ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
<p>ପୁରୀ/ଭୁବନେଶ୍ୱର(ଓଡିଶା ରିପୋର୍ଟର): ଶ୍ରୀମନ୍ଦିରରେ ଅନୁଶ୍ରୁତ ନୀତି ନିୟମ କେବେ କେଉଁଠାରେ ଦେଖିବାକୁ ମିଳେନା। ଏହାର ସ୍ୱତନ୍ତ୍ରତା ଲାଗି ଜଗନ୍ନାଥ ସଂସ୍କୃତି ଆଜି ବିଶ୍ୱ ଦରବାରରେ ଆଦ୍ରୁତ ହୋଇଛି। ଶ୍ରୀ ବିଗ୍ରହମାନଙ୍କ ନୀତିକାନ୍ତି ସହ ଗଜପତି ମହାରାଜଙ୍କ ପ୍ରତ୍ୟକ୍ଷ ସମ୍ପୃକ୍ତି ରହିଛି। ହେଲେ ଅଭିଯୋଗ ଉଠିଲାଣି ଗଜପତିଙ୍କୁ ମଧ୍ୟ ସାଧରଣ ବିତ୍ତଶାଳୀ ଲୋକେ ଅନୁକରଣ କଲେଣି । ନିକଟରେ କିଟ୍‌ ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ପୁଷ୍ୟାଭିଷେକ ଫଟୋ ଭାଇରାଲ ହେବା ପରେ ଏବେ ବିବାଦ ଉଠିଛି।</p> <p>ଭାଇରାଲ ହୋଇଥିବା ଭିଡିଓ ମୁଣ୍ଡରେ ପଗଡ଼ି, ହାତରେ ରାଜତରବାରୀ ଧରି ଶୁକ୍ଳ ପାଟଛତ୍ରୀ ଆଢୁଆଳରେ ଅଚ୍ୟୁତ ଚାଲି ଆସୁଥିବାର ଦୃଶ୍ୟ ଦେଖିବାକୁ ମିଳିଛି। ତାପରେ ବ୍ରାହ୍ମଣମାନଙ୍କ ମନ୍ତ୍ରୋଚାରଣ ସହ ଅଭିଷେକ ନୀତି କରାଯାଉଛି। ଆଜି ଦିନ ତମାମ୍ ସୋସିଆଲ୍ ମିଡିଆରେ ଏଭଳି କିଛି ଫଟୋ ଭାଇରାଲ୍ ହୋଇଛି। ଅଚ୍ୟୁତ ସାମନ୍ତଙ୍କୁ ଦେଖିଲେ ବି ଲାଗୁଛି ସତେ ଯେମିତି ତାଙ୍କର ରାଜ୍ୟ ଅଭିଷେକ ଚାଲିଛି ।</p> <p>କଥାଟା ବି ପ୍ରାୟ ସତ । ଗତକାଲି ପୁଷ୍ୟା ନକ୍ଷତ୍ର ତିଥିରେ ପୁରୀରେ ଗଜପତି ମହାରାଜ ଦିବ୍ୟସିଂହ ଦେବଙ୍କ ଅଭିଷେକ ନୀତି ପାଳିତ ହୋଇଛି। ଯାହାକୁ ଅନୁକରଣ କରି କୁଆଡ଼େ ଅଚ୍ୟୁତ ମଧ୍ୟ ଏମିତି ଆଡ଼ମ୍ବରପୂର୍ଣ୍ଣ ପୁଷ୍ୟାଭିଷେକ କାର୍ଯ୍ୟକ୍ରମ ଆୟୋଜନ କରିଥିଲେ । ଯାହାକୁ ପରମ୍ପରା ବିରୋଧୀ ବୋଲି ଦର୍ଶାଇ ତୀବ୍ର ପ୍ରତିବାଦ କରିଛନ୍ତି ଶ୍ରୀଜଗନ୍ନାଥ ସେନା ଓ ଶ୍ରୀକ୍ଷେତ୍ର ସ୍ୱାଭିମାନ ମଞ୍ଚ। ଏମିତିକି ଅଚ୍ୟୁତ ସାମନ୍ତ ଏଭଳି ଆଚରଣ ଲାଗି ତୁରନ୍ତ କ୍ଷମା ମାଗିବା ଦାବିରେ ପୁରୀ ସିଂହଦ୍ୱାର ଆଗରେ ହୋଇଛି ଜୋରଦାର ବିକ୍ଷୋଭ।</p> <p>ସୂଚନାଯାଗ୍ୟ, ପ୍ରତିବର୍ଷ ପୌଷ ପୂର୍ଣ୍ଣିମାରେ ଜଗନ୍ନାଥ ମହାପ୍ରଭୁଙ୍କ ପୂଷ୍ୟାଭିଶେକ ପରେ ଗଜପତି ମହାରାଜଙ୍କ ଅଭିଷେକ ନୀତି ପାଳିତ ହୁଏ। ଏହା ଉତ୍କଳୀୟ ପରମ୍ପରା। ଏଣୁ ଏଭଳି କରି ଜଗନ୍ନାଥ ସଂସ୍କୃତି ଓ ଓଡିଆଙ୍କ ଭାବାବେଗକୁ ଅଚ୍ୟୁତ କୁଠାରାଘାତ କରିଛନ୍ତି ବୋଲି ଜଗନ୍ନାଥ ସଂସ୍କୃତି ଗବେଷକ କହୁଥିବା ବେଳେ କିଟ୍ ଜଗନ୍ନାଥ ମନ୍ଦିର କର୍ତ୍ତୃପକ୍ଷ ଏହାକୁ ଶ୍ରୀମନ୍ଦିର ପରମ୍ପରା ଅନୁକରଣ କହି ହାଲକାରେ ଉଡାଇ ଦେଇଛନ୍ତି।</p>
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
