ସିଆନ୍ (ଚାଇନା): ଭାରତର ତାରକା ରେସଲର୍ ବଜରଙ୍ଗ ପୁନିଆ ଓ ପ୍ରବୀଣ ପୁନିଆ ଚଳିତ ଏସିଆନ୍ ରେସଲିଂ ଚାମ୍ପିଅନଶିପରେ ଜବରଦସ୍ତ ଆରମ୍ଭ କରି ନିଜ ନିଜ ବର୍ଗର ଫାଇନାଲରେ ପ୍ରବେଶ କରିଛନ୍ତି।
ବିଶ୍ୱର ଏକ ନମ୍ବର ରେସଲର୍ ବଜରଙ୍ଗ ୬୫ କେଜି ବର୍ଗର ସେମିଫାଇନାଲରେ ଉଜବେକିସ୍ତାନର ସିରୋଜିଦ୍ଦିନ ଖାସାନୋଭଙ୍କୁ ୧୨-୧ରେ ପରାସ୍ତ କରି ସ୍ୱର୍ଣ୍ଣ ପଦକ ରାଉଣ୍ଡରେ ପହଞ୍ଚିଛନ୍ତି। ଫାଇନାଲରେ ବଜରଙ୍ଗଙ୍କ ସାମ୍ନା କଜାଖସ୍ତାନର ସାୟାତବେକ୍ ଓକାସୋଭଙ୍କ ସହ ହେବ।
ଏହା ପୂର୍ବରୁ ବଜରଙ୍ଗ ନିଜର ପୂର୍ବ ମୁକାବିଲା ଗୁଡ଼ିକରେ ଇରାନର ପେମ୍ୟାନ୍ ବିଆବାନୀଙ୍କୁ ଏବଂ ଶ୍ରୀଲଙ୍କାର ଚାର୍ଲ୍ସ ଫର୍ନଙ୍କୁ ପରାସ୍ତ କରି ସେମିଫାଇନାଲରେ ସ୍ଥାନ ପକ୍କା କରିଥିଲେ। ଭାରତର ଅନ୍ୟତମ ରେସଲର ପ୍ରବୀଣ ରାଣା ୭୯ କେଜି ବର୍ଗର ଫାଇନାଲରେ ପହଞ୍ଚିଛନ୍ତି।
ସେ ସେମିଫାଇନାଲରେ କଜାଖସ୍ତାନର ଜି. ଉସେରବାୟେଭଙ୍କୁ ୩-୨ରେ ପରାସ୍ତ କରିଛନ୍ତି। ସ୍ୱର୍ଣ୍ଣ ପଦକ ପାଇଁ ପ୍ରବୀଣଙ୍କ ସାମ୍ନା ଇରାନର ବାହମାନ୍ ମହମ୍ମଦ ତେମୌରୀଙ୍କ ସହ ହେବ। ଏହା ପୂର୍ବରୁ ପ୍ରବୀଣ ଜାପାନର ୟୁତା ଆବେ ଓ ମଙ୍ଗୋଲିଆର ତୁଗ୍ସ ଏର୍ଡେନ୍ ଡେଞ୍ଜେନଶ୍ରାଭଙ୍କ ସହ ହେବ।
୫୭ କେଜି ବର୍ଗରେ ଭାରତର ରବି କୁମାର ରିପିଚେଜ୍ ରାଉଣ୍ଡରେ ତାଇପେଇର ଚିଆ ସୋ ଲିଉଙ୍କୁ ୪-୦ରେ ହରାଇ ବ୍ରୋଞ୍ଜ ପଦକ ରାଉଣ୍ଡରେ ପ୍ରବେଶ କରିଛନ୍ତି। ପଦକ ମୁକାବିଲାରେ ରବି ଜାପାନର ୟୁକି ତାକାହାଶିଙ୍କୁ ଭେଟିବେ। ସେହିପରି ଭାରତର ସତ୍ୟୱର୍ତ କାଡିଆନ୍ ମଧ୍ୟ ୯୭ କେଜି ବର୍ଗର ବ୍ରୋଞ୍ଜ ପଦକ ରାଉଣ୍ଡରେ ପହଞ୍ଚିଛନ୍ତି।
କାଡିଆନ୍ କ୍ୱାର୍ଟରଫାଇନାଲରେ ବତଜୁଲ୍ ଉଲଜିମାଇଖାନଙ୍କଠାରୁ ପରାସ୍ତ ହୋଇଥିଲେ। କିନ୍ତୁ ମଙ୍ଗୋଲିଆର ଏହି ରେସଲର ଫାଇନାଲରେ ପହଞ୍ଚିବା ଦ୍ୱାରା କାଡିଆନ୍ ବ୍ରୋଞ୍ଜ ପଦକ ମୁକାବିଲରେ ସ୍ଥାନ ହାସଲ କରିଛନ୍ତି। ଅନ୍ୟପକ୍ଷରେ ରଜନୀଶ ୭୦ କେଜି ବର୍ଗରେ ହାରି ବିଦାୟ ନେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
