ନୂଆଦିଲ୍ଲୀ: ବାହାଘର ବେଳେ ଗୀତ ବଜାଇବାକୁ ନେଇ ହୋଇଥିଲା ଯୁକ୍ତତର୍କ। ତେବେ ଯୁକ୍ତିତର୍କ ଗଣ୍ଡଗୋଳର ରୂପ ନେଇଥିଲା ଓ ତା’ପରେ ଘଟିଥିଲା ହତ୍ୟାକାଣ୍ଡ। ଗୁଳିମାଡ଼ରେ ଟଳି ପଡ଼ିଥିଲେ ପୁତୁରା ବାହାଘର ପାଇଁ ପୂରା ଖୁସି ଥିବା ଜଣେ ମହିଳା। ତାଙ୍କ ନାଁ ସୁନୀତା। ତାଙ୍କୁ ମାତ୍ର ୩୨ ବର୍ଷ ହୋଇଥିଲା।
ଦିଲ୍ଲୀର ମଙ୍ଗୋଲପୁରି ଅଞ୍ଚଳରେ ଶୁକ୍ରବାର ମଧ୍ୟରାତ୍ରରେ ଘଟିଥିଲା ଏ ଘଟଣା।
ପୁଲିସ୍ଠାରୁ ମିଳିଥିବା ସୂଚନା ଅନୁଯାୟୀ, ବାହାଘର ଚାଲିଥିବା ବେଳେ ସୁନୀତାଙ୍କ ସ୍ୱାମୀ ସଜ୍ଜନଙ୍କର ଦୁଇ ଅଭିଯୁକ୍ତ- ଆକାଶ ଓ ସନ୍ଦୀପଙ୍କ ସହିତ ପାଟିତୁଣ୍ଡ ହୋଇଥିଲା। ଅଭିଯୁକ୍ତ ଦ୍ୱୟ ଏକ ଗୀତ ବଜାଇବାକୁ ଡିଜେକୁ କହିଥିଲେ। ଏହାକୁ ସଜ୍ଜନ ବିରୋଧ କରିଥିଲେ। ଫଳରେ ଉଭୟ ପକ୍ଷରେ ଯୁକ୍ତିତର୍କ ହୋଇଥିଲା। ତେବେ ଯୁକ୍ତିତର୍କ ଭୟଙ୍କର ରୂପ ନେଇଥିଲା। ସେମାନଙ୍କ ମଧ୍ୟରେ ମାରପିଟ ହେବା ବେଳେ ସୁନୀତା ଛଡ଼ାଇବାକୁ ଆସିଥିଲେ। ସେତେବେଳେ ଅଭିଯୁକ୍ତଙ୍କ ମଧ୍ୟରୁ ଜଣେ ସଜ୍ଜନଙ୍କୁ ଲକ୍ଷ୍ୟ କରି ପିସ୍ତଲରୁ ଗୁଳି କରିଥିଲେ। ତେବେ ସୁନୀତା ତାଙ୍କ ସାମ୍ନାକୁ ଆସି ଯାଇଥିଲେ ଓ ତାଙ୍କ ଦେହରେ ଗୁଳି ବାଜି ଯାଇଥିଲା। ତାଙ୍କୁ ସଙ୍ଗେ ସଙ୍ଗେ ଡାକ୍ତରଖାନା ନିଆଯାଇଥିଲା। ତେବେ ସେଠାରେ ତାଙ୍କର ମୃତ୍ୟୁ ଘଟିଥିଲା।
ପୁଲିସ୍ ଏକ ହତ୍ୟା ମାମଲା ରୁଜୁ କରି ଦୁଇ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କୁ ଗତକାଲି ଚଣ୍ଡିଗଡ଼ରୁ ଗିରଫ କରାଯାଇଥିଲା। ସେମାନଙ୍କ ନାଁରେ ପୂର୍ବରୁ ଚୋରି ଓ ଲୁଟ୍ ଭଳି ମାମଲା ରହିଛି ବୋଲି ପୁଲିସ୍ କହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
