ଦିନନାଥ ପାଠୀଙ୍କ ଚିତ୍ରସ୍ମୃତି ‘ଚିତ୍ରାଙ୍ଗୀ’

<p>ଭୁବନେଶ୍ୱର,(ଓଡ଼ିଶା ରିପୋର୍ଟର):ଦିନନାଥ ପାଠୀ। ଭାରତୀୟ ଚିତ୍ରକଳା ଜଗତର ଅନ୍ୟତମ ଧୁରୀଣ କାରିଗର। ତୁଳି ହେଉ କିମ୍ବା କଲମ, ମନର କଥାକୁ ବାସ୍ତବତାର ରୂପ ଦେଉଥିବା ଜଣେ ଅପ୍ରତିଦ୍ୱନ୍ଦ୍ୱୀ ବିନ୍ଧାଣୀ। ଏକାଧାରରେ ଥିଲେ ଜଣେ ଚିତ୍ରକର, ଲେଖକ, ଅଧ୍ୟାପକ, ଗବେଷକ, କେନ୍ଦ୍ର ଲଳିତ କଳା ଏକାଡେମୀର ସଚିବ ଏବଂ ଓଡ଼ିଶା ଲଳିତ କଳା ଏକାଡେମୀର ସଭାପତି। ସମସ୍ତେ ତାଙ୍କୁ ଡାକନ୍ତି ଦିଗପହଣ୍ଡିର ଡ୍ରଇଁ ମାଷ୍ଟ୍ରେ। ପ୍ରଚଳିତ ପରମ୍ପରାକୁ ଭାଙ୍ଗି ନୂତନ ଶୈଳୀରେ ଛବି ଆଙ୍କି ଦେଶ ବିଦେଶରେ ଖୁବ୍ ପରିଚିତ ହୋଇ ପାରିଥିଲେ, କଳାଜଗତର ଏହି&nbsp; ଅନନ୍ୟ ସ୍ରଷ୍ଟା।</p><p>ଖାଲି ଚିତ୍ର ଆଙ୍କିବା ନୁହଁ, ସାହିତ୍ୟ ସାଧନାରେ ଖୁବ୍ ପାରିବାର ଥିଲେ ଦିନନାଥ। ଓଡ଼ିଆ, ଇଂରାଜୀ ଓ ଜର୍ମାନ ଭାଷାରେ ପ୍ରାୟ ୫୦ରୁ ଅଧିକ ପୁସ୍ତକ ଲେଖିଛନ୍ତି। ଓଡ଼ିଆ ଭାଷାରେ ଲିଖିତ- ପୂନର୍ନବା, ଦିଗପହଣ୍ଡିର ଡ୍ରଇଁ ମାଷ୍ଟ୍ରେ, ପୁଞ୍ଜିକୟାଁର ଫକିର, ରୂପଜୀବୀର ଡାଏରି- ଭଳି ତାଙ୍କର ଅନେକ ପୁସ୍ତକ ବେଶ୍ ଲୋକପ୍ରିୟ। ଏହାଛ଼ଡ଼ା ବହୁ&nbsp; ଜାତୀୟ ଓ ଅନ୍ତର୍ଜାତୀୟ କଳା ପ୍ରକଳ୍ପର ଡିଜାଇନର ଭାବେ ବେଶ ନାଁ କରିଛନ୍ତି ସେ। ୧୯୯୨ର କଳିଙ୍ଗ ବାଲିଯାତ୍ରା, ସୋଭିଏତ ସଙ୍ଘ ଓ ସ୍ଵିଡେନର ଭାରତ ଉତ୍ସବ, ବେଜିଂର ଆର୍ଟ ଏକ୍ସପୋ- ଏହିଭଳି ଅନେକ କଳା ପ୍ରକଳ୍ପର ରୂପକାର ହେଉଛନ୍ତି ଦିନନାଥ। କଳା କ୍ଷେତ୍ରରେ ସଫଳତା ପାଇଁ ସେ ଅନେକ ସମ୍ମାନରେ ସମ୍ମାନିତ ହୋଇଛନ୍ତି। ତାଙ୍କ ଲିଖିତ ଜୀବନ କାହାଣୀ- &lsquo;ଦିଗପହଣ୍ଡିର ଡ୍ରଇଁ ମାଷ୍ଟ୍ରେ&rsquo;&nbsp; ପାଇଁ ତାଙ୍କୁ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପ୍ରଦାନ କରାଯାଇଛି। ଏହାଛଡ଼ା ଭାରତର ସର୍ବ ପୁରାତନ କଳାନୁଷ୍ଠାନ ଆଇଫାକସ୍ ତରଫରୁ କଳାଶ୍ରୀ ସମ୍ମାନ, ରାଷ୍ଟ୍ରପତିଙ୍କ ପାଖରୁ ରୌପ୍ୟ ଫଳକ, ଚୀନ ସରକାରଙ୍କ ସୃଜନ ସମ୍ମାନ, ଓଟିଭି ପ୍ରଦତ୍ତ ଓଡ଼ିଶା ସିଟିଜେନ୍ସ ଆୱାର୍ଡ ଭଳି ଅନେକ ପୁରସ୍କାର ପାଇଛନ୍ତି।</p><p>ଗତବର୍ଷ ଅଗଷ୍ଟ ୨୯ ତାରିଖରେ ମହାନ ସ୍ରଷ୍ଟାଙ୍କର ଦେହାନ୍ତ ହୋଇଥିଲା। ତାଙ୍କୁ ସମ୍ମାନ ଜଣାଇବା ପାଇଁ ତାଙ୍କରି ଶ୍ରାଦ୍ଧ ବାର୍ଷିକୀରେ &lsquo;ଇଲା ପଣ୍ଡା ସେଣ୍ଟର ଫର ଆର୍ଟ&rsquo; ପକ୍ଷରୁ ଭୁବନେଶ୍ୱରସ୍ଥିତ ଲଳିତ କଳା ଏକାଡେମୀରେ ଏକ ୬ ଦିନିଆ&nbsp; ଚିତ୍ରକଳା ପ୍ରଦର୍ଶନୀର ଆୟୋଜନ କରାଯାଇଛି। ଏଥିରେ ସେ ଆଙ୍କିଥିବା ତାଙ୍କର ଚିତ୍ର ଗୁଡ଼ିକର ପ୍ରଦର୍ଶନ କରାଯିବା ସହିତ ଦିନନାଥ ପାଠୀଙ୍କ ନାଁରେ ଏକ ୱେବ୍ ସାଇଟ୍ ଉନ୍ମୋଚନ&nbsp; କରାଯାଇଛି। ଏହି ପ୍ରଦର୍ଶନୀରେ ସ୍ୱର୍ଗତ ଦିନନାଥ ପାଠୀ ବ୍ୟବହାର କରିଥିବା ତୁଳି ଓ ରଙ୍ଗ ଆଦି ତାଙ୍କ ସ୍ମୃତି ସହ ଜଡ଼ିତ ସାମଗ୍ରୀର ବି ପ୍ରଦର୍ଶନ କରାଯାଇଛି। ଏହାକୁ ରାଜ୍ୟପାଳ ଏସ୍ ସି ଜମିର ଉଦ୍&zwnj;ଘାଟନ କରିଥିଲେ। ଏହି ପ୍ରଦର୍ଶନୀ ଆସନ୍ତାକାଲି ପର୍ଯ୍ୟନ୍ତ ଚାଲିବ।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।