଆତଙ୍କବାଦୀ ଆକ୍ରମଣ ଆଶଙ୍କା ଥିବାରୁ ସରକାର ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରି ଦେଇଛନ୍ତି।
ତେବେ ଇଦ୍ ଥିବାରୁ ଶୁକ୍ରବାର ପାଖରୁ ଧାରା ୧୪୪ ରେ ସରକାର କୋହଳ କରିଥିଲେ। ଶନିବାର କିଛି ଜିଲ୍ଲାରେ ସ୍କୁଲ୍ ଓ କଲେଜ ମଧ୍ୟ ଖୋଲିଥିଲା। ରାସ୍ତାଘାଟ ପୂର୍ବାବସ୍ଥାକୁ ଫେରିଥିଲା। ତେଣୁ ଆଜି ବି ଢ଼ିଲା ସୁରକ୍ଷା ରହିବ ବୋଲି ନିଷ୍ପତ୍ତି ନିଆଯାଇଥିଲା। କିନ୍ତୁ ହିଂସାକାଣ୍ଡ ଘଟିବାର ସୂଚନା ପହଞ୍ଚିଥିବାରୁ ପୁଣି ଥରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
