କଂଗ୍ରେସ ରାଜନୀତି ଏମିତି: ବିଜେପୁରରେ ଏକାଠି, ଇନ୍ଦିରାଙ୍କ ବେଳକୁ ଅଲଗା

ଭୁବନେଶ୍ୱର (ଓଡ଼ିଶା ରିପୋର୍ଟର): ଯେତେ ଯାହା କଲେ ବି କଂଗ୍ରେସର ଫାଟ ଦୂର ହେଉନି। ଏମିତି ଲାଗିଛି ଦଳୀୟ ନେତୃବୃନ୍ଦ ଏହା କେବେ ଦୂର ହେଉ ବୋଲି ଚାହୁଁନାହାନ୍ତି। ବିଜେପୁର ପାଇଁ ସମସ୍ତେ ଏକାଠି ହୋଇଗଲେ, ହେଲେ ଇନ୍ଦିରା ଗାନ୍ଧିଙ୍କ ବେଳକୁ ଅଲଗା। ଆଜି ଇନ୍ଦିରା ଗାନ୍ଧିଙ୍କ ଶ୍ରାଦ୍ଧ ଦିବସକୁ ଟିମ୍‌ ପ୍ରସାଦ ଓ ଟିମ୍‌ ନିରଞ୍ଜନ ଅଲଗା ଅଲଗା ଢଙ୍ଗରେ ପାଳିଛନ୍ତି। ପିସିସି ତରଫରୁ ପ୍ରସାଦଙ୍କ ନେତୃତ୍ୱରେ ଭୁବନେଶ୍ୱରରୁ ବାହାରିଛି ଇନ୍ଦିରା ଜ୍ୟୋତି। ଆଉ ତାରାଙ୍କ ନିର୍ବାଚନୀ ମଣ୍ଡଳୀ ବୋରିଗୁମ୍ମାରୁ ମଦ ବିରୋଧୀ ଅଭିଯାନ କରି ଇନ୍ଦିରାଙ୍କ ଶ୍ରାଦ୍ଧ ଦିବସ ପାଳିଛନ୍ତି ନିରଞ୍ଜନ, ନରସିଂହ ଓ ଗଣେଶ୍ୱର। ଯାହା କଂଗ୍ରେସ ଫାଟକୁ ପୁଣି ପଦାକୁ ଆଣିଛି।

ଇନ୍ଦିରା ଜ୍ୟୋତି ଯାତ୍ରା ପାଇଁ ଭୁବନେଶ୍ୱରରେ ପିସିସି ପକ୍ଷରୁ ଭବ୍ୟ ଆୟୋଜନ କରାଯାଇଥିଲା। ଇନ୍ଦିରାଙ୍କୁ ଶ୍ରଦ୍ଧା ସୁମନ ଦେଇଥିଲେ କଂଗ୍ରେସର ଆଗଧାଡିର ନେତା ପ୍ରସାଦ ହରିଚନ୍ଦନ, ହରିପ୍ରସାଦ, ଶ୍ରୀକାନ୍ତ ଜେନା, ଜୟଦେବ ଜେନା, ହେମାନନ୍ଦ ବିଶ୍ୱାଳ, କାହ୍ନୁ ଲେଙ୍କା ଓ ଶରତ ପଟ୍ଟନାୟକ। ହେଲେ ବିରୋଧୀ ଦଳ ନେତା ନରସିଂହ ମିଶ୍ର ଓ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କୁ ଏଠାରେ ଦେଖିବାକୁ ମିଳି ନଥିଲା।

ଅପରପକ୍ଷରେ ବୋରିଗୁମ୍ମାରେ ତାରାଙ୍କ ଦ୍ୱାରା ଆୟୋଜିତି ଇନ୍ଦିରା ଶ୍ରାଦ୍ଧ କାର୍ଯ୍ୟକ୍ରମରେ ଯୋଗ ଦେଇଥିଲେ ନିରଞ୍ଜନ, ନରସିଂହ ଓ ଗଣେଶ୍ୱର। ଏଠାରେ ଲାଗିଥିବା ବ୍ୟାନରରେ ସମସ୍ତଙ୍କ ଫଟୋ ଅଛି, ହେଲେ ପ୍ରସାଦଙ୍କୁ ଦେଖିବାକୁ ମିଳିନାହିଁ। ଉଭୟ ସ୍ଥାନରେ ଦୁହେଁ ନିଜ ଶକ୍ତି ପ୍ରଦର୍ଶନ କରିବାକୁ ଭରପୁର ପ୍ରୟାୟ କରିଛନ୍ତି। ଦୁଇଟି ଯାକ ସ୍ଥାନରେ ହୋଇଛି ବାଇକ୍‌ ଶୋଭାଯାତ୍ରା ଓ ରୋଡ ଶୋ’।

ଅନ୍ୟପକ୍ଷରେ ତାରାଙ୍କ ପୃଥକ କାର୍ଯ୍ୟକ୍ରମରେ ନିରଞ୍ଜନ ଓ ନରସିଂହଙ୍କ ଯୋଗଦାନକୁ ନେଇ କେଁ ପୁରାଇଛନ୍ତି କଂଗ୍ରେସର ତୁଣ୍ଡ କୁହାଯାଉଥିବା ସୁର ରାଉତରାୟ।

ଗତ ସପ୍ତାହରେ ବିଜେପୁର ପାଇଁ କସରତ କରିବାକୁ କଂଗ୍ରେସରେ ଏକାଠି ହୋଇଥିଲେ ସବୁ ହେଭିୱେଟ୍‌। ଏକାଠି ବସି ରଣନୀତି କରିଥିଲେ ନିରଞ୍ଜନ,  ପ୍ରସାଦ ଓ ନରସିଂହ। ବାର୍ତ୍ତା ଯାଇଥିଲା ଚଉକି କଳି ଭିତରେ ବି ପୁଣି ଏକ ହୋଇଛି କଂଗ୍ରେସ ନେତାଙ୍କ ମନ। ହେଲେ ଆଜି ସ୍ୱର୍ଗୀୟା ଇନ୍ଦିରାଙ୍କୁ ମନେପକାଇବା ବେଳେ ବାରି ହୋଇପଡିଥିଲା ଦୁଇ କ୍ୟାମ୍ପର  ନେତାଙ୍କ  ଭିନ୍ନତା।