ବାପାର କୋହଭରା ନିବେଦନ: ଯେଉଁଠି ଥାଆନା କାହିଁକି, ଫେରିଆ

ଭୁବନେଶ୍ୱର (ଓଡ଼ିଶା ରିପୋର୍ଟର): କୋହ ଭରା କଣ୍ଠରେ ନିଖୋଜ ପୁଅକୁ ଜଣେ ଅସହାୟ ବାପାର ଆକୁଳ ନିବେଦନ। ଯେଉଁଠି ଥାଉନା କାହିଁକି ଫେରିଆସ୍‌। ଏପରି ନିବେଦନ କରିଛନ୍ତି ଭୁବନେଶ୍ୱର ଏମ୍‌ସରେ ନିଖୋଜ ଛାତ୍ର ସୋହେଲ ଅଜାଜଙ୍କ ବାପା ଅଜାଜ୍ ଅହମ୍ମଦ। ୧୫ରୁ ଅଧିକ ଦିନ ଧରି ଅନ୍ତର୍ଦ୍ଧାନ ହୋଇଯିବା ପରେ ବାପା ଅଜାଜଙ୍କ ମନରେ ନାନା ଆଶଙ୍କା ଉଙ୍କି ମାରୁଛି। ତେବେ ରହସ୍ୟମୟ ଭାବେ ସୋହେଲ ଭୁବନେଶ୍ୱର ହଷ୍ଟେଲରୁ ଉଭାନ ହୋଇଯିବା ପରେ ଅନେକଙ୍କ ମନରେ ଦେଶ ବିରୋଧୀ ସଙ୍ଗଠନ ସହ ସମ୍ପର୍କ ରଖିବାକୁ ନେଇ ସେନ୍ଦେହ ସୃଷ୍ଟି ହୋଇଛି। କାରଣ ସହୋଲଙ୍କ ଘର ଜାମ୍ମୁ-କାଶ୍ମୀରର ଆତଙ୍କବାଦୀ ପ୍ରବଣ ଜିଲ୍ଲା କୁପଓ୍ୱାଡାରେ। ପୂର୍ବରୁ ଏହି ଅଞ୍ଚଳର କେତେକ ଉଚ୍ଚ ଶିକ୍ଷିତ ଯୁବକ ଆତଙ୍କବାଦୀ ସଂଗଠନରେ ସାମିଲ ହେବାର ନିଜର ମଧ୍ୟ ରହିଛି। ସେଦୃଷ୍ଟିରୁ ସୋହେଲ ହଠାତ୍ ଅନ୍ତର୍ଦ୍ଧାନ ହୋଇଯିବା ପରେ ଆଶଙ୍କା ଦେଖାଦେବା ସ୍ୱାଭାବିକ।

ଗଲା ୧୬ ଦିନ ହେଲା ସୋହେଲଙ୍କ ମୋବାଇଲ ବନ୍ଦ ରହିଛି। ପରିବାର ନା କଲେଜ କର୍ତ୍ତୃପକ୍ଷ କାହାରି ସହ କୌଣସି ଯୋଗାଯୋଗ ରଖିନାହାନ୍ତି ସୋହେଲ। ଫଳରେ ସନ୍ଦେହ ଘନୀଭୂତ ହେବାରେ ଲାଗିଛି। ଏପଟେ ସୋହେଲଙ୍କ ସଂପର୍କରେ ମୁହଁ ଖୋଲିଛନ୍ତି ଏମ୍‌ସ କର୍ତ୍ତୃପକ୍ଷ। ସେ ଅତି ଲାଜକୁରା ଓ ସବୁ ବେଳେ ବିଭିନ୍ନ କାର୍ଯ୍ୟକ୍ରମରେ ନିଜକୁ ନିୟୋଜିତ ରଖୁଥିବା ଭୁବନେଶ୍ୱର ଏମ୍‌ସର ନିର୍ଦ୍ଦେଶିକା କହିଛନ୍ତି। ତେବେ ପରୀକ୍ଷାରେ ଭଲ ନକରିବା କାରଣରୁ ସେ ପାଠ ଛାଡି ଦେବା କଥାକୁ ବି କର୍ତ୍ତୃପକ୍ଷ ସହଜରେ ଗ୍ରହଣ କରିପାରୁନାହାନ୍ତି।

ଜାମ୍ମୁ-କାଶ୍ମୀର ପୋଲିସ ଓ କମିଶନରେଟ୍ ପୋଲିସ ତଦନ୍ତ ଜାରି ରଖିଥିବା ବେଳେ କେନ୍ଦ୍ରୀୟ ଗୁଇନ୍ଦା ସଂସ୍ଥା ଆତଙ୍କବାଦୀ କାର୍ଯ୍ୟକଳାପର ଖୋଲତାଡ ଲାଗି ଉଦ୍ଦିଷ୍ଟ ଏନ୍‌ଆଇଏକୁ ମଧ୍ୟ ଘଟଣା ସଂପର୍କରେ ଅବଗତ କରାଯାଇଛି। ତେବେ ସୋହୋଲ ଏବେ କେଉଁଠି ଓ କାହିଁକି କଲେଜ ଛାଡି ଚାଲିଗଲେ, ତାହା ଏବେ ତଦନ୍ତ ସାପେକ୍ଷ।