ଜୟପୁର: ରାଜସ୍ଥାନ ହାଇକୋର୍ଟଙ୍କ କଡ଼ା ଚେତାବନୀ ସତ୍ତ୍ୱେ ସଂରକ୍ଷଣ ଦାବିରେ ଗୁଜ୍ଜର ସଂପ୍ରଦାୟର ଲୋକେ ତିନୋଟି ଜିଲ୍ଲାରେ ରାସ୍ତାରେ ଓ ରେଳ ଧାରଣା ଉପରେ ଆନ୍ଦୋଳନ ଜାରି ରଖିଛନ୍ତି। ଆଉ ଗୁରୁବାର ଏନେଇ ରାଜସ୍ଥାନର ମୁଖ୍ୟ ଶାସନ ସଚିବ ଓ ପୋଲିସ୍ ମହାନିର୍ଦ୍ଦେଶକଙ୍କ ଉପରେ ବର୍ଷିଛନ୍ତି ହାଇକୋର୍ଟ। ଆନ୍ଦୋଳନକାରୀମାନଙ୍କୁ କାହିଁକି ଗିରଫ କରାଯାଇ ନାହିଁ ବୋଲି ମୁଖ୍ୟ ଶାସନ ସଚିବ ଓ ପୋଲିସ୍ ମହାନିର୍ଦ୍ଦେଶକଙ୍କୁ ପ୍ରଶ୍ନ କରିଛନ୍ତି ହାଇକୋର୍ଟ। ରାଜ୍ୟରେ ଆଇନ ଓ ଶୃଙ୍ଖଳା ସ୍ଥିତି ବଜାୟ ରଖିବାରେ ସରକାର ବିଫଳ ହୋଇଛନ୍ତି ବୋଲି ଉଚ୍ଚ ନ୍ୟାୟାଳୟ କହିଥିଲେ। ଆଉ ଏ ନେଇ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। କୋର୍ଟ ଆସନ୍ତାକାଲି ପୁଣି ଏହି ମାମଲାର ଶୁଣାଣି କରିବେ।
ସରକାରୀ ଚାକିରି କ୍ଷେତ୍ରରେ ୫% ସଂରକ୍ଷଣ ଦାବିରେ ଗୁଜ୍ଜର ସଂପ୍ରଦାୟର ଲୋକେ ସପ୍ତାହେରୁ ଅଧିକ ଦିନ ହେଲାଣି ତିନୋଟି ଜିଲ୍ଲାରେ ରାସ୍ତା ଓ ରେଳଧାରଣାରେ ଧାରଣାରେ ବସିଛନ୍ତି। ବୁଧବାର ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ଆନ୍ଦୋଳନକାରୀ ମାନେ ମୁମ୍ବାଇ-ଦିଲ୍ଲୀ ରେଳ ଲାଇନରୁ ହଟି ନାହାନ୍ତି। ସେମାନଙ୍କୁ ପୋଲିସ୍ ଲଗାଇ ସେଠାରୁ ହଟାଇବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ।
ଅନ୍ୟପକ୍ଷରେ ଗତକାଲି ସରକାର ଓ ଗୁଜ୍ଜର ଆନ୍ଦୋଳନକାରୀଙ୍କ ମଧ୍ୟରେ ସମସ୍ୟାର ସମାଧାନ ନେଇ ଆଲୋଚନା ହୋଇଥିଲା। ମଙ୍ଗଳବାର ବି ଆଲୋଚନା ହୋଇଥିଲା। କିନ୍ତୁ ଏ ସବୁ ଆଲୋଚନା ବିଫଳ ହୋଇଥିଲା। ଆଜି ମଧ୍ୟ ସରକାର ଓ ଆନ୍ଦୋଳନକାରୀଙ୍କ ମଧ୍ୟରେ ଆଲୋଚନା ହେବ।
ସୂଚନାଯୋଗ୍ୟ, ଗୁଜ୍ଜରଙ୍କ ଏହି ଆନ୍ଦୋଳନ ଯୋଗୁ ପଶ୍ଚମ ରେଳବାଇ ୧୦୦ କୋଟିରୁ ଅଧିକ ଟଙ୍କାର କ୍ଷତି ସହିଲାଣି। ଦିନକୁ ପ୍ରାୟ ୧୫ କୋଟି କ୍ଷତି ହେଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
